9
God te vilira rana vure Jew
1 Na pukuna tu nina tinoni Christ, na hava tu nia kokoe vanighau te utuni. Inau tu mua kiko, na ghanaghanagu mana Tarunga Tabu toro patui na hava tu bosai ke, te utuni.
2 Na tobagu te vonughia na dikalio mana vahaghitaili te mua soko,
3 na pukuna nigua na vure, rana Jew, tara mua taluutunia Christ. Inau tu lubati oliu heghegu ge God ke va toro kasilau ku luba sania Christ tughura rana vure Jew, ke vagha ke va hangara kara taluutunia.
4 Agaira na vure ni Israel, rana puku ni dalena God te vilira. Idania God te tatei vanira nina rongoragha. Ma ge baubahu vanira, me vahera nina vetena. Ma gaira tara loghoa na maana ni holohabana mana lavipangotiana nina puku ni baubahu.
5 Rana kukuadira nina lei puku ni vure haba God, a Christ heghena ghua tara bahua tana kema ni Jew. Ma Christ gaia God, te vunaghi pungisighi na lei totobo soko, me kaekagena na holouto kasila! Amen.
6 ?Ivei tea, God te mua gonikalei nina baubahu vanira na Jew? Taho, na mua gaira udolu tara vahura tana binaboli ni Jew, tara puku ni Jew.
7 E utuni sughua gaira tara vaivarina Abraham, me mua nera ge kara puku ni vaivarina udolu. Sakai vamua Abraham te loghora na balu dalena, te gerea na Gegere Tabu, God te bosa vania,
Na puku ni vaivarimu
kara vahura mai tana kemana Isaac, na dalemu.
8 Mete vagha eni ke, na lei vaivarina Abraham tana levu ni huli tara mua puku ni dalena God. Gaira rana dalena God vamua tana baubahu, tara puku ni vaivarina Abraham.
9 Aeni na hava God te nia baubahu vania Abraham,
“Tana niulu ke mai, inau ku oli mai soo,
ma Sarah ke vahua na garimane.”
10 Na dalena eni ke, Isaac na vaivarida. Tana bona ke sule dato, gaia ke tauna Rebekah, me ke vahura na baso.
11 Naghona tara mua vahura mua, ge ro gonighi na lei totobo uto pana dika ke, ma Rebekah te holaa na rongorongo itatana God. Na rongorongo eni te talutatea gaia God te vili taonia nina ghanaghana heghena,
12 me mua taonia dida na lutu uto pe dika. God te bosa vania Rebekah, “Na kamanagho ke lutu vania na kamamuri.”
13 Tana Gegere Tabu te bosaa,
“Inau tu dolovia Jacob, mu nia sika Esau.”
14 ?Mi ghita na hava ka bosaa? ?Ivei tea, God te mua kaekage pe maemane? Taho vaho tua!
15 Ma gaia te bosa vania Moses me ghaghua,
Inau ku tatea nigua na veiarovi
vania ahei tua tu vilia,
mi nau ku tatea nigua na liouto
itatana ahei tu vilia tua.
16 God ke mua taonia na lioda, ge ka lavipangotia nina baubahu God. Ighita ka mua tangomana na holaani nia na viliana pana lagalaga vaniana. Ma God ke tatea nina na veiarovi vania ahei ke vilia.
17 Mana Gegere Tabu te ghaghua, God te bosa vania na Vunaghi haba ni Egypt me ghaghua,
“Inau tu viligho nia na puku ni ghanaghana eni,
ge ko tughunitatea nigua na maana itamiu,
ma ge na ladagu ke horavia na maramana udolu.”
18 Vaho ge, God ke arovira na balu na pukuna te liodira, ma gaia ke vilira na balu tinoni ge ke hera kutuvatu ma kara mua rongovia.
Nina veiarovia mana nina rutu God
19 Sogea siki sakai tamiu ke bosa bulebule te vagha eni, “?Na hava te ghua God, ge detera na vure tara mua rongovia, na pukuna na lei totobo ta gonighi tara taonia vamua na liona?”
20 Inau ku bosa tughu vanigho, ?Ahei ighoe, to tinoni vamua, ge ko koehorua God? ?Ke tangomana so sakai na totobo gogoni ge ke huatia na tinoni te gonia, ‘?Na hava na pukuna ge o goniu te vagha eni?’
21 Tana bona na tinoni te saria na popo, ge va taonia na liona. Keba gonia sakai na popo na vatei vaguvagu mana ruani vatei soni lololo, e uto ngangata.
22 God te gonighi tua te vaghai kiri. Gaia te liona ge ke tatei nina rutu ma nina maana, hauva gaia te lio kikinima me vadangitai vanira arahei te ulaghadira nina dete mana taghalaghi.
23 Ma gaia te tatei ghua nina lologho ni rongoragha te haba vanira rahei gaia te gonidilara te ulaghadira nina veiarovi.
24 Ighita nina vure God te vilighita. Gaia te mua vilighita igobudira na Jew vamua, maia ghua rana mua Jew.
25 Te vaghaa eni ke, na prophet Hosea te gerea na hava God te bosa,
“Gaira tara mua nigua na vure idania,
itaeni ku holora nia nigua na vure.
Mi nau ku dolovira gaira
tu mua dolovira idania!”
Ma gaia te gerea ghua,
26 Idania God te bosa vanira,
‘Ighau amua nigua na vure.’
Mi taeni gaia ke bosa vanira,
‘Ighau rana lei dalena God te vola.’
27 Ma Isaiah na Prophet te nira ghaeghahe rana Israel,
“Sughua rana vure ni Israel
tara sepalaghi vaghara na saghalea,
mana balu itadira vamua God ke volara.
28 Ma Lord ke toro minaminara rana vure tana maramana.”
29 Ma Isaiah te bosa ghua,
“Ma ge a Lord puku ni maana
ke mua lubatira na balu itadira rana vaivarida,
Gaia te durakeghita te vagha
rana vure ni Sodom mi Gomorrah.”
Rana vure ni Israel tara mua taluutunia Jesus
30 ?Na hava na ghanaghana ilokana na lei totobo raini? Sakai vamua rana mua Jew tara mua kenea God, God te va talu maemanera tana matana tana bona tara taluutunia Jesus Christ.
31 Ma rana Jew, tara tabotabo ngangata ge kara talu maemanera heghedira itatana God taonia nina vetena Moses, mara mua tangomana.
32 ?Na hava na pukuna? Tara mua maemane na pukuna gaira tara tabotabo ge kara talu maemanera itatana God na taoniana na vetena ma nia na utoadira, mara mua varava tana taluutuni. Te vagha tara nia sarikiba na vatu sule tana na halautudira me kutulaghinira.
33 Lokana na Gegere Tabu, God te bosa pungisira me ghaghua,
“Kau righia! Inau tu talua na vatu i Jerusalem,
te nera na lei tinoni ge ra sarikiba,
mana vatu te nera ge ra tumuhoru.”
“Ma rahei tara taluutunia gaia,
kara mua nia maa.”