91
1 A hei te polo itatana a Lord! Ma hei te kabu sarana nina righitaoni.
2 Ke bosa vania, “Itamua tu podopodo mo righitaoniu!
ighoe nigua God mi tamua tu tuturi kauha.
3 Gaia ke righitaonigho me ke volagho
tana lei maemate tara kabu polo,
mi tana lei vahaghi te matea na tinoni.
4 Gaia ke kuvigho nia na ghatana mi ghoe ko vola sarana nina righitaoni!
Na volana te utuni ke podopodogho me pilupungisigho.
5 Kau bei mataghunia siki totobo dika te bongi,
pa siki tidalo te mate tinoni tana dani.
6 Mana vahaghi te polo tana bongi,
mana lei totobo dika te matea na tinoni tana dani kama.
7 Na togha nia tinoni ke tumu mate i lilighimu
pe hangavulu na togha tara kabu talighutigho tara tumu mate ghua,
mete mua kaleghau siki vahaghitaili.
8 Kau rei vaa ma kau righia,
ivei tara nea na headira na totoro rana dika.
9 Kau podopodo i tatana a Lord,
ma ka ungaunga i sarana gaia te haba vule.
10 E taho siki sosodo ke kalegho,
me taho siki maemate ke dutuvia na valemu.
11 God ke vetenara lei nina angel kara righitaonigho,
ma kara podopodogho ivei ko tona vaa.
12 Gaira kara tabe datogho nia na limadira,
ge ke mua kalei na vatu na marevomu.
13 Ighoe ko turibitara na lei kau ghaghala mana lei poli,
na lei kau mataghugha mana lei poli maomaogha.
14 God te bosa me ghaghua,
“Inau ku volara gaira tara doloviu,
mu ku righitaonira gaira tara taluutuniu inau a Lord.
15 Tana bona kara holau inau ku tala vanira,
mi tana bona te kalera na vahola,
inau ku kabu kolura,
ku volara mu ku talu mavara.
16 Inau ku tabora nia na vola daro bona,
mu ku volara ghua.”