11
De uli mai i de aamuli o Jesse
1 Dahi uli e matili age naa i tahido o Jesse;
gai dahi laa e somo age naa i dono dahido ga hua.
2 De Hagasaalunga o Tagi Maolunga e noho naa i ono daha —
go de Hagasaalunga o de heiangi, ma de donu ange,
ma de Hagasaalunga o de hagasaele heohi ma de mmahi,
ma de Hagasaalunga o de iloo mee, ma de madagu i Tagi Maolunga —
3 gai ia e malangilangi i de madagu i Tagi Maolunga.
Ia e dee hagamodu muna i mee aana e gidee,
aabe e hai dahi hilihili i ana mee e langona,
4 aagai ia e hagamodu muna o dangada e duasala i de heohi,
ma de hagamodu muna o de gau hagaau aloha i henua i lalo i de heohi.
Ia e hagaduasala naa henua i lalo i ana muna e tala;
gai e daa gi maakau de gau baubau i de madangi o dana manava.
5 De heohi e hai naa go dono beele,
gai de muna abodonu go de malo e nnoa ai lo tono ungaalodo.
6 De wolf e noho naa madali ssiibi gauligi,
de leopard e dagodo naa gi lalo madali de guudi;
de kaau gauligi ma de laiono gauligi
ma de manu gu haangai ma gu bedi e nnoho hagabuni naa;
gai dahi damaa gauligi e dagi naa gilaadeu.
7 De kaau e gaimee naa madali de bea;
gai alaau dama e daakodo naa i de mommee daudahi,
gai de laiono e gai naa denga helii mmasa bei de kaau.
8 De gaagaa goi unuunu laa e hagadaahao naa i ma te haonga o de labodo hagammau,
gai tamaa gauligi gu dee unuunu laa e velo ange naa dono lima
gi lo te haonga o de labodo gadigadi.
9 Gai e deai naa donu se hagammae aabe go de oha
i honga dogu mounga dabu alodahi,
go hiidinga henua i lalo e honu naa i de iloo mee o Tagi Maolunga,
bei de honu o tai i denga lausedi.
10 De laangi laa gai de uli o Jesse e duu age naa e hai ai de hagailonga ange gi denga huaadangada; gai denga huaahenua e hagabuni mai naa gi kilaa, gai dono mommee hagammabu e hai naa ga mahamaha.
11 De laangi laa gai de Ia Aamua e hagaahe mai naa ono dangada e doe i ssauaa o dono lima, mai i Assyria, ma Egypt, ma Pathros, ma Ethiopia, ma Elam, ma Babylon, ma Hamath, aama mai i denga modu alodahi.
12 Gai ia e hagaduu age naa dahi hagailonga ange gi denga huaahenua,
ma de hagabuni mai de gau Israel i denga henua gee;
ia e hagaahe mai naa dangada o Judah gu mavaevae saele laa
gi denga dege e haa o henua i lalo.
13 De lodo gaiaa o Ephraim e tuu naa,
gai hagadaumee o Judah gu deai donu;
Ephraim gu dee lodo gaiaa ange gi Judah,
gai Judah gu dee kino i Ephraim.
14 Gai gilaadeu e loiho naa i denga madadaagodo o Philistia i de baasi gi dai.
Gilaadeu e hagabuni naa hogi ga kave mee o dangada e nnoho i baasi i dua.
Gilaadeu e kave naa Edom ma Moab ga henua ai,
gai de gau Ammon e nnoho naa i olaadeu lalo.
15 Gai Tagi Maolunga e hai naa gi masa vai
i lo te mada loolodo o Egypt.
Ia e haalo naa dono lima
ga hai gi humai de madangi hagavvela gi honga ssaalingaa vai go Euphrates.
Ia e hagaili naa honga de vai laa ga hai ai e hidu saalingaa vai vaaligiligi,
gai dangada e maua naa i de seesee ga hulo gi de baasi laa.
16 Gai e dahi naa haiava laumalie ange gi ono dangada e doe,
e aahe mai ai i Assyria,
bei de hai o de gau Israel
ne loomai ai laa i Egypt.