16
Toteco catli cuali techmacas
1 Techmocuitlahui, Toteco Dios,
pampa ipan ta nimotemachijtoc para techmanahuis.
2 TOTECO, na nimitzilhuijtoc:
“Ta tinoTeco huan amo aqui seyoc catli huelis nechpalehuis.”
3 Niquinicnelía inijuanti catli mitzneltoquilíaj catli itztoque ipan nopa tlali.
Inijuanti catli nelía yejyectzitzi ininyolo.
4 Pero mojmostla más motequipachose masehualme catli quintoquilíaj sequinoc inintlaixcopincayohua.
Na amo quema nijtencahuasquía se tlacajcahualistli iniixpa inintotiotzitzi,
niyon amo quema niquintocaxtisquía.
5 San ta, TOTECO, nimitzpixtoc,
yeca ayacmo tleno nijtemos.
Ta techmaca nochi notlacualis huan noa catli nechmonequilía para niitztos.
Nonemilis huan nochi catli nijpixtoc eltoc momaco huan nijmati nelía temachtli.
6 Nopa mecatl catli ica techtlatamachihuili campa nijselijtoc huetzqui campa nelía cuali tlali.
Nelía tlayejyectzi campa techmacatoc.
7 Nimitzhueyichihuas, TOTECO,
pampa techconsejomaca.
Tlajco yohual techmaca motlalnamiquilis huan technextilía ipan noyolo tlaque monequi nijchihuas.
8 Nochipa nimoilhuía tlen ta, TOTECO,
huan pampa tiitztoc nonechca, amo tleno nopantis.
9 Yeca ipan noyolo nelía nijpiya paquilistli.
Nochi notlacayo motemachijtoc ipan ta.
10 Pampa amo tijcahuas notlacayo ipan ostotl,
niyon amo tijcahuas ma palani itlacayo Yaya Catli Tlatzejtzeloltic.
11 Technextilis catlique ojtli quipiya nemilistli.
Nijpiyas hueyi paquilistli nepa campa ta tiitztoc.
Quena, oncas hueyi paquili para nochipa nepa campa monejmac.