66
Se huicatl para quitlascamatis Toteco
1 ¡Nochi anmasehualme ipan tlaltipactli,
xihuicaca ica paquilistli para Toteco Dios!
2 ¡Xihuicaca tiohuicatl catli tepohuilía para tlahuel hueyi ya!
¡Xijhueyimatica por nochi catli quichijtoc!
3 Xiquilhuica Toteco Dios:
“¡Nelía yejyectzi huan tetzatic nochi catli tijchijtoc!
¡Tlahuel hueyi mochicahualis!
Yeca nochi mocualancaitacahua motemactilíaj ica ta pampa tlahuel temajmati catli tijchihua.
4 Nochi masehualme ipan tlaltipactli mitzhueyichihuase.
Inijuanti huicase para mitzhueyimatise,
huan tepohuilise tlen mohueyitilis.”
5 Xihualaca huan xiquitaquij nochi nopa huejhueyi tlamantli catli Toteco Dios quichijtoc.
¡Quinchihuilijtoc masehualme huejhueyi tiochicahual nextili!
6 Quihuatzqui nopa atl huan tlatlajco nopa hueyi atl quitlapo se ojtli huactoc campa panoque tohuejcapan tatahua.
¡Nochi israelitame quipixque se hueyi paquilistli ipan nopa tonal!
7 Toteco ica ichicahualis tlanahuatía para nochipa.
Yaya quitlachilía sesen tlamantli catli masehualme quichihuaj ipan nochi tlalme ipan tlaltipactli.
Catli amo quitlepanitaj huan catli mohueyimatij,
yaya quinechcapantlalis.
8 Nochi anmasehualme xijtlascamatica Toteco Dios huan xijhueyimatica,
por nochi catli quichijtoc,
9 pampa sesen tojuanti tonemilis eltoc imaco.
Quena, yaya techmocuitlahuijtoc huan techyacantoc xitlahuac ipan toojhui.
10 Pampa ta, tiToteco Dios, techyejyecojtoc huan techtlapajpacchijtoc,
quen nopa tepos plata catli quimoloníaj ipan tlitl catli tlahuel totonic,
para san mocahuas catli senquistoc cuali.
11 Ta techmasilti ipan momatla huan tijtlali tocuitlapa tlamamali catli tlahuel etic.
12 Tijchijqui ma cahuayojnemica topani catli ehuaj sequinoc tlalme.
Tipanoque ipan atl huan ipan tlitl.
Pero ama techtiochijtoc huan techmacatoc nochi catli cuali.
13 Ama nihualajtoc ipan motiopa para nimitzmacas tlacajcahualistli tlatlatili.
Huan quej nopa nijtlamichihuas catli nimitztlajtolcahuilijtoc para nijchihuas.
14 Pampa quema niitztoya ipan tlaohuijcayotl, nimitztlajtolcahuili ica nocamac,
para nimitzmacas miyac tlacajcahualistli.
15 Yeca ama nimitzhualiquilía ni oquich borregojme, chivojme huan becerros catli tomahuaque.
Huan ininpocyo tlejcos hasta ajsis moixpa.
16 Nochi amojuanti catli anquitlepanitaj Toteco Dios huan anquiimacasij anquiixpanose,
xihualaca xijtlacaquiliquij,
huan nimechpohuilis nochi catli yaya nechchihuilijtoc.
17 Chicahuac na nijtzajtzili para ma nechpalehui,
huan quema nijcamanalhuiyaya, nijhueyimatiyaya.
18 Pero sintla na amo niquilhuijtosquía Toteco notlajtlacolhua para ma nechtlapojpolhui,
huajca amo nechtlacaquilijtosquía.
19 Pero pampa niquilhui Toteco Dios ma nechtlapojpolhui,
yaya nechtlacaquili huan quichijqui catli niquilhui.
20 Xijpaquilismacaca Toteco Dios,
pampa yaya nechtlacaquili huan amo quihuejcamajcajqui nocamanal quema nimotlatlajti.
Nechtlasojtlac huan nechicneli.