21
Se huicatl pampa tlatlantoya
1 ¡TOTECO! Na nitlanahuatijquetl,
nipaqui pampa techfuerzajmacatoc.
Nelía nipaqui pampa tijchijtoc ma nitlatlani.
2 Techmacatoc catli noyolo quinequiyaya.
Quena, techmactili catli nimitztlajtlaniyaya.
3 Techsehui nitlanahuatijquetl ica hueyi tlatiochihualistli, huan techicpahuiltijtoc se corona catli senquistoc oro.
4 Nimitztlajtlani techcahuili ma huejcahuas niitztos,
huan nelía techmacatoc se nemilistli catli huejcahuas para nochipa.
5 Techpalehuijtoc ma nitlatlani miyac ica mohueyi chicahualis.
Huan yeca por ta, nochi nechhueyitlepanitaj,
na nitlanahuatijquetl, huan nechhueyitlalíaj.
6 Techtiochijtoc ica catli huejcahuas para nochipa,
huan nelhueyi nopa paquilistli catli nijpiya pampa timocahua nohuaya.
7 Na nitlanahuatijquetl nimotemachía ipan ta, TOTECO.
Quena, nimotemachía ipan mohueyi teicnelilis ta Catli Más tiHueyi,
yeca amo aqui huelis nechtlanis.
8 TOTECO, ica mochicahualis tiquinajsiti nochi mocualancaitacahua.
Ica monejmac tiquinitzquis nochi catli mitzcualancaitaj.
9 Quema timonextis, inijuanti tlatlase moixpa quen itztosquíaj ipan se horno catli xahuantoc.
TOTECO, quema tiquintlajtolsencahuas,
mocualancayo quintlamitlatis.
10 Tiquintzontlamiltis hasta ininconehua huan iniixhuihua.
11 Masque masehualme catli amo cuajcualme mitzcualancaitaj huan quisencahuaj catli amo cuali mitzchihuilise,
amo quisas cuali catli moilhuijtoque.
12 Inijuanti moicancuepase para cholojtehuase quema quiitase para tiquinmelactlachilis ica mocuahuitol tlasencahuali para tiquinhuilanas.
13 Timitzhueyimatij, TOTECO,
pampa hueyi mochicahualis.
Huan timitzhueyichihuase ica huicatl pampa nelía tijpiya nochi chicahualistli.