98
Ma tijpaquilismacaca Toteco pampa yaya xitlahuac tetlajtolsencahua
1 Ma tihuicaca para TOTECO se huicatl yancuic,
pampa yaya quichijtoc nochi nopa huejhueyi tiochicahual nextili.
Yaya ya tlatlantoc ica ihueyi chicahualis huan ica imax catli tlatzejtzeloltic.
2 TOTECO quipannextijtoc ipan nochi tlaltipactli para san yaya temaquixtía.
Quinextijtoc iniixtla sequinoc tlalme para xitlahuac tetlajtolsencahua.
3 Yaya quielnamictoc catli techtencahuilijtoc pampa techicneli tojuanti tiisraelitame.
Huan ama ipan nochi tlaltipactli quiitztoque quenicatza Toteco Dios techmaquixtijtoc tiimasehualhua.
4 Yeca ipan nochi tlaltipactli xijpaquilismacaca TOTECO huan xihuicaca ica miyac paquilistli.
5 Xijhuicatica TOTECO.
Xijhueyimatica huan xitlatzotzonaca ica arpa.
6 Xijpitzaca nochi tlamantli tlapitzali huan xihuicaca ica yejyectzi iixpa TOTECO,
yaya catli Tlanahuatijquetl.
7 ¡Ma mojmolini chicahuac tlen ihuexca nopa hueyi atl huan ma quipaquilismaca Toteco!
Nochi tlaltipactli huan catli itztoque ipani ma tzajtzica huan ma quiijtoca:
“Tijhueyitlalise Toteco.”
8 Nopa hueyame ma paquica,
huan masehualme ma momatlatzinica,
huan nochi tepeme ma huicaca ica paquilistli
9 iixpa TOTECO,
pampa yaya huala para quintlajtolsencahuaqui xitlahuac nochi masehualme catli itztoque ipan ni tlaltipactli.