21
Jesus te dato vunaghi i Jerusalem
(Mark 11:1-11; Luke 19:28-40; John 12:12-19)
Ma Jesus ma nina lei vaovarongo tara dutuvia Jerusalem, gaira tara sara i Bethphage tana ghotu ni Olive. Ma Jesus te diki vetena ghidera erua nina vaovarongo me ghaghua vanira, “Koro tona tana komu palevaa mai, mi kakeri koro righi sodoa sakai na donkey* tara pitia iga kolua na dalena. Koro toghira mo koro lavira mai tagua. Ke vagha siki sakai ke huatighau ke, ‘?Na hava toro gonia?’ koro bosatughu vania, ‘Na vunaghi te liodira.’ Ma gaia ke lubati tatavahalera mai.” Aeni te kalea na hava na prophet idania te bosaa,
Kau tughunitatea vanira na vure tana komu sule Zion,
Kau righia, nimiu na vunaghi haba te mai vanighau.
Gaia te talumuri, me haehaghe vuvungana na donkey,
mana dalena. +
Mana vaovarongo toro tona moro goni taonia na hava Jesus te bosa vanira. Ma rogaira toro lavira na donkey mana dalena mai itatana, mara talui didira na pupulu daro vuvungadira, ma Jesus te haehaghe me sopou vuvungani didira na pupulu. Mana vuresubo tara haraa nia didira na pupulu daro na halautu, ma rana balu tara tokai na lei otooto ni ghai mara haraa nia ghua. Mana vuresubo tara ghidevia mara tumuria Jesus, tara ghaeghahe,
“Holoutoa na vaivarina David!§
God te vautoa gaia te mai tana ahana ma nina maana Lord God!
Holoutoa God i kokou!” +
10 Tana bona Jesus te vaa haghe i Jerusalem, na lei vure udolu tana komu tara haeharevo mara huahuatira, “?Ahei gaia eni?”
11 Mana vuresubo tara bosa tughu, “Aeni gaia na prophet, Jesus ni Nazareth tana bubulo i Galilee.”
Jesus te va haghe tana Valetabu
(Mark 11:15-19; Luke 19:45-48; John 2:13-22)
12 Mi murina eni Jesus te vaa haghe tana Valetabu me ghuruhoru sokora agaira tara pelupelu mara sabisabiri iga. Ma gaia te boki taovaghinighi na lei beladira tara tughu rongo, maia na lei malei sopoudira tara sabisabiri bola ni vatei sukaghi. 13 Ge bosa vanira, “Tana gegere tabu, God te bosaa, ‘Na Valegu te tabu ke, kau holoa nia na vale ni kokoeliulivuti.’ + Hauvaa, mi ghau tau nea ge didira na vatei polo na lei tinoni gito.” +
14 Rana rorodo maia rana labe tara mai tatana tana Valetabu me kisu utora. 15 Na lei manesukaghi kamanagho, mana lei manetarai ni vetena nina Moses tara rutu tana bona tara righighi na lei totobo haeharegha te gonighi, mana lei gari pile tara ghaeghahe ilokana na Valetabu, “Holoutoa na vaivarina David!” 16 Vaho ge gaira tara huatia Jesus, “?Rongo vakalea so na hava tara nia ghaeghahe?”
Jesus te bosa tughu, “Eo, inau tu rongovia so! Tau kokoe te vagha tau mua ghilala utoa na hava na gegere tabu te bosaa,
‘Ighoe to taraira na lei gari pile mana lei meomeo
ge kara holohabagho.’ ” +
17 Ma Jesus te sanira, me rughuhoru sania na komu sule, ge sara i Bethany me maturu iga.
Jesus te varangaa na ghai tara holoa nia na fig*
(Mark 11:12-14, 20-24)
18 Tana bona te pulohi tana komu sule tana roropo ghana, Jesus te vitolo. 19 Ma gaia te righia na ghai, tara holoa nia na fig lilighi ni halautu, me vaa lilighina, me vaevanea te taho iga siki vavanga, mana raurau vamua. Ma gaia te bosa vania na ghai, “Vuivuni taeni ighoe ko mua loghoa siki vavanga!” Mi tana bona keri na fig te sasagha tua.
20 Mana lei vaovarongo tara righia ge ra nia hare, mara huahuatia, “?Ivei tea ge mina sasagha vaso na fig eni?”
21 Ma Jesus te bosa tughu, “E utuni inau tu bosa vanighau, ahei ke taluutuni me ke mua ghanaghana ruarua ke, ma gaia ke tangomanaa so na goniana ghua na hava tu gonia inau tana fig eni. Ma mua gaia vamua eni, sughua kau bosa vania na ghotu eni, ‘ko ghadaru mo ko tona tana tahi,’ kau vania ke, me ke kale.+ 22 Ke vagha kau taluutunia God ke, mi ghau kau lavighi na lei totobo soko kau nongighi tana kokoeliulivuti.”
Na huatiana nina maana Jesus
(Mark 11:27-33; Luke 20:1-8)
23 Ma Jesus te oli mai tana Valetabu. Mi tana bona te tarai iga, na manesukaghi kamanagho ma rana huhuli ni Jew tara mai tatana mara huatia, “?Ahei te vahegho na maana eni ge ko gonighi na lei totobo raini?”
24 Me bosa tughu vanira Jesus, “Inau ku huatighau nia sakai na huahuati. Ke vagha kau vaheu na bosatughuna ke, mi nau ku bosaa vanighau igeva na maana tu loghoa ge u gonighi nia na lei totobo raini. 25 ?Ivei te lavia na maana John Vulitabu ge vulitabu? ?Te lavia ta God pi tana tinoni vamua?”
Gaira tara hughuhughu heghedira mara ghaghua, “?Na hava ka bosaa? Ke vagha ka bosa tughu, ‘Tatana God,’ ka ghaghua ke, ma gaia ke bosa tughu vanighita, ‘?Ivei tea, ge au mua taluutunia John?’ 26 Me vagha ka bosa, ‘Tatana na tinoni,’ ka ghaghua ke, mi ghita ta mataghu nia na hava na vuresubo kara gonia vanighita, na pukuna gaira tara taluutunia John na prophet.” 27 Vaho ge ra bosa tughu, “Ighai tai mua ghilala.”
Ma Jesus te bosa vanira, “Na pukuna eni, inau ku mua bosa vanighau ghua ivei tu lavia mai na maana ge u gonighi na lei totobo raini.”
Na bosa vavaghahadira erua na garimane
28 “?Na hava tau ghanaghana Itaeni? Na mane ga, te loghora erua dalena. Gaia te bosa vania na kamanagho me ghaghua, ‘Dale, taeni ko tona mo ko vaa lutu tana leghai ni wine!’
29 “Ma gaia te bosa tughu, ‘E mua liogu!’ Mi murina mai, agaia te tughua na liona me tona tana leghai.
30 “Ma tamadira te ghoi tona ta ruani na dalena, ge bosa vania so te vagha. Ma gaia na gari te bosa tughu, ‘Eo, tamagu,’ hauvaa me mua tona. 31 ?Ahei tadira te goni taonia na hava tamadira te liona?”
Gaira na vure tara bosa tughu, “Na kamanagho.”
Ma Jesus te bosa vanira, “E utuni inau tu bosa vanighau, ‘Rana hahi tara vaghara na lei vahikolu rongo mana lei rebi kara haghe tughughau tana kinakabuna God. 32 Ma John Vulitabu te mai ni tughunitateana vanighau na halautu maemane kau taonia, mi ghau tau mua taluutunia. Ma gaira na lei vahikolu rongo mana lei rebi tara taluutunia mara tughulio. Hauvaa, mi tana bona tau righighi raini ke, mi ghau tau mua tughui na liomiu ma kau taluutuni.” +
Na bosa vavaghahadira na lei tinoni righitaoni leghai
(Mark 12:1-12; Luke 20:9-19)
33 “Kau rongovia eruani na bosa vavaghaha! Na tinoni logho pari te subai nina vuavua tara holoi nia na grape ta nina leghai, me peo talighutia. Keri ge ghelia na gilu tana vatu na vatei bita wine, me kisua na vale ni vatogha. I murina, gaia te sodora balu na tinoni ge kara righitaonia nina leghai. Soko, ge tona tana kema keha. 34 Tana bona te sara na bongi ni vahikoluani na vavanga tara mada, vaho ge vetenara nina lei tinoni lutu ge kara vaa lavia na tunuvana gaia itadira rana tinoni righitaoni. 35 Mana lei tinoni righitaoni tara lotira nina lei tinoni lutu, na diki tara ramusia, eruani tara labumatea, me toluni tara petamatea.”
36 “Ma gaia te ghoi nira vetena na balu tinoni lutu, tara subo vulera tara diki tona, mana lei tinoni righitaoni tara gonia vanira so na hava tara gonia vanira na diki ovu. 37 Ge nia vetena sosoko na dalena. Te ghanaghana ke, ‘Agaira kara talumavaa na dalegu.’ 38 Hauvaa, mi tana bona na lei tinoni righitaoni leghai tara righia na dalena, gaira tara bosa heghedira, ‘Aeni na puku ni dalena na tinoni te loghoa na leghai. Ka labumatea, ge ka loghoi nina lologho!’ 39 Ma gaira tara lotia, mara sonikeha tana leghai, ge ra labumatea.”
40 Soko vaho ge, a Jesus te huatira na lei manesukaghi kamanagho ma rana huhuli ni Jew, “?Mi tana bona ke mai na tinoni te loghoa na leghai ke, na hava ke gonia vanira na lei tinoni righitaoni?”
41 Ma gaira tara bosa tughu, “Agaia ke labumatera na lei tinoni dika, me ke vahera na leghai na lei tinoni keha kara righitaonia. Gaira kara nia hevei na tunuvana tana puku ni bonani.”
42 Ma Jesus te bosa vanira, “Ighau tau idumia tua na gegere tabu te ghaghua,
‘Na vatu ngasi tara ngelea na lei tinoni kisu vale,
itaeni te liliu ni puku ni vatu.
Aeni nina lutu Lord God,
te haeharegha na vaevaneana.’ +
43 “Na pukuna eni inau tu bosa vanighau, God ke lavikeha tamiu na kinakabuna me ke vahera na lei kema tara taonia na hava God te liona, te vagha na ghai te nia hevei na vavanga te uto. 44 Gaira udolu kara nia saisarikiba ma kara nia torotopo na vatu ngasi keri, ke vahaghitaili ngangatara. Ma ge ke tumu savua siki sakai ke, gevaa ke marutaa.” 45 Na lei manesukaghi kamanagho mana lei Pharisee tara rongovia Jesus te bosai rana bosa vavaghaha raini, ge ra ghilalaa, gaia te bosara. 46 Ma gaira tara tabotabo ge kara lotia, hauvaa mara mua lotia mua, na pukuna tara mataghunira na vuresubo, na pukuna na vuresubo tara ghilalaa Jesus na prophet.
* 21:2 donkey na maumanu te vagha na horse. 21:5 Zion erua na ahana vania na komu sule Jerusalem. + 21:5 Zechariah 9:9; Isaiah 62:11 21:9 Holoutoa tana leu ni Jew Hosanna, na ghanaghana ilokana, ‘Vavolaghai itaeni.’ § 21:9 vaivarina David erua ahana vania na Christ + 21:9 Buka Linge 118:25-26 + 21:13 Isaiah 56:7 + 21:13 Jeremiah 7:11 + 21:16 Buka Linge 8:2 * 21:17 na fig Sakai na ghai te vagha na ghai kaio. 21:19 Jesus te varanga na fig te vagha na vaughilala itadira tana na totoro te dutu mai - righia Jeremiah 5:17. + 21:21 Matthew 17:20; 1 Corinthians 13:2 + 21:32 Luke 3:12; 7:29-30 21:33 na grape ta nina leghai na leghai ni grape na vaughilala te vaghara rana vure Jew - righia Isaiah 5:1-7 + 21:42 Buka Linge 118:22-23