कुलीसियो पौलुस ने लिखा हुआ पत्र
कुलीसियो पौलुस लिखेल पोत्रो
ओलखात
कुलीसियोन पोत्री प्रेरित पौलुसान 1:1 उगे रेन मोंडलीह लेखायेल एतो, तो ज्यो पोत्र तेवी लिखेल ईतो जुलबुखे तो जेली माय ईतो, एने रोम माय मसीन जेल्मान पासाण कोमीत कोमी 60 सालान पासाण कुलीसियो एने फिलिमोन ने केरता ज्यो पोत्र पौलुस जेली माय रेन लिखेल ईतो ता माय ज्याह जेल पोत्र केवाय जाथे। तो ज्यो पोत्र कुलीसियो हेयरान मोंडलीह लिखेल ईतो। पौलुस कुलीसियो माय मोंडली चालु नाह किरेल ईतो काहाकाय तो 2:1 माय देखाड़ेल हे। पुण तान केरता थोड़ीक जिमेदारी जाणेल ईतो, ज्यो आंदास हे काय एपाफ्रास मोंडली बाणायेल ईतो, काहाकाय तो कुलीसियो वालो ईतो।
पौलुस कुलीसियोन मोंडली माय गेलेत सिक्शा हेऱ्यो समंद एतो तो देखाड़ेल हे, तो पोत्र लेणेन केरता जुलूम खीरचो किरेल ईतो। एय सिकेह काय यहुदि विश्वासीन एक टुलो ईतो, जुनाला नेमा माय यहुदि कायदान पालेन केरनेन केरता दिहरा विश्वासी बायाख मोजबुर केरने बाजरियेल एता, खास केरीन खेतना। पौलुस खास केरीन लिखेह काय मसीह बोगवानाह 1:15-20 मान्ने सिवाय मसीन सिवाय कायच नाह, एने कायताच ने गिरेज नाय मिले एने माणहान मोना पोर हिकाड़ेल सिक्शा बेकार हे। 2:8
रूपरेखा
1. पौलुस कुलीसियोन मोंडलीह नमस्कार केरीन पोत्रान सुरवात किरेल हे। 1:1-2
2. ओवतो तो मसीन महानता बारा माय लिखेह खास केरीन कुलीसियो माय जुठी सिक्शान बारा माय लिखेह। 1:3–3:4
3. पौलुसान जुलूम पोत्रा माय तो पोत्रान व्यातीत किरेह जा हाजाला विश्वासी जीवणो जीवणे खाज निर्देश आपेह। 3:5–4:6
4. पौलुस दिहरी मोंडलीह जोरेस वाचाय जाणार पोत्रान केरता साबासकी एने निर्देश आपेह। 4:7-18
1
1 कुलीसियोन मोंडली वाला मसी यीशु पोर बुरहो केरनारे बाय बोणहाह, बोगवानान प्रेरित पौलुस एने बाहख तीमुथीयुस ने उगे रेन,
2 कुलीसियो माय रेणारे बोगवानान ता बोरहावाला बायाख ने जा मसी माय एक हेते,
आपणा आबाख बोगवानान उगे रेन तुमूह गीण एने सान्ती जुड़ी,
दन्यवाद ने विन्ता
3 जेवी बी आमु तुमरी केरता कायेम विन्ता केरीन आमु आपणा मालीक यीशु मसीन आबोख बोगवानान दन्यवाद केरतेह।
4 काहाकाय आमु मसी यीशु माय तुमरो बुरहो एने आखा बोगवानान माणहान बाराम तुमरा मोंगान बाराम होमलेल हेते;
5 जेवी खेरली खुबेर, हाजाली खुबेर, पेल्ली वार तुमरी फाय आवो, तेवी तुमू ज्यी आसान बाराम होमल्या जो ज्यी आसा पोर आदारीत हे तानकेरता तुमरो मोंग ती हाजाली खोबरी पोर आदारीत हे, जो तुमरी केरता हेरगा माय हास केरीन मेलायेल हे।
6 हाजाली खुबेर बोरकेत लावेह एने पुरी दुनिया माय पोसेरते जाथे, तिहेस केरीन जिहकेरीन तुमरे विचीम ते दिह रेन हे, जेवी तुमू पेल्ली वार बोगवानान गीणीन बाराम होमल्या एने मालुम पोड़नो काय ज्यो खेरीच हे।
7 बोगवानान गीणीह तुमू आमरा मोंगाल्ला हाती सेवक इपफ्रास फाय रेन हिकेल हेते, जो आमरी उगे रेन मसीन बोरहावालो काम केरनार हे।
8 तोच तुमरा मोंगाह जो जीवा माय तुमरो मोंग हे ताच माय आपुह बाणायेल हे।
9 तानकेरता जेवी रेन आमु तुमरे बाराम होमलेल हेते ते दिह रेन आमु तुमरी केरता कायेम विन्ता किरेल हेते। काय तो पुरी आत्मिक बुद्दी एने सोमेज जो तान जीव आपेह तान मोरजीन इकेल केरीन तुमूह बोर देय।
10 तानकेरता काय तुमरो बोलनो चालनो मालीकाह पोटे, जो ताह आखी बातीन खुस केरनार एय एने तुमरी जीवायी केरीन हाजा कामाह देखाड़ सीको, एने तुमू बोगवानान एकली माय वोदते जावो।
11 एने बोगवानान बोड़ायीन ताकेत केरीन जी ताकेत जुड़ेह तीम मोजबुत एते जावो, काहाकाय तुमू दिर हेऱ्या आखो वेठणेन लायेक बोणी। एने खुसी माय आबाख दन्यवाद किरो
12 जो तुमूह ज्यान लायेक बाणायो काय बोगवानान ता माणहा हेऱ्यो, जो तो तानकेरता पेलुस हास केरीन मेलायेल उजालान राज माय तुमू आदिकार सापड़ावणे माय बागी एय सीको।
13 एने तो आपुह आदारलान आदिकार माय रेन सोड़व्यो, एने तान मोंगाल्ला बेटाख ने राज माय होमालीन लायेल हे।
14 एने तान द्वारा आपु आजाद केराय गीया, मतलब आपुह आपणा पापान माफी जुड़नी।
मसीन काम एने व्यक्तित्व
15 नाह देखाणार बोगवानान वेह रूप हे मसी एने तो आखी बाणायेल चिजी माय रेन पेल्लो पायदा ईयेल बिटोख हे।
16 काहाकाय बोगवान तान द्वारा आखी चिजीह बाणायो हेरगावाल्यु एय नाहते देरती पोर वाल्यु, देखाणार चिज एने नाह देखाणार चिज, राजगादि, मालीक, आदिकारी, आदिकार। आख्यु चिज ताच ने द्वारा एने तास ने केरता बाणायेल हे।
17 आखी चिजीन पेल मसी अस्तित्वा माय ईतो, एने तान एकता माय आखी चिज त्युन ठिक जागा पोर टिकीन रीथे।
18 तोच सेरीर, मतलब मोंडलीन मुंड हे; तोच सुरवात हे, एने मुरेल माय रेन जीव उठणारा माय रेन पेल्लो हे, काय आखी जागे तोच पेल्लो ठेराय।
19 काहाकाय हेरगावाला आबाख ने खुसी ज्याच माय हे एने ताम आखी पुराय वोहे।
20 बेटाख ने माद्यम केरीन एने तान बोगवान खुरूसखाम पोर तान सोरान लुयीन माद्यमा केरीन सान्ती बाणायो एने ज्यानकेरता देरती पोर वोयेल लुयी केरीन मेल केरीन, सोब चिजीह ताच ने द्वारा आपणे हेऱ्या मेल केर लिवो, त्यु देरती पोर वाल्यु एती, नाहते हेरगावाल्यु।
21 एक टेम ईतो जेवी तुमू बोगवाना हेऱ्या रेन सेटा एता, एने आपणा मोन ने विचार एने खाराब कामा केरीन बोगवानान दुसमोन एता।
22 तो एवी सारिरीक सेरीर माय मोतीन द्वारे तुमू बोगवाना हेऱ्यो दोस्ती बाणाव लिदो, काहाकाय तुमूह तान सामने चोखाला एने बिगेर पापान, एने निर्दोस बाणावीन उबराखे।
23 केदी तुमू बोरहान आदार पोर मोजबुत बोणीन रिहो, एने ती हाजाली खोबरीन आसाह जीह तुमू होमलेल हेते मा सोड़ो, जान पारचार जुगान नेचली आखी बाणावोट माय केराय गीयो, एने जान मी पौलुस सेवक बोणेल हे।
पौलुसान मोंडली माय सेवकान काम
24 एवी मी ता दुखान वोजेसे खुस मोणावथो, जो तुमरी केरता विसथो, एने मसीन पिड़ान गेटी तान सेरीरान केरता, मतलब मोंडलीन केरता, मारा सेरीर माय पुरो केरथु।
25 एने मी बोगवानान द्वारा मोंडलीन सेवक बाणावाय गीयो, जो माहु तुमरी बोलाय केरनेन केरता काम होप्यो। एने ज्यो काम तान खोबरीन पुरो पुरो पारचार किरेह।
26 ज्यी खुबेर लिकायेल मतलब त्यु लिकायेल वातुह ज्यु टेमान एने पिढीन पिढी लिकायेल एतो, पुण एवी तान बोगवानान माणहा पोर देखाड़ेल हे।
27 बोगवानान ज्यी योजना एती काय तान माणहा पोर जी लिकायेल वात देखाड़ी काय ज्यो लिकायेल कोलीक बोड़ाय मोंगी हे, जी तान माणहान केरता हे। एने ज्यी लिकायेल वात ज्यी हे काय मसी तुमरे माय हे मतलब तुमू बोगवानान बोड़ाय ने आसा माय बागी एय सेकतेह।
28 केरीन आमु मसीन पारचार आखाह केरतेह। एने जो आपुह इकेल हे ती आखी बुद्दीन वापेर केरती लेन आमु आखाह निर्दोस एने हिक आपतेह काहाकाय आपु ताह मसी माय एक व्यक्तिगत एक पुरो माणुह बाणावीन बोगवानान सामने उबराखे।
29 एने ज्याह पुरो केरनेन केरता मी मसीन मोटली ताकेत जी माहु जुड़ेह एने जी मार माय काम किरेह तीन वापेर केरती लेन मी केठीण मेहनेत एने संगर्ष केरथु।