56
Vania na tinoni gehe linge, nina linge David, taonia tana bona rana lei Philistia tara kene taonia i Gath. Kara linge taonia na tangina na bola tana ghai, tana bona sagau.
1 A ghe God, Ko aroviu
na lei ovu ni kisumate tara levunimate vaniu
tara lutu ngangatau
Hei ghagua na kana tara gunaliu na dani udolu.
2 Ra lei ghagua na levunimate tara bosa horu inau haia
ma subo tara gunali tabou tana didira na talunagho.
3 Mi tana bona te torou na mataghu,
Inau tu talua nigua na ghanaghana kodo itamua.
4 Aghe God, Inau tu holoutoa na hava to bosaa.
Inau tu ghanaghana kodo itatana God,
me ghua ge ku ghoi mataghu?
Na hava ku tangomana ge ke gonia vaniu na tinoni lee?
5 Gaira tara riukaghinighi haia na hava tu bosai
tana lei bongidira tara padalaghinighi na lei halautu ni vahaghitailiagu.
6 Gaira tara mai sakai sonikolu ge kara vaevane popolou,
vaevane taotaoniani na lei sakusaku tuagu,
tara liona ngangata na mateagu.
7 Ko bei lubatira ge kara nia tona keha
kolua didira na gehegehe te dika.
Mi ta nimua na rutu papara, Ghe God, ko nira rabo horu tana pari.
8 Ighoe to mata reireighi na lei nigua na dikalio.
Ighoe to vahikolui na lei kolobu ni matagu ilokana nimua na vauvaghu.
Ighoe to gegere horu sopasopai ta nimua na buka.
9 Mi tana dani ia ku hologho ge ko hangau,
na lei ghagua na kana kara liliu ni doloviagu.
Aeni tu ghilalaa: God te levu ni pala vaniu.
10 Ghe God, Inau tu holoutoa na bosamu:
Eo, a Lord, inau tu holoutoa na bosamu.
11 Inau tu ghanaghana kodo itatana God
me ghua ge ku ghoi mataghu?
na hava ke tangomana ge ke gonia vaniu na tinoni lee?
12 Inau ku vakalei nigua na lei baubahu vanigho ghe God,
Mu ku nia hevei vanigho na sukaghi ni holoutoa taonia nimua na hahanga.
13 Nia ighoe to vavolau tana mate;
to righitaonighi rana tuagu tana turi madali.
Mi taeni Inau ku sakusaku tua i nagho ni matamu, ghe God.
I lokana nimua na marara te hevea na vola.