140
TOTECO, techmanahui ininmaco amo cuajcualme
1 TOTECO, techmanahui ininmaco nopa tlaixpanoca masehualme.
Techmocuitlahui para tlahuilanca tlacame amo huelis nechcocose.
2 Inijuanti nochi se tonal quisencahuaj quenicatza quichihuase tlamantli catli amo cuali.
Tlatoctzitzi quinequij quipehualtise cualantli.
3 Inincamanal tecocohua quen itencococa se cohuatl o se colotl.
4 TOTECO, techmocuitlahui para amo nihuetzis ininmaco masehualme catli amo cuajcualme,
huan catli tetlaijilhuíaj,
pampa inijuanti moilhuijtoque quenicatza nechhuihuiitase.
5 Nopa masehualme catli mohueyimatij quitlalijtoque se tlaquetztli para ma nimasi.
Quitlalijtoque se lazo para ica nechcuapilose para ma nimohuisos ajacatipa.
Nechchiyaj ica se matlatl para nechmasiltise.
6 Na nimitzilhuijtoc, TOTECO, para ta tinoDios.
Techtlacaquili quema nimitztzajtzilía.
7 Ta tiTOTECO Dios, tinotemaquixtijca,
ta tijpiya nochi chicahualistli para techmaquixtis.
Ta techmocuitlahuía quema onca tlahuilancayotl.
8 TOTECO, amo xiquincahua ma tlatlanica nopa masehualme catli amo mitztlepanitaj.
Amo xiquinpalehui para ma quisa cuali catli quinequij quichihuase para ma amo mohueyimatica.
9 Xijchihua para nochi tlamantli catli moilhuijtoque quichihuase ma huetzi ininpani.
Ma tzontlamica senquistoc quen quisencajtoyaj nechtzontlamiltise na.
10 Ipan inintzonteco ma huetzi tlicoli,
o xiquinmajcahua ipan tlitl,
o ipan ostotl catli tlahuel huejcatla campa ayacmo huelise quisase.
11 Amo xiquincahuili ma tlatlanica ipan totlal nopa masehualme catli quinpactía istlacatise.
Más cuali nimantzi xiquintlatzacuilti.
12 Pero na cuali nijmati para ta, TOTECO,
tiquinpalehuis nopa teicneltzitzi catli inijuanti quintepotztocatinemij.
Ta tiquinpalehuis catli teicneltzitzi para ma quisa cuali para inijuanti quen quinamiqui.
13 Huan masehualme catli itztoque xitlahuaque mitztlascamatise,
pampa quimatij para temachtli itztotij moixpa.