83
Toteco, xiquintlatzacuilti catli quicualancaitaj Israel
1 ¡Toteco Dios, amo san xitlacacto,
niyon amo san xitlachixto quema timotlatlajtíaj!
Monequi technanquili huan techmanahui,
2 pampa mocualancaitacahua tlahuejchihuaj hasta quen nanalcaj huan mohueyimatij ica ta.
3 Inijuanti tlahuel quimatij quenicatza quitlalise tlaquetztli ica momasehualhua.
Huan quisencahuaj quenicatza quichihuase para quinmictise catli tiquintlapejpenijtoc.
4 Huan quiijtohuaj:
“Ma tiyaca tiquinixpolotij nochi nopa israelitame para ayacmo ma elica se tlali ica imasehualhua.
Huan ayacmo aqui quielnamiquis itoca Israel.”
5 Ya nopa catli quisencajque san sejco quema mosentilijque para mocamanalhuise.
Quena, san sejco quichijque se camanali para fiero mitzchihuilise.
6 Nopa masehualme elque iixhuihua Edom, Ismael, Agar huan Moab.
7 Nojquiya inijuanti hualajque tlen nopa tlalme Gebal, Amón, Amalec, Filistea huan Tiro.
8 Huan nopa masehualme tlen tlali Asiria nojquiya mosansejcotilijque ininhuaya.
Nojquiya iixhuihua Lot.
9 Xiquinchihuili san se quen tiquinchihuili tlali Madián ehuani,
o quen tijchihuili Sísara huan Jabín ehuani ipan hueyatl Cisón.
10 O xiquinchihuili quen tijchijqui ica mocualancaitacahua ipan tlali Endor.
Inijuanti inintlacayohua mocajque tepejtoque tlalchi huan elque quen abono para tlali.
11 Xijchihua para nopa tlacame catli tlahuel tejtetique ma miquica quen Oreb huan Zeeb quinmictijque.
Huan nojquiya xijchihua para inintlayacancahua ma miquica quen nopa tlanahuatiani Zeba huan Zalmuna.
12 Pampa inijuanti quiijtojque:
“Ma timoaxcatica nopa tlali catli iaxca Dios.”
13 NoTeco Dios, xiquinsemana ica moijiyo quen inijuanti elisquíaj tlaltejpoctli,
o quen tlasoli catli quihuica ajacatl,
14 o quen se hueyi tlitl catli quitlamitlatía ipan se cuatitlamitl.
15 Xiquintojtoca ica huejhueyi tlitl, ica tlatomonilotl,
huan ica huejhueyi ajcomalacatl.
16 TOTECO, xiquinpinahualti nochi hasta mitziximatise ta huan mohueyi chicahualis.
17 Ayacmo ma quimatica tlaque quichihuase.
Ma mopinahualtica huan ma huetzica ipan majmajtli.
18 Quena, xiquinchihuili ya nopa hasta quimachilise para san ta tiTOTECO,
huan para ta tiDios Catli Más Hueyi huan para san ta tijnahuatía nochi tlaltipactli.