13
Na maumanu asi sule te va dato mai tana tahi
1 Mi taeni ta nigua na mabubu inau tu righia na maumanu asi te sule te puputu dato mai tana tahi. Te loghoi e vitu na uluna me hangavulu na kalana mara tangosakai pitiulu na lei kalana. Mara gerei tana lei uluna na lei aha ni koehoruana God.
2 Na maumanu asi eni te vagha na reireina na leopard, mana tuana te vaghaa na tuana na bear, mana mangana te vaghaa na manga ni lion. Mana dragon te vahea nina maana heghena mana laga vania na maumanu eni, ge ke vunaghi pungisia na maramana.
3 Mi nau tu righia sakai na ulu itadira na lei uluna, te pae me vahola ge ke mavo, hauva me ghoi mavo pulohi. Mana lei tinoni tana maramana udolu tara nia hare na butuli eni, mara taonia na maumanu asi nia na mataghu mana kikinima.
4 Ma gaira tara nia kikinima mara holohabaa na dragon na pukuna te vahea na maana vania na maumanu asi eni, ma gaira tara nia kikinima mara holohabaa na maumanu asi, mara ghaghua, “E taho ahei ke vaghaa na maumanu asi, me taho ghua ahei ke tangomana ge ke veitotoghoni kolu itatana.”
5 Ma God te lubatia na maumanu asi ge ke talunagho ta nina maana, keri ge ke nighi kokoe na lei bosa ni koehoruana God. Me lubatia na maumanu asi te loghoa na maana eni ge ke nea na hava te liona na goniana e vati hangavulu rua na vula.
6 Eo, na maumanu asi te koehorua God, maia na ahana, maia na komuna, maia ghua arahei tara kabu tana kinakabuna God.
7 Ma God te lubatia ghua na maumanu asi te loghoa na maana ge ke veitotoghoni kolu itadira me ke lagavulera nina vure tabu God. Me lubatia ge ke loghoa ghua na maana ge ke vunaghi pungisira na lei koukomu mana lei leu mana lei kema.
8 Mana lei tinoni tana maramana eni kara holohabaa ma kara nia kikinima na maumanu asi. Gaira kiri, tara mua gerei na ahadira ilokana na buka ni vola i naghona God te gonia na maramana. Na Dale Sheep tara labumatea te loghoa na buka ni vola keri.
9 “Na pukuna tau logho kuli ke, kau rongovi utoa ma kau ghilalaa.
10 Ma ge God ke vilia siki sakai kara lotia va tana vale pipiti ke, gaia kara lotia. Ma ge God ke vilia siki sakai kara va matea nia na isi ke, gaia kara matea. Tana bona na lei totobo kara kale ke, ighau nina vure God, kau tughuru ngasi mughua ma kau taluutunia haia God.”
Na maumanu asi te dato mai tana pari
11 Keri ke, mi nau tu ghoi righia sakai na maumanu asi sule ghua, te dato mai tana pari. Gaia te loghoi erua na kala te vaghaa na dale sheep, ma gaia te nia kokoe na talama ni manga te vagha na dragon.
12 Ma gaia te nighi lutu nina na maana sule na diki maumanu asi ge ke lutu vania. Me pilimuimuridira na lei tinoni tana maramana, ge kara holohabaa ma kara kikinima vania na diki maumanu asi, gaia keri te pae na uluna te manana ge ke nia mate, hauva, me ghoi mavo pulohi.
13 Me ruani na maumanu asi, gaia te gonighi na lei butuli te haeharegha tana matadira na lei tinoni, me nea ghua na lake ge vavu mai kokou me horu mai tana maramana tana bona tara bungutia va na lei tinoni.
14 Me ruani na maumanu asi te gueguelora nia na lei tinoni tara ghahara tana na maramana eni, taonighi na lei butuli kiri te gonighi tughua na diki maumanu asi. Me bosa vanira ge kara saria na titinoni sule, na titinonina na diki maumanu asi, gaia keri te pae na uluna te manana ge ke nia mate, hauva me ghoi mavo pulohi.
15 Ma God te lubatia eruani na maumanu asi ge ke vahea na vola vania na titinoni. Na titinoni keri, te bosa ke, me loghoa tua na maana ge ke matea hei ke mua holohaba me ke nia kikinima.
16 Me ruani na maumanu asi te pilimuimuridira ghua na lei tinoni soko - na sule mana pile, na tinoni lologho mana tinoni bona, na seka mana tinoni tatavahale, - kara lavia na vaughilala tana lima madolodira pi tana raedira.
17 Ke mua tangomana ahei ge ke pelupelu me ke nia sabiri siki totobo ke mua loghoa na vaughilala keri, na ahana na maumanu asi pana papada te tughua nia na ahana.
18 Ma ge ko loghoa na manaha ke, ko tangomana ge ko ghilalaa na ghanaghana ilokana na papada nina na maumanu asi keri. Na papada eni te talutatea na tinoni. Nina papada keri, ono hangalatu ono hangavulu ono (666).