8
Masehualme huan ihueyitilis Toteco Dios
1 ¡TOTECO, ta Catli Tijpiya Nochi Tlanahuatili!
Mohueyitilis quitemitía nochi tlaltipactli.
Huan motlatlanex quionpano ilhuicactli.
Nochi quimatij ta tlahuel tihueyi.
2 Tiquinnextilijtoc coneme huan pilconetzitzi catli noja chichij ma mitzpaquilismacaca.
Mocualancaitacahua quiitase huan momacase cuenta para tlahuel pano hueyi mochicahualis huan yeca ayacmo molinise.
3 Quema niquita ilhuicactli catli tijsencajqui,
huan nopa metztli huan sitlalime catli tiquinchijchijqui,
4 nimoyolilhuía:
¿Ajqueya tojuanti timasehualme para ta timocuatotonía huan timoilhuía tlen tojuanti?
Nelquentzi topati timasehualme para ta techmocuitlahuis.
5 Techchijtoc timasehualme más tihuejhueyi moixpa que nochi sequinoc.
Techmacatoc tohueyitilis moixpa huan tijsencajtoc para nochi catli tijchijtoc ma techtlepanitaca.
San ta, TOTECO, tieltoc más tihueyi huan techtlani ica mohueyitilis.
6 Techmacatoc timasehualme tlanahuatili ica nochi tlapiyalme catli tiquinchijtoc.
Quena, techmacatoc timasehualme para ma tijpiyaca tequiticayotl ica nochi tlamantli.
7 Tiquinnahuatíaj nochi borregojme, huacaxme huan nochi tecuanime catli mosisiníaj.
8 Tijpiyaj tequiticayotl ica nochi tlamantli totome huan michime, huan ica nochi catli itztoque ipan hueyi atl.
9 ¡TOTECO, ta Catli Tijpiya Nochi Tlanahuatili!
Nochi masehualme campa hueli ipan nochi tlaltipactli quimatij ta tlahuel tihueyi.