74
Quema tocualancaitacahua hualahuij, ma tijtemoca Toteco
1 Toteco Dios, ¿para tlen techtlahuelcajtoc para nochipa?
¿Para tlen tlahuel ticualani ica tojuanti catli tiitztoque quen timopilborregojhua?
2 Xiquelnamiqui para tojuanti timomasehualhua catli timocohui huejcajya quema titetequipanohuayayaj san tlapic.
Quena, techtlapejpeni para techchihuas timoaxcahua.
Nojquiya tijtlapejpeni nopa altepetl Jerusalén para tijchihuas quen elisquía mochaj ipan ni tlaltipactli.
3 Xihuala xiquitaqui quen quitlamisosolojtoque nopa altepetl,
huan xijtlachili quenicatza tocualancaitacahua quisosolojtoque motiopa.
4 Nopona tzajtzique mocualancaitacahua ica paquilistli quema tlasosolojque.
Teipa san techhuetzquilijque huan quinquetzque ininteteyohua para quinextise ya techtlantoyaj.
5 Hualajque ica ininhachas huan huejhueyi martillos hasta nesiyaya quen cuajcuahuini tlatlajco cuatitlamitl.
6 Huan ama ica ininteposhua quitlapanque huan quisosolojtoque nochi tlamantli catli ica tlayejyecchijtoyaj motiopa.
7 Quena, motiopa quitlatijque,
huan quimahuispolojque moixpa nopa catli quihuicayaya motoca,
huan quitlahuisojque tlalchi.
8 Huan quiijtojque ipan ininyolo:
“Ma tijtlamisosoloca nochi catli onca ipan ni tlali.”
Huan yajque campa hueli huan quitlatijque nochi israelita tiopame,
campa timosentiliyayaj para timitzhueyichihuase, Toteco Dios.
9 Ayacmo onca niyon se tlamantli catli quinextía para timomasehualhua.
Ayacmo onca tlajtol pannextiani.
Ayacmo aqui huelis techilhuis hasta quema tlamis nochi ya ni.
10 Toteco Dios, ¿hasta quema tlamis mitzmahuispolohuaj mocualancaitacahua?
¿Atlac amo quema tiquintlatzacuiltis?
11 ¿Para tlen tihuejcahua para techpalehuis?
¿Para tlen amo tijnextía mohueyi chicahualis huan techpalehuía?
12 Hasta tlen huejcajya Toteco Dios itztoya notlanahuatijca.
Yaya nechpalehuijtoc ipan ni tlaltipactli huan campa hueli campa niyajtoc.
13 Ica mochicahualis tijxelo hueyi atl.
Huan tiquintzontlamilti huejhueyi tlapiyalme catli temajmatijque catli itztoyaj ipan atl.
14 Tijtzonxamani nopa hueyi tlapiyali catli itoca leviatán,
huan inacayo tiquinmacac ma quicuaca nopa tecuanime catli itztoyaj ipan huactoc tlali.
15 Tijchijqui ma meya atl ipan huejhueyi amelme huan para hueyame ma quipiyaca atl.
Nojquiya tiquinhuatzqui hueyame catli amo quema huactoyaj.
16 Ta moaxca tonali huan yohuali.
Ta tijchijchijqui metztli huan tonati.
17 Ta tijtamachijqui hasta canque tlamis tlaltipactli.
Nojquiya ta tijchihua ma tlatotoniya huan ma tlaseseya.
18 TOTECO, xiquita quenicatza mitzmahuispolohuaj mocualancaitacahua,
huan quenicatza mitztlaijilhuíaj nopa masehualme catli mohueyimatij.
19 ¡TOTECO, amo techtlahuelcahua!
Xijmanahui mopaloma imaco nopa cuajtli.
Quena, xiquinmanahui momasehualhua ininmaco nopa masehualme catli itztoque quen tecuanime.
20 ¡Xiquelnamiqui nopa camanal sencahuali catli tijchijtoc tohuaya!
Pampa ni tlali temitoc ica tzintlayohuilotl huan ica masehualme catli mosisiníaj.
21 Amo xijcahua para tlatoctzitzi ma techmahuispoloca tojuanti catli tijpanotoque miyac tlaohuijcayotl.
Xiquinpalehui catli teicneltzitzi huan amo tleno quipiyaj para huelis mitzpaquilismacase.
22 Toteco Dios, ximotlanana huan ximomanahui ica catli quiijtohuaj mocualancaitacahua.
Xiquelnamiqui nochi nopa camanali catli ica mitztlaijilhuijtoque nochi se tonal.
23 Amo xiquelcahua quenicatza mitztelchijtoque mocualancaitacahua,
pampa inijuanti noja más mitztlaijilhuíaj.