5
1 एकेक मुखी चाकर्यो माणहा माय रेन निवड़ाय जाथे, एने माणहान आगवाय केरनेन केरता एने बोगवानान सेवा केरनेन केरता निवड़ाय जाथे, ताकाय तो पापान केरता बेट एने बोलीदान चेड़ावी।
2 काहाकाय तो खुद बी मोकतीस कोमजोरीन ताबाम ईतो, केरीन तो विणएकल्याह एने विहरायेल बोटकायेल हेऱ्यो नेरमाय से वेवारो किर सिकेह।
3 एने तानकेरीन ताह जुवे काय जिहकेरीन माणहान केरता तिहेस केरीन सोतान केरता बी पाप बोली चेड़ाया केरी।
4 ज्य मुखी चाकर्यान आदार ने पोद कुण बी खुद निवाड़ नाह लेणे, जाह वोर काय हारून ने गेत बोगवानान उगे रेन तो ठेराय नाह जात।
5 तिहेस केरीन मसी बी मुखी चाकर्यो बोणनेन बोड़ाय खुद स्वीकार नाह किऱ्यो, पुण बोगवान ताह कियेल:
“तु मार बिटोख हे;
एने आज मी तार आबोख बुणेल हे।”
6 इहकेरीन तो दिहरे जागी बी किथे,
“तु मलकिसिदक ने गेत,
कायेम ने केरता मुखी चाकर्यो हे।”
7 यीशु तान सेरीर माय देरती पोर रेणे टेम माय मोठास सोबदा माय रेड़ रेड़ीन, एने आहवा गालीन ताह जो ताह मोती माय रेन वोचाड़ सेकतालो। विन्ता एने विन्ती किऱ्यो। बोक्ती एने गेरबोड़ाय ने कारेण बोगवान हुमल्यो।
8 बिटोख ईतो तीबी तो आपणो दुख उखलीन उकुम मान्नेन हिक लिदो।
9 उवतो खिरो एय जाणे से, आपणा सोब उकुम मान्नारान केरता जेलेमक्या कालान सुटकारान कारेण बोण गीयो,
10 एने ताह बोगवानान उगे रेन मलकिसिदक ने रिती पोर मोटला मुखी चाकर्यान पोद जुड़नो।
बोरहा माय रेन बोटेकणेन मोंजरी
11 ज्यान बाराम आमुह जुलूम वातु केणु हे, एने ज्याह सोमजाड़णेन बी जुलूम केठीण हे, काहाकाय तुमू मोठेह होमेलने बाज गीयाह।
12 टेमान गेत ते तुमूह एवी वोर मास्तेर बोण जाणो एतो, पुण एवी जोरवरी ज्य एय जायेल हे काय ईखेह तुमूह पोशो बोगवानान वचनान हिक पेल रेन हिकाड़ी, तुमू ते ओहला एय गीयाह, काय तुमूह खाणान बोदले एवी वोर दुदूच जुवे।
13 दुद पिणाराह ते देरमान वचनान ओलखात नाह रेणे, काहाकाय तो सोरो हे।
14 पुण खाणो सोमेजदारान केरता हे, जा तान अनुबव से हाजा बाकतान ओलखात केरने हिक जायेल हेते।