99
A Lord na vunaghi haba, mana mavitu te mataghunia nia na tatata,
te sopou ta nina malei sopou
i vuvungadira na lei angel ghatagha,
me anuanu na pari.
A Lord te vunaghi pungisia Jerusalem,
gaia te haba vulera na lei kema.
Na lei vure soko kara holohabaa na ahana te tabu,
maia ghua te sule me mataghugha.
Ighoe na vunaghi haba, to laga mo liona na hava te utuni,
to talua na utuni Israel, mo lavia mai na vola maemane to kaekage.
Holoutoa a Lord dida God,
holohaba gaia te tabu ta nina malei sopou ni haba.
Moses ma Aaron ra nina mane sukaghi
ma Samuel te kokoeliulivuti va i tatana.
Gaira tara holoa Lord, me tala vanira.
Gaia te kokoe vanira mai lokana na ghobaghuli,
mara taonighi na lei nina vetena ma na lei nina bosa ni keikeri.
Lord, Ighoe nimami God, to bosa tughu vanira tua kulamu na vure.
To tatea vanira Ighoe a God, to talu keha palu,
sakai vamua to torora nia tua na lei paludira.
Holoutoa a Lord, dida God, nia kau holohabaa ta nina ghotu tabu!
gaia dida God te tabu.