पतरस लिखा हुआ दुसरा पत्र
पतरस लिखेल दुसरो पोत्रो
ओलखात
दुसरी पतरस ने पोत्री माय कियेल हे काय ज्यी प्रेरित पतरसान उगे रेन लेखाय जायेल एती। पुण आज ने कोलाक एकलीवालाह माणहाह ज्यो नाह लागेत काय ज्यो खेरी हे। ज्यो एय सिकेह काय एगदो दिहरो पतरसान उगे रेन लिखेल एय। लेखणार किथे काय तो यीशुन जीवणान एने खास केरीन वेह बोदेलने बुखेत खुद दिखेल ईतो। 1:17-18 केदी पतरस पोत्र लिखेल ईतो ते एय सिकेह काय तो रोम माय रेन 65-69 यीशुन जेल्मान पासाण एने मोरनेन पासाण लिखेल हे ज्यानकेरता काय ज्यी पोत्री पेल्ली पोत्रीन पासाण लेखायेल हे। 3:1 एने पतरस आखा बुरहो केरनारा माणहाह पोत्र लेखीन किथे।
पतरस ज्यी पोत्रीह हाजो जीवणो जीवणेन केरता ओंगाण केरने एने जुठा मास्तेर्यान पालेन नाह केरनेन केरता एने चेतावणी आपणे केरता लिखेल ईतो। 2 पतरस ता माणहाह नाह दिखेल केरनेन केरता खुस किऱ्यो जा केतेह काय यीशु पोशो आवणेन जुलूम लाम्बो टेम लेणे बाजरिनोह। तान सावाय पतरस केयो काय बोगवान दिऱ्यो नाह सोतो पुण आखाह वोचाड़ने हुदेह। 2 पतरस 3:8-9 ज्यो एक हाजालो जीवणो जीवणेन केरता एक कारेण हे। 3:14
रूपरेखा
1. पतरस सोतान ओलखात वाचणारान देखाड़ेह। 1:1-2
2. ओवतो तो हाजो जीवणो जीवणेन केरता एर केरावेह काहाकाय बोगवान आपणी हिऱ्यो हे। 1:3-21
3. तान पासाण पतरस जुठा मास्तेर्यान विरोद चेतावणी आपेह एने किथे काय सेवली बुखेत जुठा मास्तेर्या हेऱ्यो काय एय। 2:1-22
4. तान पासाण पतरस यीशुह पोशो आवणेन केरता तियार एणेन केरता हाजो जीवणो जीवणेन केरता बुरहो केरनाराह खुस किऱ्यो। 3:1-17
1
नमस्कार
1 शिमोन पतरसान उगे रेन, जो यीशु मसीन प्रेरित एने पावोर हे,
ता माणहान नावे जा आमरो बोगवान एने सोड़ेवणार यीशु मसीन नियावान उगे रेन आमरी गेत किमतीदार बुरहो सापेड़नो।
2 बोगवान एने आपणो मालीक यीशुन ओलखातीन उगे रेन गीण एने सान्ती तुमरे माय जुलूम होवटी वोड़ते जाय।
मसीह हादावणी एने निवोड़
3 काहाकाय बोगवानान ताकेत आखो काय जो जीवणा एने बोक्ति हेऱ्यो नातो मिलेह, आपुह तास ने ओलखातीन उगे रेन आपेल हे, जो आपुह तास ने बोड़ाय एने हाजा गुणान गेत हादेल हे।
4 काहाकाय यीशु न्यास ने वोजेसे आपुह तान किमतीदार एने जुलूम मोटलो वायदो आपेल हे: ज्यानकेरता काय तान द्वारे तुमू ती बुरायीह रेन सुटीन, जी दुनिया माय खाराब मोरजी केरीन ईथे, बोगवानान सोबावाम बेलाय जावो।
5 ज्यानकेरता तुमूह एय तोलीक कोसीत केरीन आपणा बोरहाम हाजा गुणाह जोड़ो; एने हाजा गुणाम सोमेजाह,
6 एने सोमेज माय वेठणो, एने वेठणा माय दिर, एने दिर माय बोक्ती।
7 एने तुमरी बोगवानान बोक्ती माय बायबांडलाह एने मसी बायबांडला माय मोंगाह जोड़ो।
8 काहाकाय ज्या आखा गुणान जोरेवरी हे, एने केदी ज्यु वातु तुमरे माय जुलूम काय जुलूम हेत्यु ताहार ज्यो तुमूह आपणा मालीक यीशु मसीन इकेल माय काम केरनार एने फारेकवाला बाणावी।
9 काहाकाय जा माय ज्या गुण नाह सोता, तो आंदलो हे एने जींजवालोह दिखेह, एने तुमू विहरी जायेल हेते काय तुमरा पेल्ला पाप दोवाय जायेल हेते।
10 तानकेरता एय बाय बोणहा, तुमरी हादावणीन एने तुमरी निवोड़ मोजबुत केरनेन उंजु जादा कोसीत केरती जावो, काहाकाय केदी इहकेरीन किरहो ताहार केदी बी ठोकेर नाय खाहो।
11 एने इहीचकेरीन केरीन आपणो मालीक एने सोड़ेवणार यीशु मसीन जेलेमक्यो राज माय मोटलो मान सम्मान एते लेन तुमरो रिगणो रेय।
12 तानकेरीन ज्यु वातु तुमूह मालुम हेत्यु, एने जो खेरायीन वचन तुमूह जुड़ेल हे ता माय बोणीन रेतेह, तीबी मी तुमूह ज्यु वातुन एर केरावणेन केरता कायेम तियार रेह।
13 जाह वोर मी ज्या सेरीर माय जीवतालो हे ताह वोर तुमूह एर केरावीन जागताला मेलने, ज्यो माहु हाजो लागेह।
14 काहाकाय मी जाणथो काय मी मारो खेतेम एणार सेरीर सोड़न्यो हे, जीहे काय आपणो मालीक यीशु मसी माहु ज्यो कियेल ईतो।
15 तानकेरता मार उगे रेन मी पुरी कोसीत केरूह, काय माहु मोरनेन पासाण बी तुमू ज्यु आख्यु वातुन कायेम एर केर सिकहो।
मसीन बोड़ायीन डोलान सामने गोवा
16 काहाकाय जेवी आमु तुमूह आपणा मालीक यीशु मसीन ताकेतीन एने आवणेन खुबेर किरेल एता, ते आमु चेतराय केरीन ईयेल काहणीन आसरो नाह लेदा। काहाकाय आमु खुद तान बोड़ाय दिखेल एता।
17 काहाकाय जेवी यीशु आबाख बोगवाना फाय रेन मान एने बोड़ाय सापड़ायो, एने ता उजाला माय रेन ज्यो बोल होमलानो, “ज्यो मारो मोंगाल्लो बिटोख हे, ज्या पोर मी जुलूम खुस हे।”
18 एने जेवी आमु यीशु हेऱ्या चोखाला बोयड़ा पोर एता, ते खुद आमु हेरगाम रेन ज्योस बोल होमल्या।
19 आमरी फाय जो जाणकारान वचन हे, तो ज्यी गेटना पोर मोजबुत ठेरानो। तुमू ज्यो हाजो केरतेह जो ज्यो सोमजीन ता पोर नेजेर टाकतेह काय तो एक दिवो हे, जो आदारला जागाम तुलबूखे वोर उजालो किरेह, जाह वोर काय उजालो नाह एत, एने उजालान तारो तुमरा मोनाम चोमके नाय उठी।
20 पुण पेल ज्यो सोमजी लिवो काय चोखाली पुस्तेकीन काल्ली बी खुबेर एगदा जाणाव केरनारान विचारा पोर निकलेत नाह।
21 काहाकाय काल्ली बी बोगवानान उगे रेन आयेल खुबेर माणहान मोरजी पोर केदी नाह एनो, पुण माणहे चोखाला जीवाम बोरायीन बोगवानान उगे रेन बोलताला।