22
वाराड़ान खाणान किस्सो
(लुका 14:15-24)
1 ज्या पोर रेन यीशु पुशो ताह किस्सा माय केणे बाज गीयो।
2 “हेरगान राज ता राजान गेत हे, जो तान सोरान वाराड़ान खाणो आप्यो।
3 एने तो तान एक पावरा फाय खुबेर ली मुकल्यो काय नेवताल्या माणहाह वाराड़ान खाणो खाणे हादाड़े; पुण ता नाह आवणे होद्या।
4 पुशो तो पावराह किन मुकल्यो, नेवताल्या माणहाह किवो: ‘मी खाणो तियार केर मेल्योह मार बुयेल एने पालेल जेनवार माराय जायेल हेते, आखो तियार हे वाराड़ा माय आवो।’
5 पुण ता नाह होमल्या एने जात रेना काल्लाह खेता माय गीया एने काल्लाह काम केरने गीया।
6 दिहरा माणहे जा वुचेल एता, तान पावराह देरीन तान ईजुत उड़ाया एने मार देना।
7 तेवी राजाह राग आवो, एने तो तान सिपायड़ाह मोकलीन ता खुनीह माराव दिनो, एने तान गावाह हेलगाड़ दिनो।
8 तेवी तो तान पावराह केयो, वाराड़ान खाणो ते तियार हे, पुण हादिल माणहा हाजा नाह एता।
9 केरीन तुमू फाटा पोर जावु एने जोला बी माणहे जुड़ती तोलाह वाराड़ान खाणो खाणे हाद लावज्यो।
10 ता पावोर सेड़की पोर जाईन काय हाजाला काय बाकताला जोला बी सापेड़ना तोला आखाह टुलो केऱ्या; एने वाराड़ान गेरा माय पुरा बोराय गीया।”
11 जेवी राजा पावणाह देखणे माय आवो, तेवी तो ताहरी एक माणहाह दिख्यो, जो वाराड़ान फाड़का नाह पिरेल एतो।
12 तो ताह फुशो एय दोस्ती तु वाराड़ान फाड़का काहा नाह पेरीन आवो? तान मुय बोंद एय गीयो।
13 तेवी राजा चाकऱ्याह केयो, “ज्यान आथ पाय बांदिन बाहेर आंदारा माय जुगार दिवो, ता रेड़णो, एने दात केकड़ावणे रेय।”
14 काहाकाय हादिल ते जुलूम हेते, पुण निवाड़ेल थोड़ाच हेते।
केसराह फालो आपणेन बाराम सावाल
(मरकुस 12:13-17; लुका 20:20-26)
15 तेवी फरिसी जाईन तान तान विचार केऱ्या, काय ताह किहीक वातु माय देरहु।
16 तेवी ता तान चेलाह हेरोदेस हेऱ्या यीशु फाय ज्य केणेन मोकल्या, “एय गुरू, आमु जाणतेह काय तु खिरो हे, एने बोगवानान वाट खेराय माय हिकाड़ने, एने कुणीन पारवाय नाह केरने, काहाकाय तु माणहान मुय देखीन वातु नाह केरने।
17 केरीन तु आमुह कि, तुवाह काय लागेह? केसराह फालो आपणे हाजो हे, काय नाह।”
18 पुण यीशु तान विचार जाणीन केयो, “एय कोपट्या, माहु काहा पारेखतेह?
19 फालान एक रूपियो माहु देखाड़ो!”
तेवी ता यीशु फाय एक रूपियो लेन आवा।
20 यीशु ताह फुशो, “ज्यो साप एने नाव कुणान हे?”
21 ता यीशुह केया, “केसरान,” तेवी यीशु ताह केयो, “जो केसरान हे, तो केसराह आपु; एने जो बोगवानान हे तो बोगवानाह आपु।”
22 ज्यो होमलीन ता बोंगलाय गीया, एने यीशुन जागे रेन जात रेना।
पोशो जीव उठणो एने वाराड़
(मरकुस 12:18-27; लुका 20:27-40)
23 तीस दिह सदुकी जा मुरेल माय रेन पोशो जीव उठणो सोतोच नाह केणु ता यीशु फाय आवा एने ताह फुशा।
24 “एय गुरू, मुसो कियेल ईतो, काय ईखेह एदमी बिगेर सोरा ईयेल मोर जाय, ते तान बाहख तान बायकु हिऱ्यो वाराड़ केर लेय, तान बायाख ने केरता वोस पायदा केरी।
25 एवी आमरे न्या हात बाहख एता, पिल्लो वाराड़ उलोस केरीन मोर गीयो, एने तान सोरा बी नाह ईयेल एता, तानकेरता तान बायकुह बायाख वाटु मेल गीयो।
26 तिहेस केरीन दिहरो, एने तीसरो बी किऱ्यो एने हात बायाख हेऱ्यो वोर तिहेस एनो।
27 आखान पासाण ती बायकु बी मोर गियी
28 जीव उठणेन पासाण ती ता हात बायह्या माय रेन कुणीन लाडी बोणी? काहाकाय ती आखान लाडी बुणेल एती।”
29 यीशु ताह जापाप आप्यो, “तुमू वचन एने बोगवानान ताकेत नाह जाणते; ज्यानकेरीन बुल माय पोड़ रेनाह।
30 काहाकाय ता जीव उठेन वाराड़ नाय केरती नाह वाराड़ा माय आवती नाह वाराड़ माय होपाती, पुण हेरगा माय बोगवानान दुतान गेत रेती।
31 पुण मुरेल माणहान जीव उठणेन बाराम काय तुमू ज्य वचन नाह वाच्या जो बोगवान तुमूह कियेल;
32 ‘मी अब्राहाम ने बोगवान, एने इसहाकान बोगवान, एने याकुबान बोगवान हे?’ तो मुरेल तान नाह, पुण जीवतालान बोगवान हे।”
33 आखा माणहे यीशुन पारचार होमलीन बोंगलाय गीया।
आखाम रेन मोटलो उकुम
(मरकुस 12:28-34; लुका 10:25-28)
34 जेवी फरिसी होमल्या काय यीशु सदुकीन बोलती बोंद केर दियेल हे, ते ता एकठा एना।
35 ता माय रेन एक देरेमगुरू पारेखणेन केरता ताह फुशो,
36 “एय गुरू, कायदा माय रेन काल्लो उकुम मुठो हे?”
37 यीशु ताह केयो, “तु बोगवान आपणा मालीकाह तारो आखो मोन एने तारो आखो जीव एने तारी आखी बुद्दी केरीन मोंग केर।
38 मोटली एने मुखी उकुम ज्योस हे।
39 एने तान गेत ज्यो दिहरो बी हे, तु तार आहेंल्याह पोर तार गेत मोंग केर।
40 ज्या दुय उकुम आखा कायदान एने जाणकारान आदार हेते।”
मसीन बारामाय सावाल
(मरकुस 12:35-37; लुका 20:41-44)
41 जेवी फरिसी एकठा एता, ते यीशु ताह फुशो,
42 “मसीन बाराम तुमू काय विचार केरतेह? तो कुणान बिटोख हे?” ता यीशुह केया, “दाऊदान।”
43 यीशु ताह फुशो, ते दाऊद चोखाला जीवा माय बोरायीन ताह मालीक काहा किथे?
44 मालीक, मार मालीकाह केयो:
“मारी जीवड़े उगे बोह,
जाह वोर काय मी तारा दुसमोनाह तारा पायान बुंदे नाय केर देव।
45 हाजो, जेवी दाऊद ताह मालीक किथे, ताहार तो तान बिटोख किहीक ठेरावनो?”
46 ज्यान जापाप माय काईच बी एक वात नाह केय सीक्यो। ते दिह रेन कुण बी पोशो ताह काय फुसणेन ईमोत नाह केऱ्या।