14
यीशुन विरोद माय चाल
(मत्ती 26:5; लुका 22:1-2; योहान 11:45-53)
1 फसह नावान एने अखमीरी रोटान तिवाराह दुय दिह बाकी रेय जायेल एता; मुखी चाकऱ्या एने देरेमगुरू यीशुह देरावणेन गालो काड़ताला काय ताह किहीक देरहु एने मारहु;
2 पुण ता केताला काय, “तिवारान दिह ओहलो नाय एणे जुवे काय माणहा माय देंग्गो एय जाय।”
बेतनियाह माय यीशुन संस्कार
(मत्ती 26:6-13; योहान 12:1-8)
3 जेवी यीशु बेतनियाह माय शमोन ने गेर रूटो खाणेन बुहेल ईतो जाह पेल कोढ एतो, तेवी एक बायकु दोवल्या देगड़ान सिसी माय चोखो जटामासीन गेंदाण्यो तेल लेन आवी; एने सिसी उगाड़ीन तेल यीशुन मुंडा पोर रोचीव देनी।
4 पुण थोड़ाक माणहे नाराज एय गीया एने केया, “ज्य गेंदाण्यो तेल काहा विरखावेह?
5 काहाकाय ज्याह एक वोरह्या रेन होवटी मोंजरीन किमोत माय वेचीन गेरब्याह वाट देती।” एने ता जुलने बाज गीया।
6 यीशु ताह केयो, तीह रेणे दिवो; तीह काहा तारास देतेह? ती मार पोर बोलो किरेल हे।
7 गेरीब जेलेमक्या तुमरी हेऱ्या रेती, एने जेवी तुमू हुदहो ते दिह तुमू ता हेऱ्या बोलो केर सिकहो, पुण मी तुमरी हिऱ्यो जेलेमक्यो नाय रेव।
8 जोलो ती केर सेकताली तो ती किरेल हे, ती माहु बुजणेन पेल मार सेरीर पोर गेंदाण्यो तेल लागाड़ीन तियार किरेल हे।
9 मी तुमूह खेरीच केथु, “आखी केली माय जा का हाजाली खोबरीन पारचार एय, ता ज्यीन ज्या कामान बाराम बी ज्यीन एर केराय जाय।”
यहुदा यीशुह फरिसीन आथाम होपणे
(मत्ती 26:14-16; लुका 22:3-6)
10 यहुदा इस्कोरिती बारा चेलाम रेन एक ईतो, मुखी चाकऱ्या फाय गीयो काय, तान केरता काय तो यीशुह तान आथाम होप सेकी।
11 ता ज्यो होमलीन खुस एय गीया, एने पोयशा आपणेन वायदो केऱ्या, एने यहुदा गालो होदतालो काय यीशुह देराव देव।
चेला हिऱ्यो यीशु फसह तिवारान सेवल्यो खाणो
(मत्ती 26:17-25; लुका 22:7-14,21-23; योहान 13:21-30)
12 अखमीरी रोटान तिवारान पेल्ले दिह, जा माय ता मेंड्रान पिलाह फसह केरीन बोली चेड़ावताला, यीशुन चेला ताह फुशा, “तु का हुदेह काय आमु जाईन तार केरता तिवार खाणेन तियारी केरहु?”
13 यीशु तान चेलाम रेन दुय जाणाह ज्यो केयीन मुकल्यो, “गावाम जावो, एने एक माणुह पाण्यान गुंडो उखलीन तुमूह जुड़ी, तान पासाण जाज्यो;
14 एने तो जा गेराम जाय, ता गेरान मालक्याह किज्यो, गुरू फुसे मार चेला हिऱ्यो फसह तिवारान खाणो खाणेन खोली काहरी हे?
15 तो तुमूह उपेर हिंगारेल एक मोटली खोली देखाड़ देय, एने ताच आखो आपणी केरता तियार किरज्यो।”
16 तेवी चेला ता रेन निकलीन गावाम आवा, एने जिहकेरीन यीशु चेलाह कियेल ईतो, तोहलो देख्या; एने फसह ने तिवारान खाणो तियारी केऱ्या।
17 जेवी हांज पोड़ गियी, तेवी यीशु बारा चेला हिऱ्यो आवो।
18 जेवी ता खाणेन बोह रियेल एता, तेवी यीशु चेलाह केयो, “मी तुमूह खेरीच केथु काय तुमरे माय रेन एक जाण जो मार हिऱ्यो रूटो खाते, तो मार दुसमोनान आथाम होप देय।”
19 एने चेला नाराज एय गीया एने ता एक एक जाण यीशुह केया, “काय तो मी हे?”
20 यीशु चेलाह जापाप आप्यो, “तुमू बारा जाणाम रेन एक हे, जो मार हिऱ्यो तेलीम आथ टाकेह।
21 काहाकाय मी माणहान बेटाख ने बाराम जिहकेरीन लिखेल हे, तिहेच केरीन ईथे; पुण ता माणहा पोर हाय जान आथा केरीन मी माणहान बिटोख मार दुसमोनाह होपाय जाय। केदी ता माणहान जेल्मोच नाय एतो ते तान केरता हाजो रेतो।”
मालीकान खाणो
(मत्ती 26:30; लुका 22:14-20; 1 कुरिंथीयो 11:23-25)
22 जेवी ता रूटो खाताला, तेवी यीशु रूटो उखलीन बोगवानान दन्यवाद किऱ्यो, एने रूटो मुड़ीन चेलाह आप्यो एने ताह केयो, “लिवो, ज्यो मारो सेरीर हे।”
23 ओवतो यीशु वाटको विसीन दन्यवाद किऱ्यो, एने चेलाह आप्यो; एने आखा चेला तो पिय लेदा।
24 तेवी यीशु चेलाह केयो, “बोगवानान एने माणहान विचीम नोवाली वायदो देखाड़नेन जी मारी लुय हे, जी जुलूम जाणान केरता वोयाड़ाय जाथे।
25 मी तुमूह खेरीच केथु, ‘अंगुरान रोह ते दिह वोर केदी नाय पिव, जाह वोर बोगवानान राज माय नोवाला अंगुरान रोह नाय पिय लेव।’ ”
26 ता गीत गावीन बोगवानान बोड़ाय केऱ्या, ओवता ता बाहेर जेतुन नावान बोयड़ा पोर गीया।
पतरसान नाकारनेन जाणाव
(मत्ती 26:31-35; लुका 22:31-34; योहान 13:36-38)
27 तेवी यीशु चेलाह केयो, “तुमू आखा माहु सोड़ीन नाह जाहो, काहाकाय वचन इहकेरीन किथे, ‘मी गोवालाह मारूह, एने मेंड्रान टुलो जोत तोथा वेराय जाती।’
28 पुण मी जीव उठुह एने ओवतो तुमूह रेन पेल गेलील माय जाह।”
29 पतरस यीशुह केयो, “केदी आखा तुवाह सोड़ देती, पुण मी तुवाह नाय सोडु।”
30 यीशु पतरसाह जापाप आप्यो, “मी तुवाह खेरीच केथु काय आज रातीच कुकड़ो दुय वारीन वाह देणेन पेल, तु तीन वारीन माहु नाकार हे।”
31 पुण पतरस उंजु बी पाको बुरहो आपीन केयो, “केदी माहु तार हेऱ्यो मोरने बी पोड़ी, तीबी मी तुवाह नाय नाकारू।” इहीचकेरीन आखा चेला बी केया।
गतसमनी बोगीचा माय यीशुन विन्ता
(मत्ती 26:36-46; लुका 22:39-46)
32 ओवता ता गतसमनी नावान बोगीचा माय आवा, एने यीशु तान चेलाह केयो, “मी विन्ता केरथु ताह वोर न्या बोह रिवो।”
33 उवतो यीशु पतरस, याकुब एने योहानाह आरही ली गीयो; एने यीशु नाराज एने मोंदड़ालोह एय गीयो,
34 एने यीशु ताह केयो, “मारो मोन जुलूम नाराज हे, न्या वोर काय मी मोरने माय हे: तुमू न्याच रिवो, एने जागताला रिवो।”
35 ओवतो यीशु थोड़ोक ओंगाण गीयो एने बुई पोर पोड़ीन विन्ता केरने बाज गीयो काय केदी एय सेकी ते ज्यी गेड़ी माहु पोर रेन टेल जाय,
36 एने केणे बाज गीयो, “एय अब्बा, एय आबा, तुवाह आखो काय एय सिकेह; ज्यी पिड़ा माहु पोर रेन सिटो केर दे: तीबी मी होदथु तोहलो नाह, पुण जो तु हुदेह तोच एय।”
37 जेवी यीशु पुशो आवो, तेवी तीन चेलाह हुवताला देखीन पतरसाह केयो, “एय शमोन तु हुवेह? काय तु एकताल बी जागतालो नाह रेय सिकेत।”
38 तुमू आखा जागताला रिवो एने विन्ता किरते रिवो काय तुमू पारेख माय नाय पुड़हो। जीव ते तियार हे, पुण सेरीर कोमजोर हे।
39 एने यीशु पुशो जात रिनो, तेवी यीशु तोच बोल बोलीन विन्ता केरने बाज गीयो।
40 पुशो यीशु आवीन ताह हुवताला दिख्यो, काहाकाय ता निंद माय गाराय रियेल एता; एने नाह जाणताला काय, ताह काय जापाप आपज्यो।
41 पुशो यीशु तिसरी वार आवीन ताह केयो, “काय तुमू एवी वोर निरहा हुवतेह? बास ती गेड़ी आव लागीह; दिखो एवी मी माणहान बिटोख पापी माणहान आथाम होपाय जाह।”
42 उठो! चालो एने दिखो, माहु मारनेन केरता देरनार आहने आव पुचील हे।
यीशुह बुल माय देरीन होप देणु
(मत्ती 26:47-56; लुका 22:47-53; योहान 18:3-12)
43 यीशु ता हिऱ्यो वातु केरने बाजरियेल ईतो, तोलाक माय यहुदा जो बारा चेलाम रेन एक ईतो, यहुदा मुखी चाकऱ्या एने देरेमगुरू एने डायडाया उगे रेन एक होवटाली गेरदी लेन चालोच आव पोचनो, जा तालवार्यु एने डेंगा लेय रियेल एता।
44 यीशुह होपणार ताह जो पुतो आपेल ईतो, “जा एदम्याह मी गुल्या देह ताह तुमू देरीन हाकली केरीन बांदिन ली जाज्यो।”
45 यहुदा आवो एने चालोच यीशुन आहने आवीन केयो, “एय गुरू केयीन यीशुह गुल्या दिनो।”
46 तेवी ता आहने आवीन यीशु पोर आथ टाक्या एने ताह देर लेदा।
47 चेलाम रेन जा आहने उबरियेल एता, एक जाण तालवार काड़ीन मुखी चाकर्यान पावराह दिनो एने तान कान तोड़ दिनो।
48 यीशु गेरदीह केयो, “काय तुमू माहु गुनेगार सोमजीन देरनेन केरता तालवार्यु एने डेंगा लेन आवाह?
49 मी दाड़ीन दिह मोंदिर माय तुमरी हिऱ्यो रेतालो एने हिकाड़तालो तेवी तुमू माहु नाह देऱ्या, पुण ज्य ज्यानकेरता ईयेल हे काय पुस्तेक ने वातु पुरी एय।”
50 ज्य होमलीन आखा चेला यीशुह सोड़ीन नाह गीया।
51 एक जुवान उगाड़ला सेरीर पोर डाठी पांगरीन यीशुन पासाण आवो, एने ता माणहे ताह देरनेन कोसीत केऱ्या।
52 पुण तो डाठीह सोड़ीन उगाड़लोच नाह गीयो।
यीशुह यहुदिन मोटला पोंचान सोमोर ली जाणु
(मत्ती 26:57-68; लुका 22:54,55,63-71; योहान 18:13,14,19-24)
53 ता यीशुह मुखी चाकऱ्या फाय ली गीया; एने आखा मुखी चाकऱ्या एने देरेमगुरू एने डायला ता फाय टोलवाय गीया।
54 पतरस सीट सिटोच यीशुन पासाण पासाण मुखी चाकर्यान वाड़ान खोलीम वोर आवो, एने सिपाया हिऱ्यो बोहीन आक्ठो तापणे बाज गीयो।
55 तेवी यहुदिन मोटला पोंचा माय मुखी चाकऱ्या यीशुह मारनेन केरता तान विरोद माय पुरावो होदताला, पुण नाह जुड़नो।
56 थोड़ाक माणहे यीशुन विरोद माय जुठो पुरावो देताला, पुण तान पुरावो एक हारको नाह ईतो।
57 तेवी थोड़ाक माणहे उबरीन यीशुन विरोद माय इहकेरीन पुरावो देना,
58 “आमु ज्याह इहकेरीन केतालो होमलेल हेते, काय आथा केरीन बादेल मोंदिराह मी ओदार देह, एने तीन दिह्या माय दिहरो उबो केरूह, एने तो आथा केरीन बादेल नाय रेय।”
59 पुण तान ज्यो पुरावो बी एक हारको नाह ईतो।
60 तेवी मुखी चाकर्यो विची माय उबरीन यीशुह फुशो, “ज्या माणहे तारे विरोद माय काय पुरावो देतेह, तु कायच जापाप नाह आपेत?”
61 पुण यीशु ठावकोच रिनो, एने काय जापाप नाह आप्यो। पुशो मुखी चाकर्यो यीशुह फुशो, “काय तु ता बोरकेतवाला बोगवानान बिटोख मसी हे?”
62 तेवी यीशु जापाप आप्यो, “होव मी हे,” एने तुमू माणहान बेटाख ताकेतवाला बोगवानान जीवड़े उगे बोहीन, एने जुगाम वादला पोर आवतालो दिखहो।
63 तेवी ज्य होमलीन मुखी चाकर्यो तान फाड़का फाड़ीन केयो, “एवी आमुह उंजु काल्ला पुरावान गिरेज नाय मीले?”
64 तुमू ज्यी चिहटा होमेल लियेल हेते, ज्या पोर तुमरो काय विचार हे? ओवता ता आखा केया ज्यो मारनेन डेंडान बाराबोर हे।
65 तेवी थोड़ाक यीशु पोर थुपणे बाज गीया, एने यीशु पोर फाड़को टाकीन एने यीशुह केताला, “जाणाव केरीन के काय तुवाह कुण देनोह, एने राखवाल्या यीशुह देरीन थापोड़ देताला।”
पतरस यीशुह नाकारने
(मत्ती 26:69-75; लुका 22:56-62; योहान 18:15-18,25-27)
66 जेवी पतरस निड़ो खोलीम बोह रियेल ईतो, ते मुखी चाकर्यान पावेरनी माय रेन एक ता आवी,
67 एने पतरसाह आक्ठो तापतालो देखीन एने तान उगे नेजेर टाकीन केयी, “तु बी ते ता यीशु नासरी हिऱ्यो ईतो।”
68 पतरस तीन वात टाल दिनो, एने केयो, “मी नाह जाणेत एने नाह सोमजेत तु काय किथे,” ओवतो तो फाटेक उगे गीयो; एने कुकड़ो वाह दिनो।
69 ती पावेरनी पतरसाह देखीन ता माय जा आहने उबरियेल एता, ताह केणे बाज गियी, “ज्यो ताम रेन एक हे।”
70 पुण पतरस पुशो नाकार किऱ्यो। थोड़ीक वार माय जा आहने उबरियेल एता पतरसाह केया, “खेरीच तु ता माय रेन एक हे; काहाकाय तु बी गेलील वालो हे।”
71 पुण पतरस ताह केयो, माहु बोगवान खेतेम केरी, मी सुगोण खाईन खेरीच केथु, “मी ता माणहाह जान वातु तुमू केरतेह मी नाह जाणेत।”
72 तेवी चालोच दिहरी वार कुकड़ो वाह दिनो। तेवी पतरसाह ती वात जी यीशु ताह कियेल ईतो एर आवी: “कुकड़ो दुय वार वाहणेन पेल तु तीन वार माहु नाकार हे।” एने पतरस रेड़ने बाज गीयो।