5
Jesus te hangavia na buka lologhu
1 Keri ke, mi nau tu righia na buka lologhu tana lima madolona gaia te sopou vuvungana na malei sopou ni vunaghi haba. Mi lokana, mi murina na buka lologhu tara gerea, mara lagholaghoa nia e vitu na lagholagho.
2 Mi nau tu righia ghua na angel te loghoa na maana sule, te ghaeghahe nia na talama ni manga sule, “?Ahei te ulaghana ge ke vurehighi na lagholagho tana buka lologhu eni?”
3 Me taho ahei kokou pi ani pari, pi tana Betidalo, ke tangomana na hangaviana na buka lologhu mana idumiana.
4 Mi nau tu tangitangi na pukuna e taho ahei kara kene sodoa te ulaghana ge ke vurehia na buka lologhu me ke idumia.
5 Ma sakai tadira erua hangavulu vati na mane nagho te bosa vaniu, “Ko bei tangi! Ko righia, na lion tana kemana Judah, na kamanagho ta nina malei sopou ni vunaghi haba David te lagavule tua. Gaia te ulaghana ge ke hangavia na buka lologhu me ke vurehighi e vitu na lagholagho.”
6 Inau tu rei vaa mu righia na Dale Sheep tara labumatea, ighobuna na malei sopou ni vunaghi haba, mara vati na totobo vola, mi ghobudira erua hangavulu vati na mane nagho. Gaia te loghoi ra vitu na kalana, me vitu na matana, gaira kiri ra vitu na tarungana God, te vetena rughuhorura tana lei piuna na maramana.
7 Ma gaia te tughuru dato mai, me holaa na buka lologhu tana lima madolona gaia te sopou tana malei sopou ni vunaghi haba.
8 Tana bona te lavia na buka lologhu, gaira ra vati na totobo vola me rua hangavulu vati na mane nagho tara poghotao tana matana na Dale Sheep. Sopa sakai tadira te tabea na ghalevu, ma gaira tara tabei ghua na popo gold te vonughighi na ghaiuruuru, te vagha didira na kokoeliulivuti nina vure God!
9 Ma gaira tara lingea na linge vaolu nia na lei bosa raini,
“E ulaghamu sughua ge ko holaa na buka lologhu
mo ko vurehia na lagholagho mo ko hangavia.
Mara labumategho tua, mana ghabumu te huiolira nina vure God
tana lei kema, mi tana lei leu, mi tana lei vure soko.
10 Mi ghoe to nera ge kara mai sakaisonikolu tana kinakabuna God ma nina lei manesukaghi.
Ma gaira kara vatogha tana maramana.”
11 Mi nau tu ghoi rei vaa, mu rongovia na mangadira na togha mana mola ni angel tara linge talighutia na malei sopou ni vunaghi haba mana lei totobo vola mana lei mane nagho.
12 Ma gaira tara nia linge na manga sule,
“Na Dale Sheep tara matea te ulaghana,
ge ke lavia na maana, na lologho, na manaha,
mana laga, talumava, mana rongoragha mana vauto.”
13 Keri ke, mi nau tu rongovia na lei totobo vola i kokou mi ani pari, mi sarana na maramana mi lokana na tahi, gaira ghua tara linge,
“Na vauto, na talumava, mana rongoragha mana maana,
vania gaia te sopou vuvungana na malei sopou ni vunaghi haba,
maia ghua na Dale Sheep, ke vaa me vaa.”
14 Mara vati na totobo vola tara bosaa, “Amen!” Ma gaira rua hangavulu vati na mane nagho tara poghotao mara holohabaa God ma gaia ghua na Dale Sheep.