5
Ghahaghita tana marara
1 Keri ke, taonia na nilabuna God tana lei totobo tau gonighi na pukuna ighau rana dalena te dolovighau.
2 Kau ghahaghau tana dolo te vonughia na doloviadira rana keha, taonia na nilabuna Christ. Agaia te dolovighita me lubatiolia heghena na volana vagha na sukaghi te lavikehai na lei palumiu. God te nia togotogo vania, na pukuna na sukaghi te uruuru vagha na kokolo uruuru vania.
3 Sania na tangotangodika, mana kaukabu meto mana gharu ighobumiu. Na lei tangohahi raini ke, tara mua ulaghadira nina vure God.
4 Me mua maemane tua ge kau tutugu dika, kokoe bulebule mana batobato meto. Hauvaa, me uto vanighau ge kau vahea God vaso na bosa ni holouto.
5 Kau ghilala utoa e taho siki tinoni ke tangotangodika, pe ke kabu meto, pe ke gharu ke loghoa na malana ta nina kinakabu a Christ maia God. Na tinoni te gharu ke, te vagha na tinoni te holohabaa na titinoni god, na pukuna te holohabai vamua na lei totobo ni maramana.
6 Kara bei hulihahighau gea arahei tara tabotabo na pegoamiu nia na lei bosa sorisori, mara ghaghua, te uto sono ge kau gonighi na lei totobo dika rakiri. Na pukuna nina rutu a God itadira arahei tara mua taonia gaia.
7 Kau bei nira udukolu gea arahei tara gehegehe hahi.
8 Sakai vamua na tobamiu te vonughighi na pungi idania, mi taeni na mararana Lord te mararaghau, keri ge na nilabumiu ke talutatei.
9 Na pukuna tana bona na marara itamiu, na nilabumiu te talutatei vamua na hava te uto, mete maemane, mete utuni.
10 Kau kenei na lei totobo a Lord ke nighi togotogo, ma kau nei.
11 Kau bei hogholavaghi gea tana lei totobo dika, na lei tinoni tara nei, tara ghahara tana pungi. Tughunitatei vanira vaso na lei totobo rakeri, tara mua uto.
12 E vatei mamaagha na nighi kokokoe na lei totobo dika na lei vure tara mua taluutuni tara goni popoloi.
13 Mi tana bona na marara te mararara, vaho ge ra righikale utoi ivei te vaghai na dikani na lei totobo raini.
14 Na pukuna ivei te marara iga nimiu na marara ke, me ke talutatei didira na lei totobo te mua uto. Me vagha keri ke, ge ra bosa mara ghaghua na balu vure,
Rarai, ighoe to maturu,
tughuru oli mai tana mate,
ma Christ ke vahegho na marara.
Ghahaghita ta nina maana na Tarunga Tabu
15 Righitaonia ivei kau nea na maemaneana na volamiu. Bei vaghara gea arahei tara bule, hauva, kau taonighi na nilabudira rahei tara manaha vamua.
16 Kau gehegehe uto haia tana lei bona ni bongi, na pukuna subo na vure tara hahi tana lei bongi raini.
17 Kau bei gehegehe bule, ma kau tabotabo ge kau manahana na hava a Lord te liomiu nia ge kau gonighi.
18 Kau bei inuvighi gea na lei beti ni bulebule, na pukuna igeva ke dikalai na volamiu. Ma kau lubatia na Tarunga Tabu ge ke vonughighau me ke hulighau.
19 Ge ighau kau lingei na lei linge holouto mana lei linge tabu ighobumiu. Kau lingei na lei linge vania Lord tana tobamiu.
20 Mi ghau kau bosa ni holouto haia nia na lei totobo soko ta God na Mama, tana ahana dida Lord Jesus Christ.
Na tarai tana vola ni taulaghi
21 Kau talumurighau haia itamiu sopa heghemiu, na pukuna ighau tau nia kikinima Christ.
22 Ghau na lei vinekama taulaghi, kau tabotabo ge kau taonighi na hava na taumiu te lioni, te vagha tau nei vania na Lord.
23 Na pukuna na mane te taulaghi te loghoa na maana ivuvungana na tauna, vagha Christ te loghoa na maana ivuvungadira rana taluutuni tana holohoru. Gaira tara vaghara na hulina Christ, te lubatiolia na volana ge ke vavolara.
24 Vagha rana taluutuni tana holohoru tara kabu rurughu vania Christ, keri ke mi ghau na lei vinekama taulaghi, kau kabu rurughu vanira rana taumiu tana lei totobo soko.
25 Mi ghau na lei mane taulaghi kau dolovira na taumiu te vagha Christ te dolovira rana taluutuni ilokana na holohoru, me lubatiolia na volana vanira.
26 Christ te mate vanira, ge ke vatabura. Me ke vamarabura, nia na bosana God mana apo marabu tana vulitabu.
27 E gonia te vagha eni, na pukuna, tana bona ke ghoro kolura mai tana matana rana taluutuni, ke liodira ge kara vagha na vaivine taulaghi vaolu ke uto na reireina, me ke taho iga siki meto, pana garugata pa siki totobo hava te vaghai raini. Ma mughua ge, ara tabu mara maemane, me ke taho na paludira.
28 Me vagha ghua eni, na lei mane taulaghi kara dolovira taudira vagha tara dolovia na hulidira oli heghedira. Na pukuna na mane te dolovia tauna te vagha, te dolovia heghena.
29 Taho siki sakai ke nia sika na hulina heghena, mughua ge pali kutia me righitaoni utoa, vagha Christ te righitaoni utoa na hulina, aeni rana taluutuni ni holohoru.
30 Ighita rana lei baebase ni hulina.
31 Te vagha na Gegere Tabu te bosa,
Na mane ke sania tamana ma tinana
me ke sakaisonikolu ta tauna
me vaghara rogaira toro sakai vamua tana matana God.
32 Na totobo eni ke, na ghanaghana ilokana te viri ngangata, ma eni te talutatera Christ ma nina holohoru toro sakai vamua.
33 Mi nau ku ghoi bosa ghua, na mane te taulaghi ke dolovia na tauna te vagha te dolovia heghena, mana vinekama taulaghi ke talumavaa na tauna.