9
Na taba ni Vure Gibeon tara pegoa Joshua
1 Na lei vunaghi haba paleva bokona na beti Jodan tara rongovighi na lei totobo te kale. Na lei vunaghi haba na kemadira na Heth, Amor, Canaan, Periz, Hiv maia Jebus tara ghanara tana lei ghotu maia tana lei nanata me sara tana tahi Mediterranean, me holaa me va nia sara sarana na lei ghotu ni Lebanon.
2 Na lei vunaghi haba ini tara padapada koukolu gekara talukolura didira na lei malaghai ni veitotoghoni makara veitotoghoni kolura nina malaghai Joshua mana vure ni Israel.
3 Mi tana bona na vure ni Gibeon tara rongovia na hava te kalea i Jericho mi Ai,
4 gaira tara padapada gekara mai gonia na pego gekara bei matera gea. Gara nira vetena na balu itadira, gekara va padapada vania Joshua. Ra talui na luludadira ivuvungani didira na donkey na lei baeke haulaghi mana lei ghuighuli ni sheep na vatei dode wine tara tarosi mara goniutoi.
5 Ra nighi pupulu na tivi marosi, mara haharani na tuadira tara sukisuki kolui, maia na berete modiri me mamaha na ohodira.
6 Tana bona tara mai sara tana bona tara kabu iga rana Israel i Gilgal, ra bosa vania Joshua maia na lei mane ni Israel mara ghaghua, “E hau ngangatana komu tai butu mai ga, ge kai mai nongigho ma kai mai gonia na baubahu ni mabo kolugho.”
7 Mana lei mane ni Israel tara bosa tughu vanira na vure i Hiv, “?Ivei kai nea na ghilalamiu e dutu pe hau na komu tau mai ga? Me ke ghaghua iga ke, kai mua tangomana na goniana na baubahu ni mabo kolughau.”
8 Ma gaira tara bosa vania Joshua, “Ighai nimiu na tinoni ni lutu.”
Joshua te huatira me ghaghua, “?Ma hei sughua ighau? ?Mi vei tau butu mai?”
9 Ma gaira tara bosa tughu mara ghaghua, “Ighai tai butu hau ngangata mai, mai rongovia na ladana Yahweh, nimiu na God, mana hava te gonia tana butonikomu Egypt.
10 Mai rongovia ghua na hava te nea vanira rua na vunaghi haba uluna na beti Jordan, na vunaghi haba Sihon ni Heshbon ma Og, na vunaghi haba ni Bashan (te kabu i Ashtaroth).
11 Keri ge ra talu kokokoe vanighai na lei naghomami ma kulamami na vure ge kai gonidilai na balu oho ta nimami na mai righiamiu ge kai nimua na tinoni ni lutu vamua. Mai nongighau, gekau gonia na baubahu ni mabo kolughai, gekai tamakulani kolughau.
12 Na berete ini tara papara tai divei tana bingiti tai sania mai na komumami, mi taeni ra mamaha mara modiri tua.
13 Na lei ghuighuli ni sheep tai dodei nia na wine tara vaolu bona tai sania na komumami, mi taeni tau righighi ra haulaghi mara potapota tua. Ma sughua nimami na tivi, maia na hahara ni tuamami tara tarosi ta nimami va vinano mai.”
14 Mana lei mane naghodira na vure ni Israel tara mua diki talutate/huatia vania God, keri ge ra ghania na berete, na vaughilala tara holopangotira rana vure.
15 Ma Joshua te gere aha tana baubahu ni mabo, kolura na lei mane nagho ni Israel tara talamaghi mara holopangotia didira na baubahu.
16 Mana lei ghanaghana e tate murina tolu na bongi, na lei mane ni Gibeon ini te dutu so na komudira.
17 Mana vure ni Israel tara rughuhoru ma va kene taotaonia gaira va saravia na komudira e tolu vamua na bongi, mana lei aha ni komu raini Gibeon, Kephirah, Beeroth mi Kiriath-jearim.
18 Mara mua matera, na pukuna na lei mane nagho ni Israel tara diki gonia tua na baubahu itadira tana ahana Yahweh, na God ni Israel gekara mu matera makara mua gonia vanira siki totobo. Mana vure ni Israel tara nia ghuru varongo vania Joshua kolura nia na balu naghodira na vure ni Israel nia na baubahu te mava eni.
19 Mara na lei manenagho tara bosa mara ghaghua, “Ighita ta goni sokoa ta na baubahu te mava eni tana ahana Yahweh, dida na God geka mua matera.
20 Ka nera gekara vola, ke bei rutu vanighia gea God ka diu na baubahu ta gonia tana ahana.
21 Ka lubatira makara vola, hauva ka nera ge kara tagi ghai makara heo beti vanighita.
22 Ma Joshua te holora na lei tinoni ni Gibeon me ghaghua vanira, “Na hava na pukuna gau pegoghai? Au bosa ke, me hau ngangata na komumiu, au ghaghua! Hauva mau pego! E mua hau so na komumiu.
23 Ma God ke deteghau, na pukuna nimiu na pegopego, keri ke, mi geva ighau udolu nimami na seka, ma nimiu na lutu ke na tagi ghai maia na heo betina na Vale tapole tabu nina/dida na God.
24 Ma gaira tara bosa tughu vania Joshua, “Ai gonia na pego na pukuna ra bosa vanighai a Yahweh, nimiu na God, te bosaa vania nina tinoni ni lutu, Moses, geke haurakera me ke matera na lei tinoni tara ghanara. Mai mataghu mai nia ghaghua na volamami gai gonia sughua.
25 Mi taeni ke, tana limamiu/[nimiu na maana] tua tai sopou! Kau ne taonia vamua na hava tau ghanaghana te maemane kau nea vanighai.”
26 Ma Joshua te mua lubati rana vure ni Israel gekara matera.
27 Me nera geke didira na seka mana lutudira na tagi ghai mana heo ghadira na beti maia na betina nina bela ni sukaghi Yahweh. Mara gonia na lutu eni me sara mai so itaeni.