144
Netlatlajtili para Toteco ma quipalehui para tlatlanis
1 Ma nochi quipaquilismacaca TOTECO catli nechtlatíaj para amo nechajsise nocualancaitacahua.
Yaya nechyacana huan nechnextilía quenicatza nitlahuilanas.
2 Yaya nechtlasojtla huan yaya nechpixtoc campa temachtli.
Yaya nechpixtoc imaco huan nechchololtis tlen nocualancaitacahua.
Yaya notlamanahuijca huan ipan ya nimotemachijtoc.
Yaya quintlalijtoc nomaco miyac tlalme ica ininmasehualhua para ma niquinnahuatis.
3 TOTECO, ¿tlaque topati timasehualme para toca timocuatotonía?
¿Tlaque topati para tlahuel ta techpatiita?
4 Pampa tonemilis san panotehua quen se ajacatl huan quen se ecahuilotl.
5 TOTECO, xijcuelpacho nopa ilhuicactli huan xitemo techpaxaloqui.
Sintla tiquinpanajsis nopa tepeme, popocase.
6 Xijtitlani tlapetlanilotl quen elisquía cuatlamintli,
huan xiquinsemana nochi mocualancaitacahua huan amo quimatise tlaque quichihuase.
7 Hasta tlen nepa ilhuicac xijxitlahua momax huan techmaquixti.
Techchololti ininmaco ni nocualancaitacahua catli sequinoc tlalme ehuaj huan tlahuel quipiyaj chicahualistli.
Na nijmati quen nimisahuisquía ipan se atl catli tlahuel huejcatla.
8 Inijuanti san quinpactía istlacatise.
Tlatestigojquetzaj para quiijtose catli melahuac,
huan nimantzi istlacatij.
9 NoTeco Dios, na nihuicas huicatl catli yancuic,
huan nitlatzotzonas ipan noarpa catli quipiya majtlactli cuerdas.
10 Pampa ta catli tiquinchihua ma tlatlanica tlanahuatiani.
Ta catli techmaquixti na nimotequipanojca, David, para ma amo nechmictica ica machete.
11 Nojquiya techmaquixti huan techmanahui ininmaco nocualancaitacahua,
pampa inijuanti san teistlacahuíaj huan tlacajcayahuaj.
12 Xijchihua para totelpocahua ma elica tejtetique huan huejcapantique quen cuame catli yejyectzi moscaltíaj.
Huan toichpocahua ma elica yejyectzitzi,
quen nopa tlaquetzalme catli quinyejyecchijtoque,
huan quinquetztoque ipan ininchajchaj tlanahuatiani.
13 Xijchihua para tocoxtalhua ma temica ica miyac tlamantli pixquistli.
Huan toborregojhua ma momiyaquilica hasta ma mochihuaca miles huan millones ipan topotrero.
14 Xijchihua totorojhua ma quipiyaca miyac chicahualistli para tequitise.
Amo xijcahuili niyon se tocualancaitaca ma quiyahualo totepa.
Techmaca san tlasehuilistli campa hueli.
Amo xijcahuili para niyon se tlen tomasehualhua monequi tetzajtzilis para tlapalehuili pampa quipanti catli fiero ipan tocalles.
15 Quena, nelía paquij nopa masehualme ipan se altepetl catli quej ni eltoc,
huan amo quipiya catli fiero.
Quena, nelía paquij cuali masehualme catli quipiyaj TOTECO para ininDios,
huan ipan ya motemachíaj.