61
Vania na tinoni gehelinge: Na lingena David, linge kolua na lei ghalo ni gougonu.
Ko varongohia nigua na tangi, Ge a God!
Rongovia nigua na kokoeliulivuti!
I tatana na lei sosokona na maramana,
Inau ku tangi vanigho nia na hahanga,
Na vahaghitaili te au vulea na tobagu,
ko huliu vaa ta nimua na baravatu te datogha na vatei pilupungisi.
Nia ighoe, a nigua na bona ni polo mana pilupungisi,
Na puku ni bona ni polo kara mua tangomana na sodoagu iga na lei ghagua na kana.
Lubatiu ge ke kabu kasila tana bonamu te tabu.
Ge ku polo i sarana na ungaunga ni ghatamu!
Ighoe to rongovighi na lei nigua na baubahu vahola, Ghe God.
Ighoe to va heu na lologhotughu to talu dilai
vania ara hei tara nia kikinima na ahamu.
Ko nia na volana na vunaghi haba
ge ke saravighi ke subo na niulu!
Ge mana lei niuluna kara totolo tana lei vavata!
Ge me ke huhuli i sarana nina na pilupungisi a God ke va me vaa.
Ko tuhua nimua na dolo te mua soko buto mana taluutuni ngasi kara mata reireia.
Keri ge ku talu habaa haia tana linge na ahamu
ke vaghaa ku nia na taoniani a nigua na lei baubahu vahola tana lei bongi soko.