145
Na linge ni holouto. Nina David.
1 Inau tu holohabagho, ighoe nigua na God mana vunaghi,
mu ku bosa utoa na ahamu ke va me va.
2 Inau ku bosa utoa na ahamu tana lei bongi soko,
mu ku holohabagho haia.
3 Gaia Lord te haba,
e ulaghana sughua ge ka hea na holohaba,
ka mua bosa kakalea nina malei haba.
4 Tana lei vavata, na lei dalemu
kara tughunitatea na gehegehemu te manana.
5 Inau ku kene ghanaghanani nimua na lei butuli te haeharegha,
ma nimua na maana ni rongoragha te uto lee.
6 Na lei lapi kana tughuni horui nimua na malei haba.
Inau ku bosa tatei na lei gehegehemu te mamataghugha.
7 Na lei tinoni soko kara nia sakai sonikolu nimua na uto
te haeharegha kara lingea nimua na togotogo nia na rivurivu.
8 Gaia Lord te dolo mete veiarovi,
kiki mua me rutu, hauva te vonughia na dolo te mua soko.
9 Gaia Lord te lio uto vanira na lei tinoni soko,
me kovala horua mai nina veiarovi vuvungani nina lei totobo gogoni.
10 Nimua na lei lutu kara holoutogho nia Lord,
Ma nimua na lei taba kara bosautogho ighoe.
11 Lord, gaira kara tughunitatea na ladana nimua na kinakabu,
kara nia rivurivu nimua nilabu mana maana.
12 Ma kara bosa tatea ghua na gehegehemu te uto lee,
te nia rongorongo nimua na vatogha.
13 Nimua na kinakabu, na kinakabu kasila,
ma nimua na maana ni vatogha te ghaha haia tana lei vavata.
Gaia Lord te pungotighi haia nina baubahu te uto mate tana lei gehegehena.
14 Gaia Lord te tabe ghalaghara tara tumu,
me tughuru vaghinira te mavatira didira na hohola.
15 Na matadira soko tara pitugho ighoe,
ge ko hangara, mo vahera na ghadira vanga tana bona te liodira.
16 Tana bona to vurehighi na limamu,
ighoe ko vaa togholuvuna tara vitolo,
mana mamangaha, nia na lei totobo vola.
17 Gaia Lord te maemane tana lei gehegehena soko,
te vonughia na dolo
18 Gaia Lord te dutuvira tara holoa,
Eo, agaira tara holo utunia.
19 Gaia te goni kale utunighi na ghanaghanadira tara nia kikinima,
me varongohighi didira ngangaraha me volara.
20 Gaia Lord te pilupungisira gaira tara dolovia,
me taghalaghinira tana lutu dika.
21 Inau ku holohaba Lord,
mana lei tinoni tana maramana,
kara bosa utoa na ahana.