26
Nopa nemilistli catli tlahuel tlapajpactli
1 TOTECO, techtlajtolsencahua.
Xiteyolmelahua para amo tleno catli fiero nijchijtoc.
Nimotemachijtoc san ipan ta huan amo quema nimoilhuijtoc nimitzcahuas.
2 Techyoltlachili, TOTECO,
huan techyejyeco.
Xijtlachili cuali noyolo huan notlalnamiquilis catli más noyolijtic eltoc.
3 Pampa na nijpatiita motlaicnelilis, huan nochipa nijtoquilía mocamanal catli melahuac.
4 Amo quema ninejnentoc ininhuaya masehualme catli tlacajcayahuaj,
niyon amo nimohuicatoc ininhuaya catli quipiyaj ome iniixayac.
5 Nijcualancaita inintlasentililis amo cuajcualme.
Amo quema nimosentilijtoc ininhuaya catli fiero quichihuaj.
6 Tlapajpactli nomax tlen nochi tlajtlacoli,
huan san quej nopa nimonechcahuis motlaixpa, TOTECO.
7 Nepa nihuicas huicatl para nimitzhueyitlalis huan niteyolmelahuas nochi catli yejyectzi catli ta tijchijtoc.
8 Tlahuel niquicnelía mochaj campa tiitztoc, TOTECO,
campa monextía motlatlanex.
9 Amo techchihuili quen tiquinchihuilía tlajtlacolchihuani huan temictiani.
10 Inijuanti quisencahuaj quenicatza huelis tetlacuijcuilise.
Quipiyaj ininmax temitoc ica tomi catli tlaichtaca tlainantoque.
11 Pero na ninemi xitlahuac.
Xijpiya hueyi moyolo noca na,
huan techmaquixti.
12 TOTECO, nimitzhueyichihua tlamiyacapa.
Ica ta, cuali niijcatoc,
huan amo techcahuilijtoc ma nihuetzi.