87
Na linge nina kemana Korah
1 A Lord te gonia na komuna,
i vuvungana na ghotu tabu i Jerusalem.
2 Na volana udolu tua tana komu sule keri,
vulei na balu komu lokana Israel.
3 Jerusalem, na komuna God,
me subo na lei totobo uto tara bosagho nia.
4 Inau tu ghilalara na kema ni Egypt, ma rana Babylonia,
gaira ghua na balu, tara ghilalau nia na taonia na bosagu,
maia ghua na vure ni Philistia, Tyre mi Ethiopia
Gaira udolu tu idumi kolura nia na vure ni Jerusalem.
5 Jerusalem kara nia bosa,
“Na vure udolu tara va komu tua igaa.”
ma gaia te haba vule ke vautoa na komu sule keri.
6 Mi tana bona ke gerera na lei kema a Lord ke,
ge ke bosa, “A eni gaia na kema ke haghe mai Jerusalem.”
7 Tana lei bongi ni gougonu,
kara ghavai ma kara linge na vure,
“Na volagu te vuravura mai Jerusalem.”