23
Jesus tara hola vania Pilate
(Matthew 27:1-2, 11-14; Mark 15:1-5; John 18:28-38)
Ma gaira udolu na ovu ni dete tara tughuru mara holaa Jesus vania Pilate, na vunaghi haba ni Rome te vunaghi pungisia na bubulo i Judea. Ma gaira tara vuivuni ni huruana, “Ighai tai ghilalaa na mane eni te hulihahira kulamami na vure, me bosa vanira ge kara bei sosoni rongo vania Caesar,* me bosa ghua ke, ma gaia heghena te Messiah, na vunaghi haba.”
Ma Pilate te huatia Jesus, “?Ighoe sughua didira na vunaghi haba na vure ni Jew?”
Ge bosa tughu Jesus; “Ighoe to bosaa.”
Keri ge bosa Pilate vanira rana lei manesukaghi kamanagho mana vuresubo, “Inau tu mua sodoa siki totobo te goni hahia na mane eni.”
Ma gaira tara laga vaa na hughuhughuana, “Nia nina tarai, gaia te vuivuni na gunalira rana vure i Judea talighu. Te vuivuni tua i Galilee, me mai sara iani taeni.”
Pilate te vetenaa Jesus vania Herod Antipas
Ma Pilate te rongovia eni, ge huatira, “?Na mane eni na tinoni ni bubulo i Galilee sughua?” Tana bona Pilate te rongovia Jesus te tinoni ni Galilee sughua, ge vetena tonaa vania Herod Antipas, na pukuna Galilee ilokana na kobena Herod, ma Herod i Jerusalem tana bona vaghana eni.
Ma Herod te togotogo sule ngangata te righia Jesus, na pukuna te diki rongovia tua na ladana, me avehia tua ge ke righi matana te hau mai tua. Me ghanaghanadila ge ke righia siki butuli ke gonia Jesus. Me subo na huahuati te huatighi Herod tatana Jesus, ma Jesus te mua hea siki bosatughu. 10 Ma rana manesukaghi kamanagho ma rana manetarai ni vetena nina Moses tara tughuru dato mai, mara gonighi vania na balu huhuru vahola Jesus. 11 Ge Herod ma rana nina malaghai tara koengelea mara batobatoa Jesus. Mara pupulua nia na tivi malebo te vagha na vunaghi haba, mara vetena olia vania Pilate. 12 Tana bongi keri vaho, ge ro vuivuni ni dolo kolu Pilate ma Herod, imurina toro kanahaghi mai tua.
Jesus tara detea ge ke mate
(Matthew 27:15-26; Mark 15:6-15; John 18:39—19:16)
13 Ma Pilate te holokolura mai rana manesukaghi kamanagho ma rana huhuli, ma rana vuresubo, 14 ge bosa vanira, “Ighau tau lavia vaniu mai na mane eni, mau bosa ke me gunalira na vure. Mi taeni inau tu huatia tua tana matamiu, mu mua sodoa siki hahi te dika tau hurua nia. 15 A Herod ghua, te mua sodoa siki totobo hahi tatana, keri ge vetena olia vanighita mai. Keri ke, me taho siki totobo dika te gonia na mane eni te manana na mate. 16 Ge ku ramusia vamua mu ku lubatia.” 17 
18 Mana ovu ni vuresubo tara ghaeghahe, “Labua! Lubatia vanighai a Barabbas.” 19 (Barabbas te ghaha ilokana na vale pipiti, na pukuna te gunalia na komu sule Jerusalem, maia te labumate tinoni.)
20 Ma Pilate te liona tua ge ke lubatia Jesus, ge ghoi nongira na vuresubo. 21 Ma gaira tara ghaeghahe oli vania, “Patokia! Patokia!”
22 Me toluni na bosa vaniadira na vure Pilate, “?Na hava na totobo dika vaghana te gonia Jesus? Inau tu mua sodoa siki totobo dika te gonia te manana na mate! Mu ku ramusia vamua ge ku lubatia.”
23 Ma gaira tara ghaeghahe sule ngangata ge kara patokia mughua Jesus, mara vuha nia tangomana. 24 Ge talana Pilate ge kara patokia Jesus taonia te vaghaa tara nongia itatana. 25 Me lubati horua tana vale pipiti vanira Barabbas, na mane tara liona, gaia te gunalia na komu me mate tinoni. Me hera Jesus ge kara nea vania na hava tara liona.
Jesus tara Patokia
(Matthew 27:32-44; Mark 15:21-32; John 19:17-27)
26 Ma rana malaghai tara huli tonaa Jesus, mana bona tara sakutua tona tara sodoa na mane ni Cyrene na ahana Simon, te vaho sakutua haghe mai Jerusalem. Ma rana malaghai tara kurutia ge ke hangaa Jesus, na holaana nina ghaivavala me ke tumuria. 27 Mana ovu ni vuresubo tara tumuria Jesus, kolura na balu vinekama tara tangi mara ngangaraha taonia. 28 Me ririuoli vanira Jesus ge bosa, “Ghau lei vaivine ni Jerusalem, kau bei tangihiu inau, kau tangihighau heghemiu maia lei dalemiu. 29 Na pukuna tana lei bongi ke mai, na vure kara bosa, ‘Ra uto sughua lei vaivine tara mua logho daledira, tara mua vahua tua siki gari, mara mua susua tua siki meomeo!’ 30 Mi tana bona keri na vure kara bosa vanira na lei ghotu sule, ‘Kau tumu savughai mai,’ ma vanira rana ghotu pile, ‘Kau parikuvighai!’ + 31 ?Ge na lei totobo te vaghai raini ke ba kale vaniu inau, na tinoni maemane ke, mi vei kea vanira rana tangohahi?”
32 Me rua na mane tangohahi ghua tara holara ge kara matera kolua nia Jesus. 33 Mara sara tana bona tara holoa nia ‘Na Savu ni Ulu,’ ge ra patokia igaa Jesus, maiara erua na tangohahi, sakai tana pala maulina, ma sakai tana madolona. 34 Ge bosa Jesus, “Mama, ko talukehai na paludira. Tara mua ghilalaa na hava tara gonia.” Gaira tara tuvalighi nina tivi vanira heghedira - tara nighi soni dice. + 35 Na vure igaa tara tughuru mara vaevanea, mana lei mane huhuli ni Jew tara batobatoa, “?Gaia te vavolara rana keha, sania me ke vavolaa heghena vaa ge ke gaia sughua na Messiah te vilia God?” +
36 Ma rana malaghai ghua tara batobatoa tara vaa itatana, mara hea na wine mali. + 37 Mara bosa vania, “Ighoe sughua na vunaghi haba didira rana Jew ke, mo ko vavolagho heghemu!” 38 Mi kouna na ghaivavala tara gerei na lei bosa raini, “Aeni na vunaghi haba didira rana Jew.”
39 Ma sakai tadira rana tangohahi toro sasarau kolua te bosa koehorua Jesus, “Ke vagha ko Christ ke, mo ko vavolagho heghemu, mi roghai ghua!”
40 Ma gaia sakai te rutu ge bosa, “?E ghua ge o mua nia kikinima God? Ighoe to lavia na totoro vaghaa ghua so te lavia gaia. 41 Mana totoro tara nea vanighita iroghita te manana ge kara neghita igaa, na pukuna na lei totobo dika toro gonighi mai tua, me taho siki totobo dika te gonia na mane eni!” 42 Ge bosa vania Jesus, “Ko ghanaghanau mai Jesus tana bona ko sopou tana malei haba ni vunaghi haba ta nimua na kinakabu!”
43 Jesus te bosatughu vania, “Inau tu baubahu vanigho, geva ko kabu kolu itagua i Paradise.”
Na mateana Jesus
(Matthew 27:45-56; Mark 15:33-41; John 19:28-30)
44 Me te dutu ni danikama, mana pungi te kuvihia na buto ni komu udolu me sara tana tangi tolu tana lighi ni aho 45 na pukuna na aho te mua marara. Mana vokovokona ilokana na Valetabu te tarosi ghobuna. + 46 Ma Jesus te nia ghaeghahe na manga sule, “Mama, tu lubatia na tarungagu tana limamu!” Me bosa sokoi ini, ge mate. +
47 Mana vunaghidira na malaghai ni Rome te righia na hava te kale, me holohabaa God nia na bosa eni, “E utuni tua, gaia na tinoni maemane sughua.” 48 Mana vure tara kokolu igaa tara righia na hava te kale, mara oli udolu tana komudira, tara tapoi na garodira nia na dikalio. 49 Ma gaira udolu tara ghilalaa utoa Jesus, kolura lei vinekama tara tumuria mai Galilee, tara tughuru hauvia mara vaevanea vaa. +
Na tavughiana Jesus
(Matthew 27:57-61; Mark 15:42-47; John 19:38-42)
50-51 Ma sakai na mane tara holoa nia Joseph, na mane ni Arimathea, sakai na komu i lokana na bubulo i Judea. Gaia na mane uto me te maemane, te pitua na maiana nina kinakabu God. Gaia sakai tadira rana ovu ni dete, hauvaa, me mua taonia na liona didira dete ghanaghana mana gehegehedira itatana Jesus. 52 Na mane eni te va righia Pilate me nongia na hulina Jesus. 53 Ge huihorua na hulina, me pulua nia na tivi malebo, ge talua tana beku ilokana na vatuluma tara ghelia tana vatu, mara mua talua mua igaa siki tinoni mate. 54 Mana bongi keri na bongi ge kara gonigonidila vania na Sabbath,§ te dutu ni vuivuni tua.
55 Mana lei vinekama tara tumuria Jesus mai Galilee tara saritaonia a Joseph mara va righia na vatuluma ni beku maia ivei tara nea na kolivaghiniana na hulina Jesus ilokana. 56 Keri ge ra oli tana valedira, mara gonidilai na lei ghaiuruuru mana beti uruuru vania na hulina Jesus. Soko ke, ge ra aheahe taonia na vetena tana Sabbath.+
* 23:2 Caesar na vunaghi haba ni Rome 23:17 Balu gegere tara talua na tete hangavulu vitu: Tana lei bona ni ghanaghana oliana na Lovovule Pilate te lubati horua sakai na tinoni tana vale pipiti vania. Hauvaa subo tara mua loghoa. Righia Mark 15:6 + 23:30 Hosea 10:8; Na Livu 6:16 23:34 Balu gegere tara mua talua, Ge bosa Jesus, ‘Mama, ko talukehai na paludira. Tara mua ghilalaa na hava tara gonia.’ + 23:34 Buka Linge 22:18 + 23:35 Buka Linge 22:7 + 23:36 Buka Linge 69:21 + 23:45 Buka Rughuhoru 26:31-33 + 23:46 Buka Linge 31:5 + 23:49 Luke 8:2-3 § 23:54 Sabbath bongi ni aheahe ni Jew tana Sarare. + 23:56 Buka Rughuhoru 20:10; Eruani Vetena 5:14