7
1 Inau tu mai tamua ghe Lord, nigua na God; ge ko pilupilu.
Vavolau itadira tara kisua ghagua na mate.
Mo ko lavi kehau.
2 Ma ge toko mua Lavi kehau ke,
ma gaira kara dikalau te vagha na lion:
sagiu ma kara pilepileu.
Me taho siki sakai ke lavikehau.
3 Ghe Lord nigua na God, ge inau ku gonia na hahi,
pe inau ku tangotangodika taonia te mua maemane.
4 Ma ge inau ku peroa a kulagu,
puku peroa na ghagua na levunimate:
sagauvia na goniana na hava ke kale.
5 Kakeri vaho ge ko lubatira na ghagua na levunimate, ge kara lotiu.
Lubatira ge kara turi pepeleu tana pari.
Lubatira nigua na haba ge ke lelebo tana pughu ni pari.
6 Tapatughuru ghe Lord tana rutu!
Tughuru dato mo ko pungisia na rutu
para ghaghada itadira na ghagua na levunimate.
7 Vahikolura na lei kema i naghomu.
Sopou tana malei kabumu te datogha i vuvungadira soko.
8 Ma Lord ke tuvalia na dete ivuvungadira na lei kema.
Bosa ladaa inau tu maemane ghe Lord;
Na pukuna inau tu tatavahale,
ghe na puku ni haba.
9 Sokolaghinia na dikadira rana dika,
mo ko hangara udolu ara hei tara taonigho.
Na pukuna ighoe to vaevane halahau
tana lio mana taba ghe God ni maemane.
10 God nigua na tako,
to vavolara nia arahei na tobadira
te utuni me maemane.
11 God, agaia na dete te maemane me uto.
Ma gaia te rutu vanira tara tangotangodika tughu bongi.
12 Ma ge na tinoni ke mua tughulio,
God ke sava nia na isi,
ma gaia ke lohia nina na baghe.
13 Ma gaia ke gonidilai
nina lei totobo ni vei totoghoni ni mate kasila.
Ma nina kuali te ruruhu ke kalegho nia.
14 Rana tangotangodika tara loghoa na dika;
a gaira tara nia bahe na lei vahola;
mara vahui na lei sorisori.
15 A gaira tara ghelighi na taripiti,
ge kara taripitira na balu,
ma kara kutu haghe va itadira.
16 A gaira tara gonia na dika;
hauva me labu olira so na lake.
Mara gonia na padalaghi ni haurakeadira na balu,
me kutu oli so tana uludira.
17 Mi nau ku holoutoa Lord:
Na pukuna gaia na maemane:
mi nau ku linge holohaba vania na ahana Lord te haba ngangata.