76
Se huicatl catli huicaque quema ya tlatlanque
1 Ipan tlali Judá huan hasta nochi tlali Israel nochi masehualme quiiximatij Toteco Dios para nelía hueyi.
2 Itiopa eltoc ipan altepetl Jerusalén.
Quena, ipan tepetl Sion moquetza ichaj.
3 Nopona quipojpostejqui nochi tlamantli ininteposhua tocualancaitacahua.
4 ¡Nopa tepeme catli eltoque tlen huejcajya amo quipiyaj ininyejyejca quen tepetl Sion quipiya!
5 Nopa tocualancaitacahua catli más quipiyayayaj chicahualistli,
quintlamitlacuijcuilijque.
Toixpa tepejtoque mictoque.
Niyon se tlen inijuanti ayacmo hueli quitlananas imax para techhuilanas.
6 Quema ta tiToteco, catli tiiDios Jacob, tiquinajhuac nopa cahuayojme huan catli tlejcotoyaj ininpani,
nochi huetzque hasta tlalchi.
7 ¡Yeca nochi quiitaj para tlahuel titemajmati!
Huan amo aqui huelis quiijiyohuis ijcatos moixpa quema tlahuel ticualantoc.
8 Hasta nepa ilhuicac titlayolmelahua para titetlatzacuiltis.
Huan ni tlaltipactli majmahui huan amo molinía moixpa,
9 quema timotlananqui, Toteco Dios,
para tiquintlatzacuiltis catli quichihuaj catli amo cuali,
huan para tiquinmanahuis nochi catli moechcapanohuaj ipan ni tlaltipactli.
10 Ta tijtequihuía inincualancayo masehualme para sequinoc ma mitzhueyimatica.
Huan tijtequihuis para más monextis moyejyejca.
11 Xijchihuaca nochi catli anquitlajtolcahuilijtoque TOTECO para anquichihuase.
Sesen ma quihualica nopa tlamantli catli quitencahuilijtoc para quimacas Toteco Dios.
Monequi ma tijhueyitlepanitaca huan ma tiquimacasica,
12 pampa yaya quintlamiltilía ininnemilis nopa huejhueyi tlayacanani.
Quichihuas para nochi tlanahuatiani ipan tlaltipactli ma quiimacasica.