5
मसी माय स्वतंत्रा
1 मसी स्वतंत्रान केरता आपुह स्वतंत्र किरेल हे, तानकेरता मोजबुत रिवो एने गुलाम ने जुवाला माय पोशा मा सापड़ो।
2 हुमलो, मी पौलुस तुमूह केथु काय केदी खेतना केरावहो, तुमू मसीन उगे से तुमूह काय फायदो नाय एय।
3 तीबी मी आखा खेतना केरावणाराह केय दिथो काय ताह आखो नेम मान्ने पोड़ी।
4 तुमू जा नेमान द्वारा न्यायी ठेराणे होदतेह, मसी रेन आंगे एने गीणीह रेन पोड़ जायेल हेते।
5 काहाकाय जीवान वोजेसे आमु बोरहा केरीन, आसा किरेल देरमीपोणान वाट जोवतेह।
6 जेवी मसी यीशु माय एक एतेह, तेवी नाह खेतनान काह काम हे, एने नाह बिगेर खेतनान एणेन; पुण फोक्तो बोरहान जो मोंगान द्वारा ईथे।
7 तुमू ते हास केरीन दोवेड़ताला। एवी कुण तुमूह रोक देनो काय खेरायीह नाय माने।
8 ओहली हिक तुमूह हादणारा बोगवानान उगे रेन नाह।
9 थोड़ोक खमीर कुहणेल पुरा फिटाह खमीर केर दिथे।
10 माहु मालीक माय तुमरी पोर बुरहो हे काय तुमरो एगदो दिहरो विचार नाय रेय; पुण जो तुमूह बिवाड़ दिथे, तो एगदो काहा नाय रेय डेंड बोगी।
11 पुण एय बाय बोणहा, केदी मी आज बी जीहे काय थोड़ाक माणहे सोमेजतेह खेतनान ज्यो पारचार केरथु ते माहो एवी वोर काहा सेतावेह? तेवी मसीन खुरूसखाम ने कारीन पायदा ईयेल सोब बादा खेतेम एय जाणे जुवे।
12 हाजो रेतो काय जा तुमूह दुखी केरतेह ता सोता तास ने सेरीर काट देता।
13 एय बाय बोणहा, तुमू स्वतंत्र एणेन केरता हादाड़ाय जायेल हेते; ज्यी स्वतंत्राह सारिरीक कामान केरता सादेन मा बाणावो, पुण मोंग से एका दिहरान सेवा किरो।
14 काहाकाय आखो नेम ज्यी एकुस वाती माय पुरी एय जाथे, “तु तारा आहेंल्या हिऱ्यो तार गेत मोंग केर।”
15 पुण केदी तुमू एका दिहराह दुख एने पोचाड़तेह दाता केरीन चावतेह एने फाड़ खातेह, ते चेकचेल्या रिवो काय एका दिहरान खेतेम नाय केर दिहो।
चोखाला जीवान द्वारा जीवाय
16 पुण मी केथु, चोखाला जीवान गेत चालो ताहार तुमू सेरीरान लालुस काल्ली बी रिती से पुरी नाय किरहो।
17 काहाकाय सेरीर ते जीवान विरोद माय एने जीव सेरीरान विरोद माय लालुस किरेह, एने ज्या एका दिहरान विरोदी हेते; ज्यानकेरता काय जो तुमू केरने होदतेह ताह नाय केर सिकहो।
18 पुण केदी तुमू जीवान चालाड़ेल चालतेह, ताहार नेमान काबाम नाह रेना।
19 सेरीरान काम ते देखातेह, मतलब सिनालो, खाराब पोण, बोगविलास,
20 मुरती पुजा, जादुटोणा, दुसमोनाय, राड़, कुयराणे, राग, स्वार्थीपोण, फुट, विदर्म,
21 दारकुट्यो, लीलाक्रिड़ा एने इहकेरीन दिहरा उंजु कामे हेते, जान बाराम मी तुमूह पेलुस रेन केय दिथो जिहकेरीन पेल केय बी दियेल हे, काय ओहला ओहला काम केरनारे बोगवानान राज ने वारीस नाय रेती।
22 पुण जीवान फोल मोंग, खुसी, सान्ती, दिर, गीण, बोलाय, बुरहो,
23 गेरबोड़ाय, एने संयम हे; ओहला ओहला कामान विरोद माय काल्लो बी नेम नाह।
24 एने जा मसी यीशुन हेते, ता सेरीराह तान आसा एने अबिलाषा बेल खुरूसखाम पोर चेड़ाव दियेल हे।
25 केदी आपु जीवान द्वारा जीवताला हेते, ताहार जीवान गेत चाले बी।
26 आपु गोमेंडी नाय बोणी एने एका दिहराह नाय विताड़े, एने नाय एका दिहरा हेऱ्या कुयराय केरी।