69
Vania na tinoni gehe linge: nina linge David, linge taonia na tangi ni hinuluna, “Lei pulaoa.”
1 Ghe God, ko vavolau, na beti ni ghaghari te saravia tua na Inau.
2 Inau tu kiki mua mu belulu horu tana bona te maluate lee,
u mua tangomana na kene sodoana siki totobo ku tuturi kauha iga.
Inau tana tahi lalo, mana tavena na beti te kuvihiu.
3 Na tangi ngangaraha ni hahanga te nia kukulu ni ghurigu;
na sosoniagu te mamaha ma ka rago kolu.
Rana matagu tara nia tabu na tangi ni dikalio,
na pukuna nigua na God ge ke hangau.
4 Agaira tara niu ghighirou tabo tana subo au vulei na lei vuvulu ni ulugu.
na lei ghagua na kana raeni tara kene taoniu ge kara haurakeu tara goni tabei.
A gaira tara gunaliu nia na sorisori,
tara nongia na lavi oliana na hava tu mua gitoa.
5 Ghe God, ighoe to ghilala tua ivei te vaghaa na bulegu;
kara mua tangomana na polo itatana matamu na lei palugu.
6 Ko bei lubatira agaira tara talu mavagho ge kara saisari kiba
na pukuna Inau, Ighoe, Lord, puku ni maana, te haba.
Ko bei lubatiu ge ku gonia vanira siki totobo
ge kara vatei maamaagha, Ghe God ni Israel.
7 Inau tara lavi buleagu mara lavi maamaagu nia,
na pukuna Ighoe tana reireigu na gegerena na kabu rurughu iga.
8 Hughua na lei puku ni hoghogu
tara vaghara tara mua ghilalau,
E vaghau na tinoni komu keha tara nia na paheagu.
9 Na nilabu ni valemu te vavu tana lokagu;
vaghaa keri ke, agaira tara bosa dikalagho ighoe ke
tara bosa dikalau ghua Inau.
10 Ara batobatou tana bona tu dikalio
mu maturu toro tana matana a Lord.
11 Tana bona tu nia pupulu na pupulu ni roku
ge ku talutatea nigua na dikalio, agaira tara batobatou.
12 Na lei vure ni komu ni vure tara niu tutugu,
mara lingea na lingegu agaira udolu tara Inu bulebule.
13 Hauva ka, mi nau tu tona haliu so
ta nigua na kokoeliulivuti vaniamu, Ghe Lord,
Tu ghanaghana dila ge na bona ni aho eni tua
ko tatea vaniu nimua na kulakulagha tana hahanga.
Ghe God, ta nimua na dolo te mua soko buto,
tughu vaniu mai ta nigua na kokoeliulivuti
ta nimua na hahanga ni togholuvu.
14 Ko hola kehau tana nenepa;
ko bei lubatiu ge ku ghoi lulumi horu ghua!
vavolau itadira tara nia ghighirou,
mo ko holo kehau tana lei beti lalo.
15 Ko ba lubatia na tave ni beti ge ke luvuhiu,
pa kara sonomiu gea na lei beti lalo,
mana taripiti ni mate ke taghalaghiniu.
16 Ighoe Lord, ko bosa tughuni na lei nigua na kokoeliulivuti,
nia nimua na dolo te mua soko buto te utoutoa lee.
Ko ririu mai mo ko righitaoniu,
nia nimua na veiarovi tara subo au vule lee.
17 Ko bei polo vania nimua na ghairau;
ko mina mo ko bosa tughu vaniu,
Inau tana gunaguna sule ngangata.
18 Mai mo ko vavolau;
ko niu ge ku tatavahale itadira na lei ghagua na kana.
19 Na lei kokoe batobato tu lagavulei to ghilalai tua ighoe,
na kabu rurughu mana vatei maamaagha.
Ighoe to righi kaekalera tua na lei ghagua na levunimate,
mo ghilalai na hava tara kokoei.
20 Na tobagu te kurusu na pukuna didira na lei kokoe horu,
mu mua loghoa siki ghanaghana dila.
Ghe a sakai na vaovarongo ni tinoni ke tatei na balu veiarovi;
ge a sakai vamua na tinoni ke ririu pulohi me ke togholuvuu.
21 Hauva ka, mara heu na vanga te mali;
mara haua vaniu na wine mali ge ke va uto pilea nigua na mangahau.
22 Ge na bela ni vanga tara subo au vule te gonidila vanira
tana matadira ke liliu ni taripiti ni tinoni.
Ma didira na tinoni ni righitaoni ke ghoi liliu ni taripiti.
23 Ko rorodoi na lei matadira
ge kara bei nighi vaevane mo ko nira kara lugu.
24 Kovala horua mai nimua na rutu i vuvungadira,
ko ghani taghalaghinira nia nimua na rutu papara.
25 Ko nia na komudira ge ke Olina
mana lei vaevaledira kara kokoba.
26 Vanira agaira to hera tua na totoro,
agaira tara ghoi savungighi nia so
na lei kokoe horu tana sosokona,
ara nia batobato na vahaghitaili te kalera agaira to nira ghighirou.
27 Ko vahikolui na lei paludira me ke dato na ovu ni,
mo ko bei va hera gea na tatavahale.
28 Ko durakei na ahadira tana buka ni vola,
ko bei taladira ge kara idumi kolura itadira tara kabu marabu.
29 Inau tu kale totoro mu vahaghitaili,
ko vavolau, Ghe God, nia nimua na maana ni vavola.
30 Ghe Inau ku holoutoa na ahana God, nia na linge,
mu ku talu habaa gaia nia na holoutoana.
31 Nia te vagha keri, Inau ku holoutoa a Lord,
vulea na niana sukaghi na dalei buluka
pana niana hevei na buluka
te kalagha me base na ghughuna.
32 Agaira tara talumurira kara vaevanea a Lord,
ta didira na lutu ma kara nia togotogo.
A gaira udolu tara kakaea nina na hahanga God
kara kabu tana togotogo.
33 A Lord te rongovighi datoi
didira na lei kokoeliulivuti
agaira ra nia tara liona na hahanga
e mua tiba kehara ra nina tara vahaghi tadira.
34 Kau holoutoa agaira,
Ghe na kokou mana maramana i pari iani pari
na lei tahi mana lei totobo soko tana gharasu ilokana.
35 A God ke vavola Jerusalem
me ke kisu olighi na komu ni Judea.
I kakeri ku kabu iga nina na lei vure
ma kara vunaghi pungisiu na bona mana pari.
36 Na lei vaivarira agaira tara taonia
agaira kara logho tughua na bona mana pari
Maia ghua tara dolovia agaira kara kabu uto iga.