50
Toteco Dios techilhuía quenicatza ma tijhueyichihuaca
1 Yaya TOTECO Catli Más Quipiya Chicahualistli que nochi catli quintocaxtíaj dioses,
quinnotztoc nochi masehualme catli itztoque campa hueli ipan ni tlaltipactli.
Quinnotza catli itztoque hasta campa hualquisa tonati huan hasta campa oncalaqui.
2 Toteco Dios ica iyejyejca petlani huan tlahuía tlen Sion,
nopa tepetl campa ijcatoc icaltiopa catli senquistoc yejyectzi.
3 Toteco Dios hualas ica chicahualistli,
huan iixpa hualas se hueyi tlitl catli quisosolojtihualas nochi catli quipantis.
Tlatomonilotl huan tlapetlanilotl quiyahualohua.
4 Toteco Dios quinnotza nochi catli itztoque ipan ilhuicactli huan ipan tlaltipactli,
para ma quihualtlachilica quenicatza quintlajtolsencahuas imasehualhua.
Quiijtohua:
5 “Xiquinsentilica nomasehualhua catli moiyocacajtoque noca na.
Quena, ma hualaca nochi inijuanti catli quichijtoque camanal sencahuali nohuaya,
quema nechmacaque tlacajcahualistli huan quiijtojque para nechtoquilisquíaj.”
6 Nochi ilhuicactli tepohuilía para Toteco Dios itztoc xitlahuac.
Huan para yaya nopa juez catli tetlajtolsencahuas.
7 “Xijtlacaquilica nochi annomasehualhua,
xijcaquica nochi catli niquijtos.
Nimechtelhuis tlamiyacapa ica nochi tlamantli catli anquichijtoque,
pampa na niDios huan niamoTeco.
8 Amo nimechajhuas pampa amo antechmacaj tlacajcahualistli,
niyon pampa amo anquinmictíaj tlapiyalme huan anquintlatíaj noixpa,
pampa quena, ya nopa anquichihuaj.
9 Pero amo ya nopa catli nijnequi.
Para na amo monequi techmacaca tlacajcahualistli,
quen becerros huan oquich chivojme catli hualahuij amopotrero.
10 Pampa na noaxcahua nochi tlapiyalme ipan cuatitlamitl huan nochi huacaxme catli campa hueli tlacuajtinemij ipan senquistoc nochi tlachiquilme.
11 Niquiniximati nochi totome campa hueli huan nochi tlapiyalme catli nemij cuatitla, pampa noaxcahua.
12 Sintla nimayanasquía, amo nimechtlajtlanisquía techtlamacaca,
pampa ni tlaltipactli huan nochi catli eltoc ipani noaxca.
13 ¿Anmoilhuíaj nimotlamaca ica torojme ininnacayo,
huan niquiji inieso oquich chivojme?
¡Amo!
14 Nijnequi techtlascamatilica ica nochi catli nimechchihuilía huan ya nopa niquitas quen se tlacajcahualistli.
Xijtlamichihuaca nochi catli anquiijtojtoque para anquichihuase.
15 Huan technojnotzaca quema anmotequipachohuaj,
huan na nimechmanahuis huan amojuanti antechnextilise miyac tlatlepanitacayotl.”
16 Pero Toteco quinilhuía masehualme catli amo cuajcualme:
“Amo anquipiyaj tequiticayotl para ancamanaltise tlen nopa camanal sencahuali,
catli quiijtohua catli nimechmacas,
niyon amo hueli antepohuilise notlanahuatilhua.
17 Pampa amo anquicaquij quema nimechtlacahualtía,
niyon amo anquichihuilíaj cuenta nocamanal.
18 Quema anquiitaj se tlachtejquetl,
anmohuampoxchihuaj ihuaya,
huan nojquiya anmohuicaj ininhuaya catli quichijtinemij tlen hueli ica catli amo ininnamic.
19 San campa hueli anquicalaquijtinemij amonenepil para anquiijtose catli fiero.
Nimantzi anistlacatij.
20 Anmosehuíaj huan anquitelhuíaj se catli amonelicni.
Quena, yaya catli nojquiya icone amonana huan san sejco anmoscaltijque,
anquitlaijilhuíaj.
21 Nochi ya ni anquichijtoque,
huan na amo tleno niquijtojtoc.
Huajca anmoilhuijtoque para na nieli san se quen amojuanti.
Pero ama nimechixcoilhuis nochi catli anquichijtoque,
huan nimechpannextilis nochi.
22 Xijtlacaquilica ya ni,
amojuanti catli antechelcahuaj na, niamoTeco Dios.
Sintla amo antechelnamiquij,
nimechhuejhuelos huan amo aqui itztos catli huelis anmechmanahuis nomaco.
23 Pero quema antechtlascamatij ica nochi catli nimechchihuilía,
eltoc quen se tlacajcahualistli catli nechnextilía antechtlepanitaj.
Huan nopa masehuali catli monejnehuilía campa mocuapolojtoc,
huan mocuepa ipan noojhui catli xitlahuac,
na nijmaquixtis.”