101
Na linge nina David
Lord, nigua na linge ni kabu sasara mana utuni,
Mi nau tu lingea vanigho gatu.
Na nilabugu ke mua palugha.
Mi ngiha vaho ko mai tagua.
Inau ku kabu marabu tana valegu.
Ku mua talana na dika ge ke mai tagua,
mu ku nighi sika na gehegehedira tara ririu keha vania God,
ku mua ghai haidu olu tua itadira.
Inau ku mua taonia na volapego,
mu ku mua haidu kolura na vure dika.
Inau ku lavi kehaa a hei te bosadika,
polopoloa na ahana siki sakai,
mu ku tiva kehaa gaia te magharo me talunagho.
Inau tu holoutora gaira tara lutu utuni vania God,
mu taladira ge kara ghanara lokana na valegu.
Gaira te utuni haliu na voladira,
tu taladira ge kara ghairau vaniu.
Gaia te sorisori ke mua ghanaa lokana na valegu,
ma gaia te pego ke mua kabu i lilighigu.
Inau ku durakera tughu bongi rana dika lokana na bonada,
mu ku tivara rana tangohahi tana komuna a Lord.