30
Linge ni Tabuana na Valetabu
1 Mi nau tu nigho kikinima Lord,
na pukuna to ghate datou,
mo mua lubatira na ghagua na levunimate ge kara laga vuleu.
2 Ma Lord nigua na God,
Inau tu tangi vanigho ge ko hangau,
mo vuha kisu volau so.
3 Ma Lord te lavi olia na tarungagu mai i betidalo
me righi tao niu so ge u mua tumu haghe ilokana.
4 Kau linge vania Lord, ighau nina tabu,
Kau holoutoa na ahana te tabu.
5 Te mua daro ni bona nina rutu,
ma nina dolo te tona haliu haia so,
mana dikalio ke soko buto
mana togotogo ke sivuragha tana dani vaolu.
6 Inau tu pukulaghi ni utoa mai tua keri ge u bosa
mu ghaghua, ke mua ghoi laga vuleu tua siki sakai
7 Ighoe Lord to uto vaniu
mo pilupilu nia na ghotu,
mo polo vaniu ge u mataghu.
8 Ma keri ge u hoholo ghe Lord,
ge u kokoeliulivuti vanigho gatu, mu ghaghua,
9 Na hava na uto ke gonia vanigho
na ghabugu tana bona ke horu i betidalo?
Ke tangomana so na pughu ni pari
ge ke holoutogho me ke bosaa to utuni.
10 Ko rongoviu ghe Lord, mo ko aroviu,
Ighoe na hahanga vaniu.
11 To liliua nigua na dikalio me togotogo
mo tughua nigua na lio ni roku me togotogo
12 Me vagha keri ge na lei tinoni kara holohaba na ahamu
ma kara bei beto gea.
Ighoe nigua na Lord ma God,
Inau ku holoutogho haia ke vei ma va.