148
1 Holoutoa a Lord.
Holoutoa na Lord tana parako,
holoutoa gaia tana lei bona kokou.
2 Holoutoa, ighau rana angel,
holoutoa, ighau nina tarunga i kokou.
3 Holoutoa, iroghau na hina mana vula,
holoutoa, ighau na lei vei tughu.
4 Holoutoa, ighau na lei puku ni parako i kokou,
holoutoa ghua, ighau na lei beti tana parako.
5 Lubatira ge kara holohaba na ahana Lord,
na pukuna gaia te bosa, ma kara [nia] gonia tua.
6 Te talura tana bonadira,
ma kara kabu tatana kasila.
Te bosa papara vanira,
mara taonia haia.
7 Holohaba a Lord tana maramana,
ighau na lei maumanu tana tahi, mana tahi lalo,
8 Na viviha mana lake mana uha ice pile [bololo ngasi bihi]
mana koburu, mana ghuri mana oka tara taonia na liona.
9 Ighau na lei ghotu sule mana lei ghotu pile,
ma lei ghai ghania mana lei tabalolo,
10 na lei maumanu asi, mana lei bolo, mana lei poli mana lei manu soko,
11 Na lei vunaghi ni maramana, mana lei tinoni soko,
gaira tara vaovatogha maia na lei tinoni dete,
12 Garimane mana tahula,
mana lei tonikama, mana lei gari pile,
13 Ighau udolu kau holohaba na ahana Lord,
na pukuna na ahana te mava lee.
Nina rongoragha te haba vuvungana na parako mana pari.
14 Gaia te gonira nina vure, me va hera na laga,
ghau nina vure God kau talu haba gaia.
Ighau nina vure Israel, tau paleva.
Holohaba Lord!