7
स्तिफनुसान बासेण
1 तेवी मुखी चाकर्यो स्तिफनुसाह केयो, “ज्यी खेरी वात हे काय?”
2 स्तिफनुस केयो, एय बाहख, एने डायडाया हुमलो! आमरो आबोख अब्राहाम हारान माय जाईन रेणेन पेल जेवी मेसोपोटामीया माय ईतो; ते बोड़ाय ने बोगवान ताह देरसेन आप्यो,
3 एने अब्राहामाह केयो, “तु तारो कुटूम एने तारा देसा माय रेन निकलीन ता देसा माय जा, जो मी तुवाह देखाडुह।”
4 तेवी अब्राहाम कसदियान देसाम रेन निकलीन हारान माय जाईन रेणे बाज गीयो। एने आबोख गोमाणेन पासाण बोगवान अब्राहामाह ता रेन ज्या देसा माय लावीन रेवाड्यो, जा माय एवी तुमू रेतेह।
5 एने बोगवान ता अब्राहामाह काय मालदेन नाह आप्यो, न्या वोर काय पाय मेलनेन बी जागो नाह आप्यो, ताह सोरा नाह एता तीबी ज्यो देस तारे एने तार पासाण तारा सोरान आथाम जेलेमक्योच केरनेन वायदो बोगवान ताह आप्यो।
6 एने बोगवान इहकेरीन केयो, “तारा सोरान माणहे पाराया देसाम पाराया रेती, एने ता ताह पावोर बाणावती एने चार होव वोरह्या वोर सेतावती।”
7 ओवतो बोगवान केयो, “जा देसान ता पावोर रेती, ताह मी डेंड आपुह, ओवता तान पासाण ता निकलीन जीच जागे मारी चाकरी केरती।”
8 एने बोगवान ता हिऱ्यो खेतनान वायदो बांद्यो; तानकेरता जेवी अब्राहाम रेन इसहाक पायदा ईनो, तेवी आठवे दिह इसहाकान खेतना किऱ्यो; एने इसहाक रेन याकुब पायदा ईनो, एने तान खेतान इसहाक किऱ्यो, एने याकुब रेन बारा सोरा पायदा एना, एने तान खेतना याकुब किऱ्यो, जा आमरा डायला हेते।
9 एने युसूफान बाहख ता हेऱ्या कुयराय केरीन ताह मीस्र देसाम जाणारान आथाम वेच देना। पुण बोगवान युसूफ हिऱ्यो ईतो,
10 बोगवान युसूफाह आखा दुखाह रेन सोड़वीन मीस्र देसान राजा फिरोनान नेजरी माय गीण एने इकेल आप्यो, तेवी राजा मीस्र देस एने तान आखा गेराणा पोर आदिकारी ठेरायो।
11 तेवी मीस्र देसाम एने आखा कनान देसाम काल पोड़नो एने मोटली पिड़ा आवी, एने आमरा बाप दादाह एन नाह जुड़तालो।
12 पुण याकुब ज्यो होमलीन काय मीस्र माय दाणा हेते, आमरा बाप दादाह पेल्ली वार मोकल्यो।
13 एने दिहरी वार युसूफ सोताह तान बायाख ने ओंगाण देखाड्यो, एने युसूफान जात फिरोनाह मालुम एय गियी।
14 तेवी युसूफ तान आबोख याकुब एने तान आखा कुटूमाह, जा पंच्याहत्तर माणहे एता, ताह हादाड्यो काय ता मीस्र देसाम आवीन रेती।
15 तेवी याकुब मीस्र देसाम निचो गीयो; एने ताहरी याकुब एने तान सोरा बी मोर गीया।
16 याकुबान देड़ शकेम माय पोचाड़ीन ता माहणा माय मेल्या, जाह अब्राहाम पोयशा आपीन शकेम माय हमोरान सोरा फाय रेन वेचातो लियेल ईतो।
17 पुण जेवी ता वायदान पुरो एणेन टेम आहने आवो, जो बोगवान अब्राहाम हिऱ्यो किरेल ईतो, ते मीस्र देसा माय ता माणहे वोड़ गीया एने जुलूम एय गीया।
18 तेवी मीस्र देसाम दिहरो राजा बोणनो जो युसूफाह नाह ओलेखतालो।
19 तो आमरी जाती हिऱ्यो चालाकी केरीन आमरा बाप दादा हिऱ्यो न्या वोर खाराब वेवार किऱ्यो, एने ताह तान सोराह टाकणेन केरता मोजबुर किऱ्यो काय ता जीवताला नाय रेय।
20 ती टेम माय मुसो पायदा ईनो, तो बोगवानान नेजरी माय जुलूम हाजो ईतो। तो तीन मोयना वोर तान आबाख ने गेरा माय पोहानो,
21 जेवी तो बाहेर जुगाराय गीयो, ते फिरोन ने बेटीख ताह विसीन ली गियी एने तीन बिटोख बाणावीन पोही।
22 एने मुसाह मीस्री माणहान आखी विद्यान हिकवोण आप्या, एने तो बोलने एने काम दुयाम ताकेतवोर ईतो।
23 जेवी मुसो चालीह वोरह्यान ईनो, ते तान मोना माय आवो काय मी मारा इस्राएली बायाख हिऱ्यो मीलाव।
24 तो एक माणहा पोर खाराब वेवार एतालो देखीन ताह वोचाड्यो, एने मीस्री माणहाह मारीन नुकसान किरेल तान बुदलो लिदो।
25 मुसो सुचो काय तान माणहे सोमजेती काय बोगवान मार आथा केरीन तान सुटकारो केरी, पुण ता नाह सोमज्या।
26 दिहरे दिह जेवी ता आपसाम लेड़ाताला, ते मुसो ताहरी जाय पोचनो; एने ज्यो केयीन ताह मेल केरनेन केरता सोमजाड्यो, एने केयो, “एय एदमी, तुमू ते बाहख बाहख हेते, एका दिहरा हेऱ्या काहा लेड़ातेह?”
27 पुण जो तान आहने रेणारा हिऱ्यो लेड़ातालो तो मुसाह देखलीन केयो, “तुवाह आमु पोर आदिकार केरनार एने नियाव केरनार कुण ठेरायेल हे?
28 काल तु जिहकेरीन मीस्री माणहाह मारील, तिहेच केरीन माहु बी मारने हुदेह काय?”
29 ज्यी वात होमलीन मुसो नाह गीयो, एने मिद्यान देसा माय परायो एन रेणे बाज गीयो, एने ताहरी मुसान दुय सोरा पायदा एना।
30 जेवी पुरा चालीह वोरह्या वित गीया, ते एक हेरोगदुत सिनाय बोयड़ान उजाड़ी माय मुसाह हेलेगताला जाड़ान आसी माय देरसेन दिनो।
31 मुसो जेवी जाड़ाह दिख्यो ते बोंगलाय गीयो, एने जेवी तो ताह हास केरीन देखणेन केरता आहने गीयो। ते मालीकान ज्यो बोल होमलानो।
32 मी तारा बाप दादा, अब्राहाम, इसहाक, एने याकुबान बोगवान हे, तेवी मुसो काप उठनो, एने देखणेन ताह ईमोत नाह रेनी।
33 तेवी मालीक मुसाह केयो, “तारा पायाम रेन खाहड़ा काड़ दे, काहाकाय जी जागे तु उबरियेल हे, तो चोखालो जागो हे।
34 मी खेरीच मीस्र देसा माय मार माणहान तेकलीत दिखेल हे; एने तान आयेड़नो एने तान रेड़नो होमलेल हे; केरीन ताह सोड़ेवणेन केरता उतेर आयेल हे। एवी आव, मी तुवाह मीस्र देसाम मोकलुह।”
35 जा मुसाह ता ज्यो केयीन नाकारेल एता, “तुवाह कुण आमु पोर आदिकारी एने नियाव केरनार ठेरायेल हे?” ताहास बोगवान आदिकारी एने सोड़ेवणार ठेरावीन ता हेरोगदुतान द्वारे मोकल्यो, जो ताह जाड़ा माय देरसेन दियेल ईतो।
36 ज्योच माणुह मीस्र देसा माय रातलो देरीयो, एने उजाड़ी माय चालीह वोरह्या वोर चोमेत्कार एने निसाणी देखाड़ते लेन ताह निकाल लावो।
37 ज्यो तोच मुसो हे, जो इस्राएलाह कियेल, “बोगवान तुमरी केरता तुमरा बायाख माय रेन मार होच एक जाणाव केरनाराह उबो केरी।”
38 ज्यो तोच हे, जो उजाड़ी माय मोंडलीन विची माय ता हेरोगदुता हिऱ्यो सिनाय बोयड़ा पोर मुसा हिऱ्यो वातु किऱ्यो; एने आमरा बाप दादा हिऱ्यो, ताहच जीवतालो वचन जुड़नो काय आपु फाय वोर पोचाड़ी।
39 पुण आमरा बाप दादा तान मानने नाह होद्या, पुण ता ताह ठोकरावीन तान मोनाह मीस्र देसान निही फिराया,
40 एने हारूनाह केया, “आमरी केरता ओहलो देवताह बाणाव, जो आमरे ओंगाण ओंगाण चाले, काहाकाय आमु नाह जाणते काय ता मुसान काय एनो? जो आमुह मीस्र देस रेन निकालीन लायेल ईतो।”
41 तेवी ता एक वासड़ान एक मुरती बाणावीन तान ओंगाण बोली चेड़ाया, एने तान आथान कामा माय खुसी मोणाव्या एने पावणाय केऱ्या।
42 ज्यानकेरता बोगवान मुय फिरावीन ताह सोड़ दिनो, काय जुगाह पुजे, जिहकेरीन जाणाव केरनारान पुस्तेक माय लिखेल हे,
“एय इस्राएल ने गेराणा! काय तुमू उजाड़ी माय
चालीह वोरह्या वोर जेनवेराह मारीन बोली चेड़ावती रेना?
43 एने तुमू मोलेक ने तोम्बु एने रिफान देवतान ताराह लेन फिरताला,
मतलब त्यु मुरत्युह ज्युह तुमू पुजणेन केरता बाणायेल एत्यु।
केरीन मी तुमूह बाबिलोन ने ती उगे ली जाईन बोहाडुह।”
44 आमरा बाप दादा फाय बोगवानान पुरावान तोम्बु एतो, जिहकेरीन बोगवान मुसाह कियेल तिहेच केरीन मुसो बाणायेल, तो ता नमुनान गेत एतो, जो मुसाह देखाड़ेल एतो।
45 ताच तोम्बुह आमरा बाप दादा जुनाला कालाम होदिन यहोशु हेऱ्या न्याहरी लेन आवा; ती टेम काय ता ती दिहरी जाती पोर आदिकार जुड़नो, जाह बोगवान आमरा बाप दादान सामने रेन निकाल देनो, एने तो तोम्बु दाऊदान टेम वोर रेनो।
46 दाऊद पोर बोगवान गीण किऱ्यो; केरीन तो विन्ता किऱ्यो काय तो याकुब ने बोगवानाह रेणेन केरता तोम्बु बाणावी।
47 पुण सुलेमान बोगवानान केरता गेर बाणायो।
48 पुण आखाह रेन मोटलो बोगवान आथा केरीन बाणायेल गेरा माय नाह रेणे, जिहकेरीन काय जाणाव केरनारे केया,
49 “मालीक किथे, हेरोग मारी राजगादि एने देरती मार पाय मेलनेन जागो हे,
तुमू मार केरता कोहलो गेर बाणावहु?
एने मारो विहेवणेन काल्लो जागो रेय?
50 काय ज्यु सोब चिज मार आथा केरीन बाणायेल नाह?”
51 एय एकएट्या माणहे, “तुमरो मोन एने कान बिगेर खेतनान हे, तुमू जेलेम चोखाला जीवान विरोद केरतेह: जीहे तुमरा बाप दादा केरताला, तिहेच केरीन तुमू बी केरतेह।
52 जाणाव केरनाराम रेन कुणीह तुमरा बाप दादा नाह वेला केराया? एने तुमरा बाप दादा ता देरमीह आवणेन पेलुच रेन खुबेर केरनाराह मार टाक्या; एने एवी तुमू बी ता देरमीह देरावणारे एने मार टाकणारे एना।
53 तुमू हेरोगदुतान द्वारे पोचाड़ेल नेम ते सापड़ाया, पुण तान पालेन नाह केऱ्या!”
स्तिफनुसान देगड़ाठणे से मोत
54 ज्यु वातु होमलीन ता खीजवाय गीया, एने स्तिफनुसा पोर दात केकड़ावणे बाज गीया।
55 पुण स्तिफनुस चोखाला जीवा माय पुरो एन हेरगान उगे दिख्यो, एने बोगवानान बोड़ायीह एने यीशुह बोगवानान जीवड़े उगे उबरियेल देखीन।
56 केयो, “दिखो, मी हेरगाह उगड़ील, एने माणहान बेटाख बोगवानान जीवड़े उगे उबरियेल देखथु!”
57 तेवी ता मोठेस आयड़ीन कान बोंद केर लेदा। एने पोंचान आखा मेहमोर मिलीन एकठास स्तिफनुसा पोर तुट पोड़ना,
58 एने ता स्तिफनुसाह गावान बाहेर निकालीन देगड़ाठणे बाज गीया। एने गोवा माणहे तान फाड़का शाऊल नावान एक जुवानान पाया हेऱ्या काड़ीन मेल देना।
59 एने जेवी ता स्तिफनुसाह देगड़ाठते रेना, तेवी स्तिफनुस ज्यो केयीन विन्ता केरती रिनो, “एय मालीक यीशु, मार जीवाह स्वीकार ले!”
60 ओवतो मांड्या वोलीन स्तिफनुस मोठेस आयेड़नो, “एय मालीक, ज्यो पाप न्या पोर मा लागाड़े!” एने इहकेरीन केयीन स्तिफनुस मोर गीयो।