5
यीशु एक बुतड़ो लागेल माणहाह हुदारने
(मत्ती 8:28-34; लुका 8:26-39)
1 यीशु एने ता चेला गेलीलान देरीयान दिहरे उगे गिरासेनियान एद्दीम आवा।
2 एने जेवी यीशु डोंडह्या माय रेन उतेरनो, तेवी बुतड़ो लागेल एक माणुह ताह मिलनो। जो माहणान उगे रेन आयेल एतो।
3 एने तो माहणा माय रेतालो। कुण बी ताह हाकुल केरीन बांदिन नाह मेल सेकताला;
4 काहाकाय ताह जुलूम वारीन आथा पायाम बेड्या एने हाकुल केरीन बांदिल एता, पुण तो हाकलीह तोड़ देतालो एने बेड्यान टुकड़ा टुकड़ा केर देतालो। ताह ताबाम केरनेन ताकेत कुणास फाय नाह एती।
5 तो रात ने दिह माहणा एने डोंगरा माय आयेड़तीन फिरतालो, एने देगड़ा केरीन सोतान सेरीराह देन जेखमी केरतालो।
6 जेवी तो सिटेच रेन यीशुह देख्यो; केरीन तो दोवड़ीन ता फाय आवो, एने तान पाया पोड़ीन वोंद्यो,
7 एने मोठेस आयड़ीन केयो, “एय मोटला बोगवानान सोरा यीशु! मारो तार हेऱ्यो काय लेन देन नाह? मी तुवाह बोगवानान सुगोण आपथु, माहु डेंड मा आपी!”
8 तो ज्यानकेरता इहकेरीन केयो, काहाकाय यीशु ता बुतड़ाह कियेल ईतो, “एय बुतड़ा, ज्या माणहा माय रेन बाहेर निकेल जा।”
9 यीशु ताह फुशो, “तारो नाव काय हे?”
तो माणुह जापाप आप्यो, “मारो नाव ‘फोज हे,’ काहाकाय आमु जुलूम हेते!”
10 एने तो यीशुह जुलूम विन्ता केरीन केयो काय आमुह ज्या ईलाका माय रेन बाहेर नाय मोकली।
11 ताहरी बोयड़ान आड़वाया माय हुवऱ्यान एक मोटलो टुलो चेरने बाजरियेल ईतो।
12 केरीन बुतड़ो यीशुह विन्ता केरीन केयो, “आमुह ओया हुवऱ्या माय मुकेल दे, एने आमु हुवऱ्या माय रिग जाहु।”
13 ओवतो यीशु ताह मुकेल दिनो, एने बुतड़ा ता माणहा माय रेन निकलीन हुवऱ्या माय रिग गीया। एने हुवऱ्यान टुलो जा दुय एजार एता, आड़वाया माय रेन दोवड़ीन पाण्या माय जाय पोड़ना एने बुड़ीन मोर गीया।
14 ज्य देखीन हुवऱ्यान गोवाल्या दोवड़ीन हेयराम एने गावाम गीया, एने ज्यी गेटनान बाराम केणे बाज गीया। एने जो काय ईयेल एतो तो देखणेन केरता माणहे आवा,
15 एने जेवी माणहे यीशु फाय आवा, तेवी ता माणहाह जा माय बुतड़ान टुलो ईतो। ताह फाड़का पेरीन एने सुद्दी माय बोह रियेल देखीन बिय गीया।
16 जा माणहे ज्य आखो तान डोला केरीन पेल दिखेल एता, ता हेयराम रेन आयेल माणहाह केया काय बुतड़ा लागेल माणहा हेऱ्यो काय ईयेल एने हुवऱ्यान बाराम।
17 केरीन ता माणहे यीशुह विन्ता केरीन केया काय आमरा एद्दी माय रेन जात रेय।
18 जेवी यीशु डोंडह्या पोर चेड़ने बाजरियेल ईतो, तेवी तो माणुह जाह पेल बुतड़ा लागेल एता, तो इहकेरीन विन्ता केरीन केयो, “माहु बी तार हेऱ्यो आवणे दे!”
19 यीशु ताह आवणे नाह दिनो। पुण ताह केयो, “तार गेर जाईन तारा गेरल्या माणहाह के काय बोगवान माहु पोर कोलीक मोठी गीण किरेल हे।”
20 केरीन तो माणुह दिकापुलिस दोह गावान एक हियोर हे, एने ता जाईन तो ज्यी वातुन बाराम माणहाह केयो काय यीशु मार केरता कोलोक मोठो काम किरेल हे। एने आखा माणहे तान वातु होमलीन बोंगलाय गीया।
एक मुरेल सोरी एने दुखारी बायकु
(मत्ती 9:18-26; लुका 8:40-56)
21 जेवी यीशु डोंडह्या माय बोहीन पुशो देरीयान ती उगे गीयो। तेवी माणहान एक होवटाली गेरदी यीशु हेरी टुलो एय गियी, एने तो देरीयान मीरेच ईतो।
22 तेवी यहुदिन बोक्तीन गेरान आदिकारी माय रेन याईर नावान एक माणुह आवो, एने यीशुह देखीन तान पाया पुड़नो।
23 एने याईर आथ जोड़ीन यीशुह विन्ता केरीन केयो, “मार आतली सोरी जुलूम दुखारी हे। केरीन तु मार गेर चाल एने ती पोर आथ मील काय ती हुदरी जाय, एने जीवताली रेय!”
24 ओवतो यीशु ता हिऱ्यो गीयो, एने होवटाली माणहान गेरदी बी तान पासाण चाल देनी, एने माणहे ओला होवटा एता काय ता हेऱ्या ठोकातेन चालताला।
25 ता माय एक बायकु एती, जीह बारा वोरह्या रेन लुय वोयणेन बेमारी एती,
26 ती जुलूम तेकलीत माय एती, एने मोकतास वोंसीन आथा केरीन जुलूम दुख विठेल एती। एने ती फाय जोलो मालदेन एतो तो आखो खेरची दियेल एती तीबी तीह कायच गुण नाह दिनो। पुण उंजु होवटीह दुखार्यी एय जायेल एती।
27 ती यीशुन बाराम होमलेल एती, केरीन गेरदी माय रेन तान पासाण आवी एने तान फाड़काह सापेल लेदी,
28 काहाकाय ती केताली, “केदी मी तान फाड़काह ओलीच सापेल लेह, तीबी मी हुदेर जाह।”
29 एने ती यीशुन फाड़काह सापेलतास तीन लुय वोयणे बोंद एय गियी, एने ती तीन सेरीर माय ज्य जाण लेदी काय मी ता दुखा माय रेन हुदेर गियीह।
30 तुलेचबूखे यीशु ज्य जाण लिदो काय मार माय रेन ताकेत निकलेल हे, केरीन तो गेरदी माय पासाण फिरीन फुशो, “मार फाड़काह कुण सापलेल?”
31 तान चेला जापाप आप्या, “तु ते देखीच रिनोह काय माणहे तार हेऱ्या ठोकातेन चालतेह; एने तु किथे काय कुण माहु सापलेल हे?”
32 पुण यीशु कावदेन देखणे बाज गीयो काय माहु कुण सापलेल एतो।
33 ती बायकुह ज्यो मालुम एय जायेल एतो काय ती हेऱ्यो काय ईयेल एतो, केरीन ती बितेन एने कापतेन आवी, एने यीशुन ओंगाण पाया पोड़ीन आखो खेर खेरीच केय देनी।
34 यीशु तीह केयो, “बेटी, तारो बुरहो तुवाह हुदार दियेल हे, हुकेह जा, एने ज्यी बेमारीह रेन हुदरीन रे।”
35 जेवी यीशु ज्य केणे बाजरियेल ईतो, तेवी थोड़ाक माणहे याईर आदिकारीन गेर रेन खुबेर लेन आवा एने ताह केया, “तार सोरी मोर जायेल हे। एवी गुरूह तेकलीत काहा देता।”
36 पुण यीशु तान वातु होमलीन बी द्यान नाह देनो, एने आदिकारीह केयो, “बिय मा, बुरहो उलोस मेल।”
37 तेवी यीशु पतरस, याकुब एने तान बाहख योहानाह सोड़ीन दिहराह कुणीह बी ता हिऱ्यो आवणे नाह दिनो।
38 जेवी ता आदिकारीन गेर आवा, तेवी यीशु माणहाह चिल्लाटा देन रेड़ताला एने जोरेस आयेड़ताला दिख्यो।
39 तो माय जाईन ताह केयो, “तुमू काहा आयेड़तेह एने रेड़तेह? सोरी मुरेल नाह सोती, पुण हुवणे बाजरेनीह!”
40 ता माणहे ज्य होमलीन यीशुन मोजाक उड़ाया, पुण तो ताह आखाह बाहेर काड़ दिनो, एने सोरीन आईख आबाख एने तान तीन चेलाह आरही लेदो, एने सोरी एती ती खोली माय गीयो।
41 एने तो सोरीन आथ देरीन तीह केयो, “तलीता कुमी,” तान मतलब हे, “एय आतली सोरी, मी तुवाह केथु उठ!”
42 ती सोरी तुलेचबूखे उठीन चालने फिरने बाज गियी। काहाकाय ती बारा वोरह्यान एती, तेवी ता माणहे जुलूम बोंगलाय गीया।
43 पुण यीशु ताह उकुम आपीन केयो, “ज्यी वात कुणीह मालुम पोड़णे नाय जुवे, एने सोरीह काह खाणेन आपो।”