De Beebaa go
Amos
Hanu dagodo o de beebaa nei
Taane ne siia de beebaa nei go Amos, i de masavaa o Jeroboam II e hodooligi ai i Israel, gai Uzziah (aabe go Azariah) e hodooligi i Judah. Amos go tahi pelaabisi ne sisi ana agoago i lo te Beebaa Dabu. Ia se dangada mai i dahi aduhale o Judah, aagai ia ne agoago ange gi dangada i de nohoanga hodooligi o Israel, i de bido gi ngaiho o de henua, i daha de valu centuryb.c. De masavaa laa se masavaa e laumalie ai de lava o de henua, gai dangada e daumaha ange gi de Maadua, aama de nnoho paba. Aagai Amos ne gidee bolo dangada e lava donu huu i goloa, gilaadeu e dee hagamodu muna i de heohi, gai e vaivai hai de gau hagaau aloha. Alaadeu hai daumaha e dee hai i de lodo se muna abodonu, delaadeu nnoho paba se mee hagaago donu huu. Amos ne lodo mmahi i de tala bolo de Maadua e hagaduasala naa de henua. Gai ia ne hai ange gi dangada gilaadeu gi hai hegau i de mee heohi, “gi bei dagodo de sali o saalingaa vai” (5.24), ma de hagadaba hogi, “Kana adu Tagi Maolunga, de Maadua o denga hagabuulinga hebagi, e abodonu ange naa gi dangada o Joseph e doe” (5.15).
Dahi gubu hagamogomogo: “Aagai doodou hai hegau i de hagamodu heohi gi bei dagodo de sali o saalingaa vai, gai doodou hai hegau i de heohi gi bei ssaalingaa vai e dee maua laa gi masa!” (5.24).
Denga vaevaaenga
De hagaduasala o dangada e paa ange gi Israel (1.1—2.5)
De hagaduasala o Israel (2.6—6.14)
Denga midi hagaago ange e lima (7.1—9.15)
1
1 Muna a Amos, dahi daane hagaloosi ssiibi o Tekoa — go ana midi hagaago ange ne gidee i dagodo o Israel, i e lua ngadau i mua de ngalungalue o de henua, i de masavaa o Uzziah e hodooligi ai i Judah, gai Jeroboam tama daane a Jehoash e hodooligi ai i Israel.
2 Ia ne hagadaba:
“Tagi Maolunga e hagangolo mai i Zion,
ma de basa mai i Jerusalem bei de babaa o de hatuli;
mommee iai helii a de gau hagaloosi manu e tangi naa,
gai ulu de mounga go Carmel e mmae naa.”
De hagaduasala o henua e paa ange gi Israel
3 E hagadaba Tagi Maolunga:
“Tolu hanonga o Damascus ne haisala ai, ga dae ai loo gi de haa hanonga,
gai au e dee tuu naa donu dono hagaduasala.
Go hiidinga gilaadeu ne duuduu Gilead
i de mee duuduu grain e hai laa i iron.
4 Au e hai naa gi humai de ahi e dudu ai de hale o Hazael,
gai e dudu donu ga deai mommee buibui makaga o Ben-Hadad.
5 Au e oha naa denga mee hagamakaga baalanga o de haitoga o Damascus,
ma de daa gi maakau dangada e nnoho i de geelonga o Aven,
ma de ia e hodooligi i Beth Eden;
gai de gau Syria e noonoa naa ga kave gi Kir,”
go Tagi Maolunga e hagadaba.
6 E hagadaba Tagi Maolunga:
“Tolu hanonga o Gaza e haisala ai, ga dae ai loo gi de haa hanonga,
gai au e dee tuu naa donu dono hagaduasala.
Go hiidinga gilaadeu ne noonoa dahi huaadangada
ga gaavange gi de gau Edom.
7 Au e gaamai naa de ahi gi duungia de buibui o Gaza,
gai e dudu naa donu ga deai ono mommee buibui makaga.
8 Au e daa naa gi maakau dangada e nnoho i Ashdod,
ma de ia e hodooligi i Ashkelon.
Au e hai baasi ange donu gi Ekron,
ga dae ai gi de odi de gau Philistia i de maakau,”
go de Ia Aamua go Iahweh e hagadaba.
9 E hagadaba Tagi Maolunga:
“Tolu hanonga o Tyre e haisala ai, ga dae ai loo gi de haa hanonga,
gai au e dee tuu donu dono hagaduasala.
Go hiidinga gilaadeu ne noonoa dahi huaadangada
ga gaavange gi de gau Edom;
gilaadeu tee manadua de hagatoo donu hagaheloongoi madali olaadeu daina.
10 Au e hai naa gi humai de ahi gi duungia de buibui o Tyre,
gai e dudu naa donu gi deai ono mommee buibui makaga.”
11 E hagadaba Tagi Maolunga:
“Tolu hanonga o Edom ne haisala ai, ga dae ai loo gi de haa hanonga,
gai au e dee tuu naa donu dono hagaduasala.
Go hiidinga ia ne doolohi ono daina ga daa i de gadilaasa,
ia tee lodo aaloha ange gi gilaadeu.
Gai ia tee tuu donu de hebagi i hiidinga dono lili,
ia ne golo age dono lili ga hano ai.
12 Au e hai naa gi humai de ahi gi duungia Teman,
gai e dudu naa donu gi deai mommee buibui makaga o Bozrah.”
13 E hagadaba Tagi Maolunga:
“Tolu hanonga o de gau Ammon e haisala ai, ga dae ai loo gi de haa hanonga,
gai au e dee tuu naa donu dono hagaduasala.
Go hiidinga gilaadeu ne hangahanga dinae o denga haahine hai tama i Gilead,
gi kii ange de lahalaha delaadeu henua.
14 Au e haula naa dahi ahi i lo te buibui o Rabbah,
e dudu ai gi deai ono mommee buibui makaga,
gai dangada e hevaalogi naa i de laangi o de hebagi,
madali de madangi mmahi i de laangi e ssau ai de madangi.
15 Delaadeu hodooligi e gaavee naa gi dahi henua gee,
madali denga dagi o de henua,”
go Tagi Maolunga e hagadaba.