36
Nina Gehegehe Dika na Tinoni: Nina Gehegehe Uto God.
1 Na pulu te vaevare lokana haia te tangotangodika:
me rorodo na matana ge mua nia kikinima God.
2 Ra ghanaghana God ke liouto vanira so tana palu tara gonighi;
Mara vaevane olia ivei te vagha na dika ia tara nei.
3 Na hava tua tara bosai nia na mangadira te dika, me vonughia na sori:
ra mua liona ge kara uto ma kara gonia na totobo te maemane.
4 Na dika vamua te mai tana liona te koli te bongi tana ghimena,
E talu haghea heghena tana dika,
me mua nia sika na tangotangodika.
5 Lord, nimua na dolo te hagalo topoa na kokou
ma nimua na utuni te saravia na parako.
6 Nimua na uto te datogha vagha na ghotu,
nimua na dete te horugha vagha na horara
mo volara na tinoni mana maumanu sakai na vata vamua.
7 Vei vaho te vagha na utouto na nimua na dolo eni Lord,
na lei dale tinoni tara mai ungaunga sarani ghatamu.
8 Kara nighi mahu na lei vanga tana valemu
mo lubatira ge kara inuvia na beti ni togotogo
9 Ighoe na vuravura ni beti ni vola:
mana bulu ge kai vaevanea na marara.
10 Ko kovala horua nimua na dolo i vuvungadira tara dolovigho:
Ma nimua na dete itadira te marabu na tabadira.
11 Ko bei lubatia na tuadira na lei tinoni talunagho ge ku nia saisarikiba,
ma rana dika kara bei pili koliliu gea.
12 Ma gaira tara tangotangodika tara kutu horu,
ra soni horu va ma kara mua tangomana na ghoi tughuru dato.