63
Na linge ni David, te gerea tana bona te kabu tana bona mamaha ni Judea.
1 Aghe a God, Ighoe ke a nigua na God;
Inau tu kene ngangatagho.
Na tarungagu te nigho hanga inu,
Na huligu te udolu te nigho ghaghua ngangata
tana bona mamaha eni
te taho iga na beti mana ghai.
2 Inau tu righigho tana bonamu te tabu
mu taholaa gatu na ladamu mana rongoraghamu.
3 A nimua na dolo te mua sosokogha
te uto itagua vulea na vola heghena:
Ivei tu nia na holohabamu!
4 Inau ku talumavagho tana lei bongi ni volagu udolu,
mu hau datoi vanigho rana limagu ta nigua na kokoeliulivuti.
5 Ighoe to togotogoa na volagu vulea na lologho au tana vanga ghania.
Inau ku holohabagho nia na lei linge ni togotogo.
6 Inau tu ghanaghanagho tana bona tu maturu,
tana bona tu koli tana ghimegu.
Ku kabu hodo ma ghanaghanagho tana bongi udolu.
7 Inau tu ghanaghanaa taonia ivei to nia na hangagu:
Inau u nia linge na togotogo tana ungaunga ni rana ghatamu to nighi pilupungisi.
8 Inau tu tumurigho;
Na lima madolomu te tabe ngasiliu utou.
9 A gaira tara padalaghi ni haurakeagu kara luvu parihai.
Kara ponulu horu tana lalo sara ni pari.
10 A gaira kara nia mate na isi,
ma kara liliu ni ghadira na vanga na lei maumanu.
11 Hauva ka, mana vunaghi haba ke rivurivu itatana God.
A gaira udolu tara ghanaghana taluutunia kara holohaba,
Marana sorisori kara kabu hodo.