77
God te hangaa hei te vahaghitaili
Nia na tinoni gehelinge: na Jeduthun, na linge nina Asaph
1 Inau tu tangi ngangaraha vania God.
Inau tu tangi ngangaraha ma God te rongoviu.
2 Tana bongi ni vahola Inau tu kokoeliulivuti vania na Lord.
Tana bongi udolu, Inau tu kokoeliulivuti vaovarongo,
Inau tu mua vadangia siki togholuvu.
4 Agaia te neu mu mua maturu tana bongi udolu.
Mi ta nigua na kanoragha, Inau tu mua tangomana ni kokoe.
5 Inau tu ghanaghanai na lei bongi uto te padi tua.
6 Tana bongi udolu te tona hau na ghanaghanagu,
Inau tu kokoeliulivuti ghanaghanara
me va dato mai tana liogu na lei ghanaghana raini.
7 Ivei tea e niu sika sughua Lord ke va me va?
me ke mua ghoi righi aroviu tana ngiha?
8 Ivei tea ke tona haliu so nina dolo vaniu polo ke va me va?
Ivei ke ghaghua na lei nina baubahu vaniu?
9 E nia ponolio tua na aroviana nina tinoni God?
Ivei tea a nina rutu te tughua nia na veiarovi?
10 Keri ge u ghaghua, “Aeni gaia te dikalaa na liogu.”
God te mua logho maana tua.
11 Inau tu righi olighi na lei totobo to gonighi mai tua ghe Lord.
Inau tu ghanaghanai na lei butuli te haeharegha idania.
12 Gaighi tu tabe nasilighi haia tana ghanaghanagu,
mu ku mua righi polo lio tua.
13 Aghe God, na lei nilabumu te tabu.
siki God ghua ke haba vulegho vaa.
14 Ighoe ke, na God ni butuli mana rongoragha.
Mo talu tatea nimua na maana ighobudira na lei kema.
15 Ighoe to vavolara nimua na vure ma nimua na maana.
na vinavahuhu tana kemadira Jacob ma Joseph.
16 Ge o na tahina na horara sisi, te vaevanegho
Ge mataghu na tahi oka te tabalili ge tatata.
17 Na parako te kovala horui mai na uha, mana oka te nia tagumu.
na viviha ragiragi, na viti te vitilaghinia na piuna na maramana.
18 Nimua na viviha te tagumu mai loka ni ghuri,
Na viti te bulua na maramana.
Na pari te tatata me aleale.
19 Ighoe to liu pota na tahi,
mo sogha halavua na tahi oka
mana marevomu te mua righia tua ahei.
20 Ighoe to hulira kulamu na vure vaghara rana righitaoni Sheep
Kolura Moses ma Aaron toro hulira ghua.