132
Na linge ni tona dato
tana lei nina vahaghitaili David,
Lord ko ghanaghana olia.
Gaia te lavia na baubahu tana matana Lord,
me hola na bosa ni papari itatana siki sakai te laga vule Israel.
Inau ku tona keha tana valegu,
mu ku mua ahevata iga.
Inau ku mua maturuhighi na matagu,
pana vauvahu ni matagu ge kara maturu mate.
Polo ku topoa na bona ku kisua ga na vale vania Lord,
na beala ni ahevata vania siki sakai te laga vule Israel.
Ighai tai rongovia na vaevale baubahu tabu,
te ghaha Ephrathah, mai vahu sodoa tana bona sagau,
pari bebetena i Jaar.
Mai ghita ka tona tana bona ni valena Lord,
ma ka kikinima vania ga tana matana.
Tapatughuru, Ghe Lord, mo ko haghevia na bonamu te tabu,
kolua na Bokisi ni Vetena ni Baubahu tabu,
te vaughilala nimua na maana.
Nimua na mane sukaghi kara hola tughua
nimua na maana ni vola,
Ma nimua tinoni lutu kara tughuru kehai,
kara nia linge na togotogo.
10 Na pukuna nimua na tinoni lutu David,
ko bei koengelea gea na vunaghi
to vilia tua vanira nimua na vure.
11 Gaia Lord te papari vania David,
ge ke mua laviolia nina bosa baubahu.
Inau ku talua a sakai tadira,
na vavatamu tana malei sopoumu.
12 Ke vagha na vavatamu kara taonia nigua na bosa baubahu,
Ma kara kabu taonia na vetena tu taraira nia ke,
mana vavatamu ke mua soko.
13 Gaia Lord heghena tua te vilia Jerusalem,
te ghanaghana dila ge ke puku ni komuna.
14 Ge bosa, aeni na puku ni komugu,
igaa ku ghaha kasilau,
mu ku ghahau igaa na komu tu vilia tua.
15 Inau ku nea na komu eni ge ke halilaghi,
ge na lei tinoni bona kara nia mahu na vanga.
16 Inau ku nera na puku ni soni sukaghi
ge kara hola tughua na mana ni vola,
ge na lei nina vure God kara nia linge na togotogo.
17 Inau ku savungia nina maana David,
Ge nigua na siusiu va, ge ke marara nigua na vure.
18 Inau ku pupulura na ghana levunimate nia na maa,
ma gaia ke vunaghi rongoragha.