69
David quinotza Toteco ma quipalehuiqui
1 NoTeco Dios, techmaquixti,
pampa ni tlaohuijcayotl tlahuel mochijtoc hueyi hasta nijmachilía nimiquis.
Eltoc quen atl catli nechatzonpolihuiltisnequi,
huan ya ajsic hasta noquechtla.
2 Eltoc quen nimasitoc ipan soquitl catli huejcatla huan amo hueli niquisa.
O quen nechyahualosquía tlahuel miyac atl huan huejcatla.
3 Tlahuel nichocatoc hasta nisiyajtoc.
Nimitztzajtzilijtoc, Toteco Dios, hasta nechcocohua noquechtla huan ayacmo hueli nicamanalti.
Nochi noixteyol samajtoc ica choquistli.
Ya niixcuatqui pampa campa hueli nitlachixtoc para niquitas sintla tihuala, Toteco Dios, para techpalehuis.
4 Tlahuel miyaqui nopa masehualme catli nechcualancaitaj masque amo tleno niquinchihuilijtoc.
Nelía quipiyaj miyac chicahualistli nocualancaitacahua catli quinequij nechmictise.
Pero na amo niquinixpanotoc.
Quinequij nechtlatzacuiltise ica se tlamantli catli amo nijchijtoc.
5 NoTeco Dios, ta tijmati para nelía nihuihuitic,
huan tiquiximati nochi notlajtlacolhua.
6 TOTECO, ta tiDios Catli Tijpiya Nochi Chicahualistli,
amo xiquincahuili ma huetzica ipan tlajtlacoli por na notlajtlacol,
nopa masehualme catli motemachíaj ipan ta.
Ta catli titoTeco tiisraelitame,
amo xiquincahuili ma mopinahuaca sequinoc israelitame ica catli nijchijtoc na.
7 Pampa nimitzicnelía, niquijiyohuijtoc pinahualistli,
huan nechhuetzquilijtoque hasta amo nijmatqui tlaque nijchihuasquía.
8 Hasta noicnihua nechchihuaj quen amo nechiximatij huan nechitaj,
quen se niseyoc altepetl ejquetl.
9 Quena, niquicnelía motiopa ica nochi noyolo masque ica ya nopa monequi nimiquis.
Huan catli mitztlaijilhuíaj ta,
nojquiya nechtlaijilhuíaj na pampa nimitztequipanohua.
10 ¡Quena, tlahuel nechhuetzquilíaj huan nechpinajtíaj,
quema nichoca huan nimosahua iixpa Toteco!
11 ¡Tlahuel fiero camanaltij tlen na quema nimoquentía yoyomitl catli sosoltic para nijnextis nimotequipachohua por notlajtlacolhua!
12 Nopa tlayacanca tequitini catli mosehuíaj ipuertajteno altepetl,
noca motlahuetzquiltíaj.
Huan nopa ihuintini noca huicatinemij.
13 Pero TOTECO na nijsenhuiquilía nimitztemohua huan nimotlatlajtía ipan ta,
pampa nijmati ajsis tonali para techtlacaquilis.
Toteco Dios, ica mohueyi tlaicnelilis technanquili,
pampa ta nochipa techicnelijtoc.
Huajca technanquili quema nimotlatlajtía huan techmanahui.
14 Techquixti tlen ni soquitl catli huejcatla campa nimasitoc.
Amo techcahuili para niatzonpolihuis.
Techmanahui ininmaco catli nechcualancaitaj.
Techquixti tlen ni hueyi atl catli nechyahualojtoc.
15 Amo xijcahuili ma nechtlaijiyohuilti ni miyac atl catli ajsitoc,
niyon amo xijcahuili nopa atl ma nechtolo.
Techmanahui para amo nimasis ipan nopa ostotl catli tlahuel huejcatla.
16 TOTECO, technanquili quema nimitztzajtzilía pampa ta nelía ticuali.
Ta techicnelía miyac huan tijpiya hueyi moyolo ica na.
17 ¡Amo ximotlati quema nimitztemohua pampa tlahuel nitlaijiyohuía!
Ximoisihuilti, xihuala huan techmaquixtiqui.
18 Xihuala, noTeco Dios huan techmanahuiqui.
Techmaquixti ininmaco nocualancaitacahua.
19 Ta tijmati quenicatza camanaltij fiero tlen na huan quenicatza nechpinahualtijtoque.
Quichijtoque para ayacmo aqui ma nechtlepanita.
Ta tiquiniximati nochi nocualancaitacahua huan tijmati tlaque quiijtojtoque sesen inijuanti.
20 Inijuanti tlahuel nechyolcocojtoque huan nechtequipacholmacatoque.
Nijtemojtoc ajqueya nechtlasojtlasquía huan nechyoltlalisquía,
pero niyon se amo nijpanti.
21 Quema nimayanayaya nechmacaque pajtli catli temictía para notlacualis.
Huan quema niamiquiyaya nechmacaque ma niquiji vinagre.
22 Nopa paquilistli catli inijuanti quipiyaj ma mocuepa tequipacholi.
Huan nopa tlasehuilistli catli quipiyaj ica ininhuampoyohua,
ma mocuepa cualancayotl.
23 Ma huala ininpani tzintlayohuilotl huan ma huihuipicaca pampa ayacmo quipiyase más fuerza.
Ma elica popoyotzitzi huan ma tlami nochi ininchicahualis.
24 Xiquinnextili mohueyi cualancayo huan xiquintzontlamilti.
25 Ipan inintequicalhua ma mocahua tlasosoltic,
huan ipan ininchajchaj ma tlatzitzicato.
Ayacmo aqui ma itzto.
26 Pampa inijuanti más quitlaijiyohuiltíaj catli ta tijcocojtoc,
huan quipinajtíaj catli ta tijtequipacholmacatoc.
27 Xiquijcuilo nochi inintlajtlacolhua huan amo xiquintlapojpolhui.
28 ¡Xiquixpolo inintoca ipan moama campa eltoc inintoca inijuanti catli yoltoque!
¡Ma amo quipiyaca tlasehuilistli quen quipiyaj nopa masehualme catli itztoque xitlahuaque moixpa!
29 Pero na catli nitlaijiyohuía huan niteicneltzi,
techmaquixti huan techtlanana.
Quena, Toteco Dios, techtlali campa ta tiquitas quinamiqui.
30 Huan huajca nihuicas huan nijpaquilismacas Toteco Dios.
Quena, nijhueyimatis huan nijtlascamatis.
31 Huan TOTECO achi más quipactis ya nopa,
huan amo quen sintla nijmacasquía se toro o se becerro catli tlacuacuajhuía huan quipiya iistihua.
32 Inijuanti catli teicneltzitzi quiitase Toteco Dios quema quinmacas itlapalehuil,
huan yeca tlahuel paquise.
Huan nochi catli quitemohuaj Toteco Dios itztose ica paquilistli.
33 Pampa TOTECO quintlacaquilía catli teicneltzitzi,
huan amo quintlahuelcahua inijuanti catli itztoque ipan tlatzactli.
34 ¡Xijpaquilismacaca TOTECO nochi amojuanti catli anitztoque ipan ilhuicactli huan tlaltipactli!
¡Ma quihueyichihuaca nochi catli itztoque ipan hueyi atl!
35 Pampa Toteco Dios quimaquixtis ialtepe, Jerusalén,
huan sempa quincualtlalis nopa altepeme ipan tlali Judá.
Huan imasehualhua mochantise nopona huan moaxcatise nopa tlali.
36 Huan teipa ininconehua nojquiya moaxcatise nopa tlali.
Huan nochi catli quitequipanohuaj huan quiicnelíaj Toteco itztose nopona temachme.