39
1 Inau tu bosa:
Ku ngasilia na lei nilabugu:
Mu ku bei nia palugha gea na lapigu.
Inau tu betoa na mangagu:
tana bona tara kabu koluu rana tangohahi.
2 Inau tu betoa na ghidugu:
Mu mua bosa siki totobo:
Mu kabu beto vamua:
vagha ghua tana bosani na lei bosa te uto:
Na pukuna te vahaghitailigha me vatei sikagha tagua
3 Na lokagu te papara:
mu ghanaghana na lake te vavu:
ma vaho ge u nia kokoe na lapigu.
4 Lord: Ko neu ge ku ghilalaa na sosokona na volagu:
mana suboni ghua na lei bongigu:
ma ge ku pukulaghini utoi ke vagha ku vola.
5 Righia, to nea na lei bongigu ke vagha vamua na darona na lima:
mana lei niulugu te totobo lee vamua itamua:
me utuni sughua na vola ni tinoni na ghuri lee vamua.
6 Na tinoni te ole vamua te vagha na nunu lee,
me mangolia heghena nia na lutu laga:
me baore aua nina sodo rongo,
me mua ghilalai ahei ke loghoi.
7 Mi taeni Lord: na hava ge u ghanaghana dila:
E utuni nigua na ghanaghana dila tamua.
8 Ko vavolau ta nigua na lei hahi,
mo ko bei lubatira tara bule ge kara kia haghiniu.
9 Inau tu vuha laghu,
mu mua vukesia na mangagu,
na pukuna ighoe to neu.
10 Ko lavi keha itagua nimua na tatapo ni limamu,
na tatapo ni limamu te neu ge ku mua nea na hava te dika
11 Tana bona ighoe to nea na bosa ngarangara
te toroa na tinoni palugha,
ma au dikalai na lei totobo te dolovighi.
me utuni sughua na tinoni ke na ghuri lee vamua
12 Ko rongovia nigua na kokoeliulivuti, Ghe Lord,
Mo ko rongovia nigua na tangi vaniamu:
mo ko bei ririu keha ta nigua na kara kolobu:
na pukuna tu ghahau pile bona vamua itamua: (check meaning)
na sinogho haghe mai vaghara na lei kukuagu.
13 Ko lubati pileu ghua
ge ku ghoi kiakia me ke maheboa ghua na lagagu,
vaho ge ku tona.