15
दिहरान फायदो किरो
1 आपु जा ताकेतवोर हेते, ता आपणा हुका उगे नाह देखता कोमजोरान कोमजोरीह वेठी।
2 आपणे माय रेन एकेक जाण आपणा आहेंल्याह तान बोलाय ने केरता खुस केरी काय तान बोरहा माय उन्नती एय।
3 काहाकाय मसी बी सोतान हुका उगे नाह दिख्यो, पुण जीहे लिखेल हे: “तार चिहटा केरनारे किरेल चिहटा मार पोर आवी।”
4 जोल्युक वातु पेलुस रेन लेखायेल, त्यु आपणीस हिक ने केरता लेखाय जायेल हे काय आपु दिर एने पुस्तेक प्रोत्साहन द्वारा आसा मीले।
5 एवी बोगवान जो दिर एने प्रोत्साहन आपेह, तुमूह ओहलो वरदान आपी काय तुमू यीशु मसीन गेत आपसाम एक मोन रिवो।
6 काहाकाय तुमू एक मोन एने एक सुर माय आपणो मालीक यीशु मसीह आबाख बोगवानान बोड़ाय केरी।
7 तानकेरता, जीहे मसी बोगवानान बोड़ायीन केरता तुमूह स्वीकार किरेल हे, तिहेस केरीन तुमू बी एका दिहराह स्वीकार किरो।
8 तानकेरता मी केथु काय जा उकुम डायडायाह आपेल एता ताह मोजबुत केरनेन केरता मसी, बोगवानान खेरायीह देखाड़नेन केरता, यहुदि माणहान सेवक बोणी।
9 एने बिगेर यहुदि बी किवीन वोजेसे बोगवानान बोड़ाय केरी; जीहे लिखेल हे, “तानकेरता मी जाती जाती माय तारो दन्यवाद केरूह, एने तारा नावान बजन गावुह।”
10 पोशो तो किथे, “एय बिगेर यहुदि माणहे, तान माणहा हेऱ्या खुसी मोणावो।”
11 एने उंजु किथे, “एय जाती जातीन आखा माणहे, मालीकान बोड़ाय किरो; एने एय राज राज ने आखा माणहे, तान बोड़ाय किरो।”
12 एने उंजु यशाया किथे, “यीशेन एक मुल देखाय, एने बिगेर यहुदिन आदिकारी बोणनेन केरता उबरेय, ता पोर बिगेर यहुदि आसा मेलती।”
13 एवी आसान बोगवान तुमूह बुरहो केरने माय पुरी खुसी एने सान्ती केरीन पुरो केरी, जाकेरीन चोखाला जीवान ताकेत केरीन तुमरी आसा वोदते जाय।
पौलुसान बिगेर यहुदि माय सेवा
14 एय मारा बाय बोणहा, मी खुद तुमरी बाराम खेरीच जाणथो काय तुमू बी सोता बोलाय केरीन बोरायेल एने बोगवानान एकली केरीन पुरा हेते, एने एका दिहराह सोमजाड़ सेकतेह।
15 तीबी मी तुमूह थोड़ो थोड़ो एर केरावणेन केरता जुलूम ईमोत केरीन लिखेल हे। ज्य ता गीणान वोजेसे एनो जो बोगवान माहु आपेल हे।
16 काय मी बिगेर यहुदिन केरता मसी यीशुन सेवक बोणीन बोगवानान हाजाली खोबरीन सेवा चाकर्यान गेत केरू, जाकेरीन बिगेर यहुदिन चेड़ावणो, चोखाला जीवा केरीन चोखालो बोणीन समर्पित केराय जाय।
17 तानकेरता त्यु वातुन बाराम ज्यु बोगवाना हेऱ्यो समंद मेलत्युह, मी मसी यीशु माय बोड़ाय केर सेकथु।
18 काहाकाय त्यु वातुह सोड़ीन मी दिहरी एगदी वातीम केणेन ईमोत नाय केरू जो मसी बिगेर यहुदिन उकुम मान्नेन केरता वचन एने कामा केरीन,
19 निसाणी, एने अद्बुत कामान ताकेत केरीन, एने चोखाला जीवान ताकेत केरीन मारीस द्वारा किरेल; न्या वोर काय मी यरूशलेम रेन कावदेन इल्लुरीकुम वोर मसीन हाजाली खोबरीन पुरो पुरो पारचार किऱ्यो।
20 पुण मारा मोनान मोरजी ज्यी हे काय जाहरी जाहरी मसीन नाव नाह पोचनो, ताहरी हाजाली खुबेर होमलाडु ओहलो नाय एय काय दिहरान पाया पोर गेर बाणावु।
21 पुण जिहकेरीन पुस्तेक माय लिखेल हे तिहेच केरीन एय, “जाह यीशुन हाजाली खुबेर नाह पोचनो, ता देखती एने जा नाह होमल्या ता सोमेजती।”
रोम यात्रान पौलुसान योजना
22 तानकेरता माहु तुमरी फाय आवणेन जुलूम वारीन रोकाय रिनो।
23 पुण एवी ज्या देसा माय मारा कामान केरता जागो नाह रिनो, एने जुलूम वोरह्या रेन माहु तुमरे फाय आवणेन लालसा हे।
24 तानकेरता जेवी मी स्पेन माय जाह ताहार तुमरी फाय लागतोन जाह, काहाकाय माहु आसा हे काय ती यात्रा माय तुमू हेरी बेट एय, एने जेवी तुमरी संगती केरीन मारो जीव खुसी केरीन थोड़ोक बोराय जाय ताहार तुमू माहु थोड़ोक ओंगाण पोचाड़ दिज्यो।
25 पुण एवी ते मी बोगवानान माणहान सेवा केरनेन केरता यरूशलेम माय जाथु।
26 काहाकाय मकादुनिया एने आखायान माणहाह ज्य हाजो लागो काय यरूशलेमान बोगवानान माणहा माय गोर गेरीबान केरता थोड़ोक फालो केरी।
27 ताह हाजो ते लागो, पुण ता तान केर्जावाला बी हेते, काहाकाय केदी बिगेर यहुदि तान आत्मिक वातु माय बागी एना, ताहार ताह बी जोरेवरी हे काय सारिरीक वातु माय तान सेवा केरी।
28 तानकेरता मी ज्यो काम पुरो केरीन एने ताह तो फालो होपीन तुमरी फाय लागतोन स्पेन माय जाह।
29 एने मी जाणथो काय जेवी मी तुमरी फाय आवुह, ताहार मसीन पुरो बोरकेत हिऱ्यो आवुह।
30 एय बाय बोणहा, आपणा मालीक यीशु मसीन उगे चोखाला जीवान मोंगान एर केरावीन मी तुमूह विन्ता केरथु, काय मार केरता बोगवाना फाय विन्ता केरने माय मार हेऱ्या मिलीन लागीन रिवो,
31 काय मी यहुदियान अविश्वासी से वोचीन रेव, एने मारी ती सेवा जी यरूशलेमान केरता हे, बोगवानान माणहाह पोटे;
32 एने मी बोगवानान मोरजी से तुमरी फाय खुसी माय आवीन तुमरी हिऱ्यो आराम सापड़ावु।
33 सान्तीन बोगवान तुमरे आखा हिऱ्यो रेय। आमेन।