20
De hagaduasala i hiidinga o haisala
1 Gai Tagi Maolunga ne hai ange gi Moses,
2 “Basa ange gi de gau Israel, hai ange, ‘Noo dahi dangada Israel, aabe se dangada henua gee e noho laa i daho de gau Israel, e gaavange dahi ana dama e sigidaumaha ange gi Molek, gai ia e daa donu gi magau. Dangada o de henua gi magaa ia gi magau i denga hadu.
3 Au e hai baasi ange gi tangada bee nei, ma de vvae gee ia mai i daho ono dangada, i hiidinga ia gu sigidaumaha ange dahi ana dama gi Molek; ia gu hai ma gu hakino gee dogu mommee dabu, aama de hagangadi mee dogu ingoo dabu.
4 Gai noo dangada i de henua e dee anga ange gi tangada, e sigidaumaha ina ange laa dahi ana dama gi Molek, gai e dee daa hogi ia gi magau,
5 gai au e hai baasi ange gi tangada bee nei ma dono huaabodu; au e vvae gee naa gilaadeu mai i daho olaadeu dangada, madali dangada alodahi e daumaha ange gi Molek madali ia.
6 Gai noo dahi dangada e ssala tangada e hagahia laa hagasaalunga o de gau maakau ma gilaadeu e pasa ange gi denga hagasaalunga baubau, gai au e hai baasi ange donu gi tangada laa, ga vvae gee ia gi dee nnoho madali ono dangada.
7 Deenei ai, goodou vaaea gee goodou, ma de hai gi dabu goodou; i hiidinga go au donu go Iahweh doodou Maadua.
8 Goodou daudali i agu hainga gu hagasauaa mage haia gi bei; go au donu go Iahweh ne vaaea gee goodou ga hai gi dabu.
9 Be goai e hagangadi mee ina dono damana be go dono dinana e daa donu gi magau, i hiidinga ia gu hagangadi mee dono damana be go dono dinana; ia e hagaduasala donu.
10 Noo dahi daane gu dagodo haisala ma de bodu o dahi dangada gee, gai gilaau ngaadahi e daa donu gi maakau.
11 Gai taane e dagodo haisala ma dono maa, e bei donu ia gu hagangadi mee dono damana. Gai gilaau ngaadahi e daa donu gi maakau; gai delaau maakau e dau ange donu huu gi gilaau.
12 Noo dahi daane gu dagodo haisala ma dono saulaba, gai gilaau ngaadahi e daa donu gi maakau. Gilaau gu dahulinga be ni manu, gai delaau maakau e dau ange donu huu gi gilaau.
13 Noo dahi daane e dagodo haisala ma dahi daane bei de hagahebaa o taane ma de hine, gai gilaau gu hai dahi hegau hakino gee. Gilaau ngaadahi e daa donu gi maakau, gai delaau maakau e dau ange donu huu gi gilaau.
14 Noo dahi daane e hai bodu ange gi dahi hahine ma dono dinana, gai de mee nei se hegau baubau donu. Taane laa ma luu hahine laa ngaadahi e dudu donu i de ahi, gi deai ai hegau baubau bee nei e hai i oodou magavaa.
15 Noo dahi daane e dagodo haisala ma dahi manu dolodolo, gai ia e daa donu gi magau; gai goodou daia hogi gi magau de manu laa.
16 Noo dahi hahine e dagodo haisala ma dahi manu dolodolo, gai goodou daia ngaadahi de hine laa ma de manu laa gi maakau. Gilaau e daa donu gi maakau, gai delaau maakau e dau ange donu gi gilaau.
17 Noo dahi daane e hai bodu ange gi dono daina hahine, e dee hilihili be gilaau se damana daudahi aabe se dinana daudahi, gai gilaau gu hagahebaa, de mee nei se hegau donu hagadookaa. Gai gilaau ngaadahi e vvae gee donu mai i daho olaau dangada. Taane laa tee hagadubu dono daina hahine, gai dono hagaduasala e dau ange donu gi de ia.
18 Noo dahi daane e hagahebaa ma dahi haahine magi haahine, gai taane laa gu hai ma gu gidee de mommee e loomai laa dodo o de hine laa, gai de hine laa gu hai hogi ma gu gidee de mommee laa. Gai gilaau ngaadahi e vvae gee donu mai i daho olaau dangada.
19 Aude dagodo haisala ma taina hahine o doo dinana, aabe go taina hahine o doo damana, i hiidinga e bei koe gu hagangadi mee doo dangada donu; gai ooluu haisala e dau adu donu gi gooluu.
20 Noo dahi dangada e dagodo haisala ma de bodu o taina daane o dono damana, gai e bei donu ia gu hagangadi mee taina daane o dono damana. Gilaau ngaadahi e hagaduasala donu i olaau haisala, gai gilaau e dee hagadili donu ga maakau ai gilaau.
21 Noo dahi daane e hai bodu ange gi de bodu o dono daina daane, de hegau nei se mee hakino gee; gai e bei donu ia gu hagangadi mee dono daina daane, gai gilaau e dee hagadili naa donu.
22 Gai goodou daohia agu mee alodahi gu hagasauaa ma agu mee gu hagamodu adu gi goodou ma gi daudali ai, gi dee lueia mai ai goodou e de henua aagu e kave goodou gi nnoho ai.
23 Gai goodou e dee ago ange i dahulinga a denga huaahenua aagu e aau gee mai i oodou daha. Go hiidinga gilaadeu ne hai mee nei alodahi, deelaa ai, au ne kino i gilaadeu.
24 Aagai au gu hai adu bolo goodou e kave naa delaadeu henua, gai au e gaavadu naa de henua nei goodou gi henua ai, se henua iai vai uu ma hooni lagolago. Go au donu go Iahweh doodou Maadua, au ne vvae gee goodou mai i denga huaadangada ange laa.
25 Deenei ai, goodou vaaea de manu dolodolo gilimalali ma de manu e dee gilimalali, manu llele e dee gilimalali ma manu llele gilimalali. Goodou e dee hai gi hakino gee goodou i denga manu dolodolo be ni manu llele aabe go hanu manu e tolo i honga de gelegele, go mee aagu gu vvae gee laa i hiidinga e dee gilimalali adu gi goodou.
26 Goodou gi dabu mai gi de au; i hiidinga go au donu go Iahweh, au e dabu, gai au gu vvae gee goodou mai i denga huaadangada ange laa, e hai ai ogu dangada.
27 Gai taane be se hine e hagaagahia ange hagasaalunga o de gau maakau, be se dangada e basa ange gi denga hagasaalunga baubau, e daa donu gi magau. Gai de gau bee nei e maga donu gi maakau i denga hadu; gai olaadeu haisala e dau ange donu gi gilaadeu.’ ”