122
Netlatlajtili para ma onca tlasehuilistli ipan altepetl Jerusalén
1 Na nipajqui quema nechilhuijque:
“Ma tiyacajya ichaj TOTECO.”
2 Pero ama ya tiitztoque nica ipan altepetl Jerusalén.
Quena, ya ticalactoque campa ipuertas ipan itepa.
3 Jerusalén quisencajtoque para nopona nochi ma mosentilica.
4 Nochi imasehualhua TOTECO tlen catli hueli hueyi familia tlen israelitame hualahuij nica sesen xihuitl,
para quitlascamatise huan quipaquilismacase Toteco senquistoc quen quiijtohua itlajtol.
5 Pampa nopona mosehuía para tetlajtolsencahuas nopa tlanahuatijquetl catli iixhui David.
6 Ximotlatlajtica ica TOTECO para ma onca tlasehuilistli ipan altepetl Jerusalén.
Xijtiochihua Jerusalén ica ni camanali:
7 “Ma itztoca cuali nochi catli quiicnelíaj ni altepetl Jerusalén.
Ma onca tlasehuilistli ica calijtic nopa tepamitl catli quiyahualohua.
Ma itztoca ica paquilistli ipan nochi tequicalme.”
8 Pampa niquinicnelía noicnihua huan nohuampoyohua catli itztoque nica, niquijtohua:
“Ma quipiya tlasehuilistli ni altepetl.
9 Pampa niquicnelía ichaj TOTECO catli mocahua nica,
ma onca tlasehuilistli ipan ni altepetl.”