10
Aghe, Lord, e ghua ge o sakai tughuru saghau?
Me ghua ge o polo tana bona inau tu liomu ngangata?
Na vure talu nagho mana tangohahi
tara liona ge kara vunaghidira ma kara dikalara na bona.
Lubatira ge kara hogho tana dika tara gonidila vanira rana keha.
Ma gaira tara talutatei mai didira na lei lio dika;
mara holoutora tara lologho au.
Mara holoa mai na dika ivuvungana Lord.
Na vure tangohahi raini ke,
tara nia talunagho ngangata na kene tana God.
Na pukuna didira na ghanaghana gaira ke, ma God te mate.
A gaira tara tangomana tana lei totobo tara gonighi.
Mara mua righia nimua na totoro te pitu dilara tua.
Mara kialaghi, talutatea didira na batobato
ivuvungadira na ghadira na levunimate.
Gaira tara bosa vanira heghedira mara ghaghua,
“Taho siki totobo ke dika ke kaleghita!
Ighita ka tatavahale tana lei vahola ke va me va.
Na mangadira te vonughia na dika, sorisori mana bosa dikala ara hei.
Na vahola mana dika te sopou tana kouni na lapidira.
A gaira tara koli polo tana pungi ighobuni na lei vale,
ge kara labura ga na lei tinoni mahebo
tana bona kara mai tona haliu.
Na lutudira haia na keneadira na balu tinoni mahebo
ge kara vahaghitailira.
Vaghara na lei lion tara tao beto pitura na lei tinoni mahebo
ge kara soghavira.
Vagha ghua na lei tinoni tara hili ge kara tana vugho.
10 Na lei tinoni mahebo tara mate tua tana bona tara labura mara parikuvira:
agaira tara kutu horu i sarana na lagadira na lei tinoni tangohahi.
11 Na lei tinoni tangohahi tara bosa heghedira mara nigua God
ke mua tangomana na vaovatogha!
Me ke mua ghoi tangomana ghua na ghilalaana.
12 Tughuru dato, Aghe Lord!
Mo ko torora rana tangohahi, “Aghe God!”
mo ko bei nira ponolio na lei tinoni mahebo.
13 E ghua ge na lei tinoni tangohahi
tara tona keha nia na bosa dikalaana God?
Ivei tara nea na ghanaghanaana,
“God ke mua ghoi tangomana na holoada tana ghanaghana eni?
14 Mo ko righia na vahola mana vahaghitaili tara gonia.
Ko righi kalea eni, mo ko torora.
Mana lei tinoni mahebo tara talua didira na ghanaghana kodo itamua.
Mi ghoe didira na pilupilu na lei meomeo.
15 Ko gotighi na limadira rana tangohahi ini, na vure dika!
Ko tumurira, kokoekobe na sosoko itadira ko havukaghinia!
16 Ma Lord Ke vunaghi ke va me va!
Lubatira ra hei tara holohabai na lei God Keha
ge kara tona keha tana pari.
17 Lord, Ighoe to ghilalai didira na ghanaghana dila rana tinoni bona.
E utuni Ighoe ko tangomana na rongoviani
didira na tangi mo ko togholuvura.
18 Ighoe to lavia vanira na maemane rana lei meomeo mate sasani,
mana vahaghitaili tona haliu vanira rana tangohahi:
ge na lei tinoni ke mua hau ma kara mua mataghunira.